Manꞌda ram hma nangue ran hyɛgui
19
Nɛ nuꞌbʉ mi guaꞌa man ra Jesús, bi bøm bʉ Galilea, bi hyąx ra ꞌyu ni mba bʉ ra xɛqui Judea, ꞌdanguadi ra dąthe Jordán. 2 Nɛ xʉn ngu yʉ jąꞌi bi dɛnthoho nɛ bi hoqui xʉn ngu yʉ hyɛ̨nni.3 Nɛ nubʉya, bi zøm bʉꞌda ma ngʉrpihe ngue yʉ fariseo, bʉ mi ꞌbäh ra Jesús . Mí honi ꞌbɛꞌa dí yąpi, nɛ bi ꞌyɛ̨mbi:
―Ha sä da hyɛh rá xisu nꞌda ꞌbʉ madí tsꞌʉtho ꞌbɛꞌa da ꞌyøtꞌe, bi ꞌyɛ̨nꞌʉ.
4 Nu ra Jesús bi dąti:
―Ha hin gá nuhʉ bʉ ja rám hman Oją , ngueꞌbʉ rá mbʉdi thoho ra ximhäi bi zän Oją nꞌda ran ꞌyohʉ nɛ nꞌda rá xisu. 5 Nɛ i mam bʉ: “Nu nꞌda ran ꞌyohʉ him man da dɛnꞌna rá ta o rá mbe ꞌbʉ dim ꞌbʉhmi rá xisu, pɛ dim ꞌbʉhmi da gohi tenguꞌbʉ nꞌdan jąꞌitho,” i ɛ̨m bʉ ja rám hma Oją. 6 Janangueꞌa nuꞌbʉ nꞌda ran ꞌyohʉ i ꞌbʉhmi rá xisu, pɛ hingui yonjąꞌi bʉ na hnu, nꞌdatho. Nɛ nuꞌa bi zän Oją, dim ꞌbʉi tenguꞌbʉ nꞌdan jąꞌitho,pɛ hin njon da bɛ̨ni din hyɛgui, bi ꞌyɛ̨nꞌa ra Jesús, bi tꞌɛ̨mpꞌʉ yʉ fariseo.
7 ―Hanja gní ꞌyɛ̨nje, nɛ nu ra Moisés bi ma da tꞌøtꞌa nꞌda rá søcuą ran xuni ꞌbʉ da hyɛh rá xisu nꞌda ran ꞌyohʉ, bi ꞌyɛ̨nꞌʉ yʉ fariseo.
8 Xø bi ꞌyɛ̨nꞌa ra Jesús bʉya:
―Gueꞌa bi ꞌyoꞌtꞌa ra Moisés, nguetho ɛ̨mmɛ xʉm mɛ ni mbʉihʉ. Pɛ nuꞌbʉ rá mbʉdi ra ximhäi him mín jabʉ. 9 Nɛ dí xi ahʉ, nuꞌbʉ nꞌda ran ꞌyohʉ bi hyɛh rá xisu nɛ him mi ꞌyomtꞌɛ̨ni a rá xisu, pɛ nuꞌbʉ bin thątꞌui manꞌda ra xisu a ran ꞌyohʉ, ya i ꞌyomtꞌɛ̨ni a bʉya. Nɛ ngutho ꞌbʉ nꞌda ran ꞌyohʉ din thątꞌui nꞌda ra xisu bi thɛgui, nɛ a ra ꞌyomtꞌɛ̨ni a bʉya, bi ꞌyɛ̨nꞌa ra Jesús.
10 Nɛ nubʉya, dá ɛ̨mbähe ra Jesús:
―Nuꞌbʉ hingui sä da hyɛh rá xisu nꞌda, manꞌda xʉn ho ꞌbʉ hin din thątꞌa nꞌda ꞌbʉ.
11 Ra Jesús bi ꞌyɛ̨na:
―Pɛ hinga gätho da zä din jabʉ, pɛ høntꞌʉ bi zän Oją din jabʉ. 12 Nguetho i ꞌbʉ i ꞌda ngue him bim ꞌbʉh rá xisu nguetho yʉ mbɛdi gueꞌbʉ go mim ꞌbʉi. Nɛ nuꞌʉ miꞌda yʉn ꞌyohʉ him bim ꞌbʉh yʉ́ xisu nguetho bi mbocpa ʉ yʉ́ hmu. Nɛ nuꞌʉ miꞌda, yʉ́ pähä zɛhɛ him bim ꞌbʉh rá xisu nguetho gueꞌa í tsꞌänni ngue hin dim ꞌbʉh rá xisu, ngue nte di hɛ̨ni nangue rá ꞌbɛfi Oją mahɛ̨tsꞌi da ꞌyøtꞌe. Nuꞌa toꞌo da bɛ̨nꞌna ram hma na, gueꞌa da bą a, bi ꞌyɛ̨nꞌa ra Jesús.
Ra Jesús bi ꞌyäp rán jąpi Oją nangueꞌʉ yʉ tꞌʉhni
13 Nɛ nubʉya bá tsꞌinba ꞌda yʉ tꞌʉhni bʉ mi ꞌbʉh ra Jesús, ngueꞌa mi hndepe da dospa yʉ́ yą yʉ tꞌʉhni, nɛ da ꞌyäp rán jąpi Oją nangue ʉ yʉ tꞌʉhni. Nugähe bʉya, dá hɛcpähe ʉ yʉ́ ta ʉ yʉ tꞌʉhni ngue hin da thopʉ ꞌbä a ra Jesús. 14 Pɛ nu ra Jesús bi ꞌyɛ̨nje:
―O guí hɛcpahʉ yʉ tꞌʉhni ngue him ba thocua, pɛ dami jafʉ ba thocua, nguetho nuꞌʉ toꞌo di manda rá tsꞌɛdi Oją, tenguꞌbʉ yʉ tꞌʉhni ʉ, bi ꞌyɛ̨na.
15 Nɛ bi dospa yʉ́ yą yʉ tꞌʉhni bʉya nɛ bi ꞌyäp rá mfätsꞌi Oją. Nɛ nuꞌbʉ mi jua a bi ꞌyøtꞌa ra Jesús, dá pøngähe bʉ bʉya.
Nꞌda ra mɛmbɛti bi nyąui ra Jesús
16 Nɛ manꞌda ra tsꞌʉntꞌʉ bi mba bʉ ꞌbä a ra Jesús nɛ bi ꞌyɛ̨na:
―Hoga xänbate i, ꞌbɛꞌa nin ho da zä ga øtꞌä ngue ga tįngä ra te, bi ꞌyɛ̨na.
17 Ra Jesús bi ꞌyɛ̨mpꞌa:
―Ha guím bɛ̨ni ꞌbɛꞌa guí ma ngue guí ɛ̨ngui xʉn hogui, nguetho høntꞌa xʉn ho a Oją. Pɛ nuꞌbʉ guín nde gui tįn ra te, dami jąꞌtsꞌʉ yʉn tꞌɛ̨di.
18 ―Ndaꞌa nín tꞌɛ̨di, bi ꞌyɛ̨nꞌa ra tsꞌʉntꞌʉ.
19 Bi dąꞌa ra Jesús:
―O guí hącpa rá te ni mijąꞌiui, o guí ꞌyomtꞌɛ̨ni, nɛ o guím pɛ̨ , nɛ o guí man yʉ fɛhni, nɛ gui numansu ni ta nɛ ni mbe, nɛ gui huɛ̨c ni mijąꞌiui tenguꞌbʉ da guesɛ i, bi ꞌyɛ̨nꞌa ra Jesús.
20 ―Gätho ʉ xtá jąꞌtsꞌi gueꞌbʉ go mán tꞌʉhni, ꞌbɛꞌa manꞌda di ꞌbɛdi ga øtꞌe, bi ꞌyɛ̨nꞌa ra tsꞌʉntꞌʉ.
21 Nu ra Jesús bi ꞌyɛ̨mpꞌa:
―Nuꞌbʉ guí nde gui tįn ra te, ní mba bá pä ꞌbɛꞌa gätho i ja i, nɛ gui darpa yʉ hyoya a rá muui ꞌbɛꞌa gätho gá pä, nɛ din jaꞌa manꞌda di muui bʉ mahɛ̨tsꞌi bʉya, nɛ nubʉya ba ɛ̨hɛ gui tɛngui.
22 Pɛ nu ra tsꞌʉntꞌʉ ꞌbʉ mí ꞌyø a bi xifi, ɛ̨mmɛ bi du rá mbʉi, nguetho ɛ̨mmɛ xʉn ngu ꞌbɛꞌa gä mi ja, nɛ bi mbeng thoho bʉya.
23 Nɛ nu a ra Jesús bʉya:
―Majuąni dí xi ahʉ, bi ꞌyɛ̨na, xʉn hɛ̨i da yʉrpʉ di manda rá tsꞌɛdi Oją nꞌda ra mɛmbɛti. 24 Dami ꞌyøhmbʉ mahønꞌa. Manꞌda hingui hɛ̨i da yʉtꞌa ra camello bʉ ja rá gu ra ꞌyofani, xinda gueꞌa nꞌda ra mɛmbɛti da yʉrpʉ di manda rá tsꞌɛdi Oją ,bi ꞌyɛ̨nje.
25 Nɛ dá hyonya thohohe ꞌbʉ má øhmbe bi ma ra Jesús. “Toꞌo maha da zä din yąni,” dán ꞌyɛ̨m zɛhɛhe bʉya.
26 Bi hyɛ̨rcähe ra Jesús nɛ bi ꞌyɛ̨nje:
―Hin da zä da ꞌyøzɛhɛ yʉ jąꞌi, pɛ nuꞌa Oją hingui hɛ̨mpꞌa da ꞌyørpa ʉ yʉ jąꞌi.
27 Nu ra Pedro bʉya bi ꞌyɛ̨mpꞌa ra Jesús:
―Gra Hmu, nugähe dá socähe gätho ꞌbɛꞌa mí pɛtsꞌähe nɛ dá tɛnꞌnahe , ꞌbɛꞌa maha ga tįmhbe ya.
28 Ra Jesús bʉya bi ꞌyɛ̨nje:
―Majuąni dí xi ahʉ, ꞌbʉ bin ja maꞌdaꞌyo mahɛ̨tsꞌi nɛ maꞌdaꞌyo ra ximhäi, din ja ma tsꞌɛdi mixte, ga hupʉ ja ma mɛxa ga øtꞌ ran tsꞌʉtꞌabi, nugä ngue dán jąꞌigä ua ja ra ximhäi. Nɛ ahʉ guí ꞌdɛꞌmayoho ahʉ, ꞌdarbʉ ga huhmbʉ, ga comhbʉ ma tsꞌɛdigä, nɛꞌahʉ ga juąnbahʉ ma mi israelhʉ dyʉ judíohʉ, bi ꞌyɛ̨ngähe ra Jesús.
29 Nɛ manꞌda bi man ra Jesús, bi ꞌyɛ̨na:
―Nuꞌa toꞌo bi zoh rá ngu, o gue rán ꞌyohʉ o gue rán ju, o gue rá ta o gue rá mbe, o gue rá xisu o gue yʉ́ tꞌʉhni bi zogui ngue bi dɛngui, o gue rá huąhi, da dąha manꞌda xʉn ngu xinda guetꞌa nꞌda ciɛnto nidi, nɛ a ra te maząi da hyąni, bi ꞌyɛ̨ngähe ra Jesús. 30 Pɛgue nuꞌʉ im bɛ̨ni i ꞌbɛtꞌo dim ꞌbɛjua ʉ. Pɛ nuꞌʉ tꞌɛ̨mbi i ꞌbɛjua, dim ꞌbɛtꞌo ʉ, bi ꞌyɛ̨ngähe ra Jesús.