Nꞌda ran tꞌuti bi ꞌyøtꞌa nꞌda ra mɛꞌbɛfi
20
Nɛ manꞌda ran tꞌuti bi man ra Jesús, bi ꞌyɛ̨na:―Nuꞌbʉ bi ꞌyøtꞌ ran tsꞌʉtꞌabi Oją , din ja tengu bi ꞌyøtꞌa nꞌda ran ꞌyohʉ mí ja ra dąhuąhi. Midi ꞌyonba yʉ mbɛfi ꞌbʉ xudi thoho. 2 Nɛ ꞌbex bi xifi hangu da guꞌtꞌi, nɛ bi mba bʉ ja rá huąhi ʉ bʉya. 3 Nuꞌbʉ mbɛ gʉto xudi, xø i ꞌyo bʉ hnini a ra mɛꞌbɛfi mahønꞌa, nɛ bi nu ꞌda yʉn ꞌyohʉ mi ꞌyotho bʉ nɛ bi mbɛn bʉ ja rá huąhi. 4 “Ní mbähä, gam pɛhmbʉ, ga jutꞌahʉ hangu dí nde ahʉ gui tąhmbʉ,” bi ꞌyɛ̨mbi. Nɛ bi mba ʉ bʉya. 5 Nɛ nuꞌbʉ mi hyuxyadi, xø ꞌyo bʉ ja ra hnini mahønꞌa ra mɛꞌbɛfi nɛ bi mbɛnh miꞌda bʉ rá huąhi. Nɛꞌbʉ mi zønꞌa hyu nde, xø bi mbɛnh miꞌda. 6 Nɛꞌbʉ mi zøn a cʉtꞌa nde, xø ꞌyo bʉ mahønꞌa nɛ bi nu bʉ miꞌda yʉ jąꞌi: “Hanja ngue xcán dethohʉ, ” bi ꞌyɛ̨mbi. 7 “Nguetho njon bi xije ra ꞌ bɛfi,” bi ꞌyɛ̨nꞌʉ. Nɛ bi ꞌyɛ̨mpꞌʉ: “Ní mbähä bʉ ja ma ꞌbɛfigä gam pɛhmbʉ bʉ, ga jutꞌahʉ hangu dín ndegä ga jutꞌahʉ,” bi ꞌyɛ̨mbi. 8 Nuꞌbʉ min de bʉya nu ra mɛꞌbɛfi bi xi a rá ngʉrpa mbɛfi: “Dami zonꞌdʉ yʉ mbɛfi, mꞌbɛtꞌo gui jutꞌʉ mꞌbɛjua bi zøni,” bi ꞌyɛ̨mpꞌa. 9 Nɛ nuꞌbʉ mi mba njuꞌtꞌi ʉ xi zøm bʉ ja ra huąhi ꞌbʉ cʉtꞌa nde, bin juꞌtꞌi tenguꞌbʉ gä ra pa xtím pɛfi. 10 Nɛ nuꞌbʉ min juꞌtꞌʉ bi mbʉmxudi ra ꞌbɛfi, bi bɛ̨ni ngue manꞌda xtán dąha xʉn ho xinda gueꞌʉ nꞌda ora tho bim pɛfi. Pɛgue ꞌdaꞌangu bi dąha. 11 Janangueꞌa bin cuɛ ʉ ꞌda 12 nɛ bi ꞌyɛ̨mpꞌa ra mɛꞌbɛfi: “Hanja ngue ꞌda angu gá jurcahe ʉ mꞌbɛjua bi zøhø, nɛ tsꞌʉtho bim pɛ ʉ. Pɛ nugähe, gätho ra pa dám pɛhmbe, madagueꞌa xʉm pa ra hyadi,” bi ꞌyɛ̨mbi. 13 Pɛ bi dąti, bi ꞌyɛ̨mpꞌa nꞌda mí ꞌbäpʉ: “Xiꞌe nꞌyø, nte man tsꞌo dá øtꞌe e. Ha hinga gueꞌa dá xi i dá jutꞌi i. 14 Dami hyąnꞌa nin zäbi, ní mba. Nugä, i ja ma pähä ꞌda angu ga jutꞌahʉ ʉ rán zɛgui bi zøhø. 15 Ha hinꞌyʉ man tꞌɛ̨di ga øtꞌä a dín nde ga øtꞌä nangue ma mbɛti, uague guí sɛya nguetho dá ørpa ran hocjąꞌi nꞌda,” bi ꞌyɛ̨nꞌa ra mɛꞌbɛfi bʉya, bi ꞌyɛ̨nꞌa ra Jesús ꞌbʉ mi man a ran tꞌuti. 16 Nɛ ngubʉ din ja ꞌbʉ bin tsꞌʉtꞌabi Oją . Nuꞌʉ mꞌbɛjua dim ꞌbɛtꞌo ʉ, nɛ nuꞌʉ ꞌbɛtꞌo dim ꞌbɛjua ʉ. Xʉn ngu bi zonhd Oją , pɛ hinga gätho bi huahni, bi ꞌyɛ̨ngähe ra Jesús.
Xø bi ma mahønꞌa ngue da du nɛ da dąmbɛ̨ni ra Jesús
17 Nɛ nuꞌbʉ mi tsꞌʉtho ga sømhbe bʉ Jerusalén, dí ꞌyohe bʉ ja ra nguani. Nɛ bi gʉgähe bʉ maꞌueni tsꞌʉ a ra Jesús, dí ꞌdɛꞌmayohohe, nɛ bi ꞌyɛ̨nje:
18 ―Nuya ga mbähä bʉ Jerusalén. Nuꞌbʉ dá sømhbʉ bʉ, da mba ma dägä bʉ ꞌbʉh yʉ hmumbäją nɛ yʉ xänbate niją , ngue da hyogä, guecä dán jąꞌigä ua ja ra ximhäi. 19 Nɛ di dägä bʉ ꞌbʉ ʉ him ma mijudíohʉ, nɛ din thengui nɛ da thɛxcä nɛ di cuarcä bʉ ja ra za, ga tu bʉ, nɛ da tꞌägui. Pɛ nuꞌbʉ ná hyupa ga thąmbɛ̨nigä, bi ꞌyɛ̨ngähe ra Jesús.
Rá mbe ra Jacobo nɛ ra Xuua bi ꞌyäp rá mate ra Jesús nangue yʉ́ tsꞌʉntꞌʉ
20 Nɛ nuꞌa rá mbe ra Jacobo nɛ ra Xuua, ngue yʉ́ tsꞌʉntꞌʉ ra Zebedeo ʉ, bin dąnyahmu bʉ ja a rá gua ra Jesús, in nde ꞌbɛꞌa da ꞌyäpi. 21 Nɛ nu ra Jesús bi ꞌyɛ̨mbi:
―ꞌBɛꞌa guí nde ga øtꞌe e, bi ꞌyɛ̨mbi.
―Dami ꞌyørca ra mate ngue nuꞌbʉ gui ꞌyøtꞌ ran tsꞌʉtꞌabi,ꞌda xtí hyutꞌʉ ma tꞌʉhni, bi ꞌyɛ̨nꞌa ra xisu.
22 Bi dą a ra Jesús:
―Pɛ hin guí pądi ꞌbɛꞌa nam bønꞌa gá ꞌyäqui.
Nɛ bi ꞌyänꞌna ra Jacobo nɛ ra Xuua:
―Ha guí ɛ̨na nɛꞌaui gui hyätꞌui gui nuui ran ʉnbi tengu gan nugä, bi ꞌyɛ̨nꞌa ra Jesús.
Nɛ bi dą ʉ bʉya:
―Hąha, ga hätꞌbe.
23 ―Majuąni maha, nɛꞌaui gui nuui ran ʉnbi tengu gan nugä, pɛ hingui sä ga ꞌdaꞌa ran tꞌɛ̨di guí ähmi. Pɛ gueꞌa ma Ta di un rán tꞌɛ̨di toꞌo in ndepe ꞌda xtí hyutho ꞌbʉ dán tsꞌʉtꞌabigä, bi ꞌyɛ̨nꞌa ra Jesús.
24 Nɛ nugähe dí ꞌdɛtꞌagähe bʉya dán cuɛ ꞌbʉ má øhmbe a ꞌbɛꞌa bi man ʉ yoho. 25 Nɛ gä bi zongahe ra Jesús dí ꞌdɛꞌmayohohe, nɛ bi ꞌyɛ̨nje:
―Nuꞌʉ yʉ tsꞌʉtꞌabi ua ja ra ximhäi i øtꞌ yʉ́ ꞌyɛ̨hɛ toꞌo gätho di manda, nɛ tenguꞌbʉ maguesɛ yʉ́ tsꞌɛdi ʉ. 26 Pɛ nuꞌahʉ hinga gueꞌa gui ꞌyøthʉ a. Pɛgue gan ꞌyɛ̨hɛ thohohʉ nangue ʉ miꞌda ꞌbʉ guí nde din ja ni tsꞌɛdihʉ. 27-28 Nɛ nuꞌahʉ ꞌbʉ guín nde gam ꞌbɛtꞌohʉ, gui ꞌyøthʉ ngue hinꞌyʉ ni tsꞌɛdihʉ nɛ gan ꞌyɛ̨hɛ thohohʉ, tengu thohogä ngue dán jąꞌigä ua ja ra ximhäi, him bá ɛ̨cä dam hmugä, pɛ bá ɛ̨cä dan ꞌyɛ̨hɛgä nɛ ga dä ma te gan yąnba yʉ́ te yʉ jąꞌi, bi ꞌyɛ̨nje ra Jesús.
Yoho yʉ xädä bi hocꞌa ra Jesús
29 Nɛ nuꞌbʉ xø má nɛxhe bʉ ra hnini Jericó, xʉn ngu yʉ jąꞌi bi dɛntho na ra Jesús. 30 Nɛ mí hupʉ yoho yʉ xädä bʉ ja ra ndenꞌyu. Nuꞌbʉ mí ꞌyøde mba bʉ ra Jesús, bi mbafi:
―Grá Hmu, rám bomꞌbɛto i ra David, dami huɛ̨gäꞌbe, bi ꞌyɛ̨nꞌʉ yʉ xädä.
31 Nɛ nu yʉ jąꞌi min ꞌyohʉ ra Jesús bi hɛcpa ʉ yʉ xädä. Pɛ manꞌda bi mba ʉ, bi ꞌyɛ̨m mahønꞌa:
―Grá Hmu, rám bomꞌbɛto i ra David, dami huɛ̨gäꞌbe, bi ꞌyɛ̨nꞌʉ.
32 Nu ra Jesús bʉya ꞌbʉ mí ꞌyø a man ʉ yʉ xädä, bi ꞌyänni:
―ꞌBɛꞌa guín nde ga øtꞌaui, bi ꞌyɛ̨mpꞌʉ.
33 Nuꞌʉ bi dąti:
―Grá Hmu, xoga ma däꞌbe, bi ꞌyɛ̨nꞌʉ.
34 Ɛ̨mmɛ bi huɛ̨cꞌa ra Jesús ʉ, bi därpa thoho yʉ́ dä, ꞌbex bi xoh yʉ́ dä nɛ bi dɛnꞌna ra Jesús bʉya.