Ra Jesús bi ma toꞌo xtán hɛ̨tsꞌi bʉ dán nu Oją
18
Nɛ xø dá änhde a ra Jesús:―Xiya, toꞌo manꞌda xʉn hɛ̨tsꞌi rán tꞌɛ̨di bʉ na hnu bʉ di manda rá tsꞌɛdi Oją, dá ɛ̨mfe.
―Majuąni dí xi ahʉ, ndeꞌbʉ gui päh ni mbʉihʉ gui cohmbʉ tenguꞌbʉ gyʉ tꞌʉhnihʉ, nuꞌbʉ hinꞌna hin gui sä gui cʉthʉ bʉ di manda rá tsꞌɛdi Oją ꞌbʉ, bi ꞌyɛ̨nje. 4 Nɛ nuꞌa toꞌo da gohi tenguꞌbʉ ra tꞌʉhni nɛ da ꞌyøtꞌe ngue hinꞌyʉ rá tsꞌɛdi, gueꞌa xtán hɛ̨tsꞌi rán tꞌɛ̨di bʉ na hnu bʉ di manda rá tsꞌɛdi Oją. 5 Nɛ nuꞌa toꞌo da numanho nꞌda ra tꞌʉhni nangue ma thuhugä, nam bøni bi zingä bʉya, bi ꞌyɛ̨ngähe ra Jesús.
Yʉn tꞌʉꞌtꞌate i ja ua
6 ―Pɛ nuꞌbʉ ꞌboꞌo di japi da ꞌue a nꞌda ra tꞌʉhni ngue i ɛ̨cꞌyɛigui, xʉn ʉtho ran ʉnbi da nu. Manꞌda xʉn ʉ xinda gueꞌbʉ da tꞌɛrpa ra dojʉni rá ꞌyʉga nɛ da thørpʉ ja ra dądehe, bi ꞌyɛ̨nꞌa ra Jesús.
7 ―Nhuɛ̨cate ahʉ nangue yʉm ꞌbɛpate xʉn ngu da tꞌøtꞌahʉ. Guehma gui nuhʉ ʉ, pɛ í huɛ̨hi maha toꞌo di ꞌbɛpꞌahʉ, bi ꞌyɛ̨na.
8 Pɛ nuꞌbʉ guí ɛ̨mhbʉ gueꞌa ni ꞌyɛhʉ o gue ni guahʉ di ꞌbɛpꞌahʉ gui ꞌyøthʉ ra tsꞌoqui, pɛ xʉn ho ꞌbʉ gui hyɛjʉ gui ꞌyɛmhbʉ bʉ yatho. Nguetho manꞌda xʉn ho ꞌbʉ dan ꞌdatho ni guahʉ o gue dan ꞌdatho ni ꞌyɛhʉ ꞌbʉ gá mba bʉ ja ra te maząi, xinda gueꞌbʉ di yoho ni ꞌyɛ o gue di yoho ni gua nɛ gui mba bʉ ja ra sibi njąmꞌbʉ da huɛ̨tꞌi. 9 Nɛ ngutho ꞌbʉ guí ɛ̨mhbʉ gueꞌa nꞌda ni dähʉ di ꞌbɛpꞌahʉ gui ꞌyøthʉ ra tsꞌoqui, pɛ xʉn ho ꞌbʉ gui hyąhmbʉ gui ꞌyɛmhbʉ bʉ yatho. Nguetho manꞌda xʉn ho ꞌbʉ dan ꞌdatho ni dähʉ ꞌbʉ gui cʉthʉ bʉ ja ra te maząi xinda gueꞌbʉ di yoho ni dähʉ nɛ gui mba bʉ ja ra sibi njąmꞌbʉ da huɛ̨tꞌi, bi ꞌyɛ̨nꞌa ra Jesús.
Ran tꞌuti nangue ra dɛꞌyo bim ꞌbɛdi
10 ―Dami jamansuhʉ a guí øthʉ. Hin gui ꞌyøthʉ tenguꞌbʉ nte di muui ʉ zicuɛ, nguetho dí xi ahʉ nu yʉ́m ꞌbɛhni Oją di jamansu ʉ, nɛ ząi i ꞌbʉpʉ ja rá hmi ma Ta bʉ mahɛ̨tsi ʉ yʉ́m ꞌbɛhni. 11 Nguetho nugä, ngue dán jąꞌigä ua ja ra ximhäi, bá ɛ̨cä ngue ga nyąnba yʉ́ te ʉ xøm ꞌbɛdi nangue yʉ tsꞌoqui, bi ꞌyɛ̨nꞌa ra Jesús.
12-13 ―ꞌBɛꞌa guím bɛ̨mhbʉ bi ꞌyøtꞌa nꞌda ran ꞌyohʉ ngue mí si nꞌda ciɛnto yʉ́ dɛꞌyo. Nɛ bim ꞌbɛ a nꞌda. Ha him bi hyonꞌa bim ꞌbɛdi. Pɛ bi zopʉ ʉ goho ꞌdäte ma ꞌdɛꞌma gʉto bʉ mi sapaxi ʉ, bi mba bi hyonꞌa bim ꞌbɛdi. Nɛ nuꞌbʉ mi dįni, manꞌda bin johya nangueꞌa, xinda gueꞌʉ miꞌda ngue him bim ꞌbɛdi. 14 In jabʉ ma Tahʉ bí ꞌbʉpʉ mahɛ̨tsꞌi, in ndepe xinga nꞌda dim ꞌbɛdi, madagueꞌa hin te di muui bʉ na hnu, bi ꞌyɛ̨nꞌa ra Jesús.
Nꞌda ran hocpi nangue yʉ ꞌyɛ̨cꞌyɛi
15 Nɛ manꞌda ram hma bi man ra Jesús, bi ꞌyɛ̨ngähe:
―Nuꞌbʉ nꞌda ni cuhʉ bʉ ja ram pɛti, ꞌbʉ hinga gueꞌa da ꞌyøtꞌe e, gui xi ꞌbʉ guí ꞌbʉsɛui, janangueꞌa da bądi hingui ho a bi ꞌyøtꞌe e, bi ꞌyɛ̨ngähe ra Jesús. Nɛ nuꞌbʉ bi ꞌyømanho a gui xifi, ya gá tąha gá hocpa rá mbʉi a ni cu. 16 Pɛ nuꞌbʉ hingui ʉrpa ra güɛnda a gá xifi, gui six manꞌda o gue mí yoho yʉ cu din testigo nangueꞌa guí mammi. 17 Pɛ nuꞌbʉ guextaꞌa him bi ꞌyʉrpathoho ra güɛnda a guí mammi mahønꞌa, gui mam bʉ ja ram pɛti bʉya. Nɛ nuꞌbʉ him bi ꞌyʉrpa ra güɛnda a ꞌbɛꞌa gá xihmbʉ bʉ, pɛgue gui ꞌyøthʉ tenguꞌbʉ hin ni cuhʉ a bʉya, bi ꞌyɛ̨ngähe ra Jesús.
18 ―Majuąni dí xi ahʉ, nu ꞌbɛꞌa guí ɛ̨mhbʉ hingui ho ua ja ra ximhäi, nɛpʉ mahɛ̨tsꞌi i tꞌɛ̨mbi hingui ho a. Nɛ ngutho a guí ɛ̨mfʉ xʉn ho, nɛpʉ mahɛ̨tsꞌi i tꞌɛ̨mbi xʉn ho a, bi ꞌyɛ̨ngähe ra Jesús.
19 ―Nɛ nuꞌbʉ guí yohmi ꞌbʉ nꞌdatꞌa guím bɛ̨mmi ꞌbʉ ja a guí ähui ma Tahʉ ꞌbʉpʉ mahɛ̨tsꞌi, nuꞌa di ꞌda aui a gá ꞌyähui. 20 Nguetho nuꞌbʉ dim pɛti nangue ma thuhugä ꞌda, madagueꞌbʉ yoho o gue hyu, pɛgue dí ꞌbä i nde bʉ, bi ꞌyɛ̨nꞌa ra Jesús.
21 Nɛ bi ꞌyänꞌna ra Pedro:
―Gra Hmu, xiꞌbʉ ja ꞌbɛꞌa da ꞌyørca nꞌda ra jąꞌi, hangu yʉ nidi ga punbi. Ha xøtꞌa yoto nidi, bi ꞌyɛ̨nꞌa ra Pedro.
22 Bi dą a ra Jesús:
―Hinga høntꞌi yoto nidi, pɛ ndeꞌbʉ thocpa tho gui punbahʉ, bi ꞌyɛ̨nꞌa ra Jesús.
Nꞌda ran tꞌuti a him bi punba rá mimbɛfiui
23 ―Janangueꞌa dí xi ahʉ, nuꞌa nán tsꞌʉtꞌabi Oją, i øtꞌe tengu bi ꞌyøtꞌa nꞌda ra tsꞌʉtꞌabi ꞌbʉ mi ꞌyʉrpa ra güɛnda hangu in dupate yʉ́m fätsꞌihʉ. 24 Nɛ nuꞌbʉ mi nu rá søcuą, ꞌbexgue bi manda ba tsꞌi a nꞌda ngue min dupate yʉ millone thoho. 25 Pɛ nuꞌa ra jąꞌi, hinꞌyʉ ꞌbɛꞌa mi ja ngue xtán zä xtán gutꞌa min dupate. Nɛ nu ra tsꞌʉtꞌabi bʉya, mi nde xtá mbä a, nɛ yʉ́ tꞌʉhni, nɛ rá xisu mí ꞌbʉpʉ ja rá ngu, nɛ ꞌbɛꞌa gä mi pɛꞌtsꞌi, ngue da gutꞌa ndupate. 26 Nɛ nuꞌa ran ꞌyohʉ bʉya bin dąnyahmu nɛ ntsꞌɛdi bi ꞌyäp ra mate a rá hmu: “Gra hmu, tøcpi tsꞌʉ, jante tho ga jutꞌi i.” 27 Nu rá hmu bʉya bi huɛ̨cꞌa, nɛ bi punba a rán dupate nɛ bi thøh pʉya. 28 Pɛ nuꞌbʉ mi nɛxpʉ, bin cꞌatꞌui nꞌda rá mimbɛfiui xí hmitꞌi tsꞌʉ ra mbɛti. Nuꞌa xí mba ma thøgue bʉya, ꞌbexgue bim bɛntꞌąte, bi bɛndba rá ꞌyʉga a bin cꞌatꞌui, nɛ bi ꞌyɛ̨mbi: “Curca a ma mbɛti guí tuc ya,” bi ꞌyɛ̨mbi. 29 Nɛ nuꞌa rá mimbɛfiui bʉya bin dąnyahmu nɛ ntsꞌɛdi bi ꞌyäp rá mate, bi ꞌyɛ̨mbi: “Tøcpi tsꞌʉ, jante tho ga jutꞌi i,” bi ꞌyɛ̨mbi. 30 Pɛ nuꞌa xí mba ma punbi him bi døꞌmi, bi gotꞌa fädi, ɛ̨mbi din ofädi jagueꞌbʉ da gutꞌa in dupate. 31 Nɛ nu yʉ́ mimbɛfiui bʉya ɛ̨mmɛ bi bɛ̨ndumbʉi ꞌbɛꞌa bi ꞌyøtꞌa xí mba ma punbi, nɛ bi mba bi xi a rá hmu ꞌbɛꞌa bi ꞌyøtꞌa. 32 Nu yʉ́ hmu bʉya bi manda bá tsꞌi a ran ꞌyohʉ mahønꞌa nɛ bi ꞌyɛ̨mbi: “Gra tsꞌomꞌbäi, nugä dá punꞌni i ꞌbʉ gmí ꞌyäc ra mate, madagueꞌa xʉn ngu guí tuqui. 33 Ndeꞌbʉ nɛꞌe xquí huɛ̨cꞌa ni mimbɛfiui,” bi ꞌyɛ̨nꞌa rá hmu. 34 Ɛ̨mmɛ bin cuɛ a rá hmu, bi manda da jotꞌi gueꞌbʉ go bi gutꞌa gätho yʉ millone min dupatesɛ, bi ꞌyɛ̨nꞌa ra Jesús, ꞌbʉ mi man a ran tꞌuti.
35 Din jabʉ da ꞌyøtꞌahʉ ma Tahʉ ꞌbʉpʉ mahɛ̨tsꞌi ꞌbʉ hin gui punbahʉ ni mijąꞌihʉ ngue gätho ni mbʉihʉ, bi ꞌyɛ̨ngähe ra Jesús.