Nꞌda ran tꞌuti bi ꞌyøtꞌ ra Jesús
17
Nɛ nuꞌbʉ mi tho i ꞌdato pa nu ra Jesús bi zix ra Pedro nɛ ra Jacobo nɛ ra Xuua, rán ꞌyohʉ ra Jacobo, nɛ bi mbähä bʉ ja ra tꞌøhø. 2 Nɛ nuꞌbʉ mí zøm bʉ, bim päꞌa ra Jesús. Nu rá hmi bi hyätꞌi tenguꞌbʉ ra hyadi, nɛ nu rá he bi tꞌaxqui tenguꞌbʉ ran nɛqui. 3 Nɛ nuꞌʉ ma mixädihe min ꞌyohʉ, bi nu bi zøm bʉ ra Elías nɛ ra Moisés, bin yąhʉ ra Jesús.4 Nɛ nu ra Pedro bʉya bi ꞌyɛ̨mpꞌa ra Jesús:
―Gra Hmu, xʉn ho ngue dí ꞌbʉhmbe ua, nɛ ga høcähe hyu yʉ tꞌʉngu. Nu nꞌda gam ꞌbʉsɛ, nu nꞌda dim ꞌbʉh ra Moisés, nɛ nuꞌa manꞌda dim ꞌbʉh ra Elías, bi ꞌyɛ̨nꞌa ra Pedro.
5 Pɛ nuꞌbʉ mí yą ra Pedro, bi nɛqui nꞌda ra güi di fɛxni, ngue bi goꞌbʉ, nɛ bi ꞌyøꞌa nꞌda ra nde bin yą bʉ ja ra güi: “Guehna ma Tsꞌʉntꞌʉgä na, ɛ̨mmɛ dídi huɛ̨cä na nɛ dí numanho. Dami ꞌyøhmbʉ ꞌbɛꞌa i xi ahʉ.” Gueꞌa bi manꞌa ra nde bi ꞌyøpʉ.
6 Nɛ nuꞌbʉ mí ꞌyø a ra nde ʉ ma mixädihe ꞌbex bin dąnyahmu bʉ häi nɛ bi nyetho nguetho bin su ʉ. 7 Nɛ nu ra Jesús bʉya bi mba bʉ mín dąnyahmu ʉ nɛ bi ꞌyɛ̨mbi:
―Dami ndanjʉ, o guín suhʉ.
8 Nɛ nuꞌbʉ mi ndøxꞌʉ bʉya njom bi nu, pɛ høntꞌa ra Jesús mí ꞌbäpʉ.
9 Nɛ nuꞌbʉ mam bá ɛ̨pʉ ꞌyu bʉ ja ra tꞌøhø bʉya, bi ꞌyɛ̨nꞌa ra Jesús:
―Nuya njon gui xihmbʉ ꞌbɛꞌa gá nuhʉ bʉ, jagueꞌbʉ dá thąmbɛ̨nigä bʉ ꞌbʉ ʉ xøn du, nugä ngue dán jąꞌigä ua ja ra ximhäi, bi tꞌɛ̨mpꞌʉ.
10 Nɛ nu ma mixädihe bʉya bi ꞌyänni:
―Hanja i ɛ̨nꞌʉ yʉ xänbate niją ngue mꞌbɛtꞌo thoho ba pencꞌa ra Elías, nɛ ja ba ɛ̨ꞌa rá Thahni Oją ngue ra Cristo bʉya, bi ꞌyɛ̨nꞌʉ.
11 ―Majuąni im ma ngue mꞌbɛtꞌo ba ɛ̨h ra Elías di hoqui gätho. 12 Pɛ dí xi ahʉ, ya bi zøh ra Elías nɛ njon bi bądi ngue gueꞌa. Pɛgue bi mba ma ʉnbi nɛ bi mba ma ʉcpi, nɛ ngutho da tꞌørcä ya, nugä ngue dán jąꞌigä ua ja ra ximhäi, bi ꞌyɛ̨nꞌa ra Jesús.
13 Ja bi bą ʉ ma mixädihe bʉya gue tenguꞌbʉ ra Elías a ra Xuua Nxixyą.
Nu ra Jesús bi hocꞌa nꞌda ra sändąte
14 Nɛ nuꞌbʉ mi zøm bʉ ꞌbʉh yʉ jąꞌi, bi zøm bʉ nꞌda ran ꞌyohʉ bʉ mí ꞌbäh ra Jesús, nɛ bi ꞌyɛ̨mbi:
15 ―Gra Hmu, dami ꞌyørqui tsꞌʉ ran huɛ̨cate a ma tsꞌʉntꞌʉ, jantꞌa thoho i sändąte nɛ hønbʉ go i so ꞌbʉ xø ꞌyagui. Jaꞌbʉ i so bʉ ja ra sibi, nɛ jaꞌbʉ i so bʉ ja ra dehe, hønbʉ go hapʉ ꞌyo ꞌbʉ xøn zändąte. 16 Nɛ bá sigä bʉ mi ꞌbʉ ʉ ni xädi, pɛ him bi zä bi hyącpa a ran ʉ in ꞌyoui, bi ꞌyɛ̨nꞌa ran ꞌyohʉ.
17 Nɛ bi ꞌyɛ̨nꞌa ra Jesús:
―Gyʉ tsꞌomꞌbäihʉ, hin guí ɛ̨cꞌyɛihʉ Oją xʉn ho. Hangu yʉ pa ga tøpꞌa thoho ahʉ ngue gui ꞌyɛ̨cꞌyɛigahʉ, bi ꞌyɛ̨nꞌa ra Jesús. Bá si ni tsꞌʉntꞌʉ guím ma, bi tꞌɛ̨mpꞌa ran ꞌyohʉ.
18 Nuꞌbʉ mi zøpʉ bʉya, nuꞌa ra Jesús bi zʉ a ra zįthu min ꞌyoui, nɛ bi xifi da bøni. ꞌBex bi yąnꞌa ra tsꞌʉntꞌʉ bʉya.
19 Mꞌbɛjua bʉya bin yąhʉ ʉ ma mixädihe a ra Jesús nubʉ dám ꞌbʉsɛhe.
―Hanja him bi zä dá høngähe thi a ra zįthu min ꞌyoui a ra tsꞌʉntꞌʉ, bi ꞌyɛ̨nꞌʉ.
20 Bi dą a ra Jesús nɛ bi ꞌyɛ̨na:
―Him bi zä gá hyømhbʉ thi ra zįthu, nguetho tsꞌʉtho guí ɛ̨cꞌyɛihʉ. Manꞌda zi tsꞌʉtho ni tꞌɛ̨cꞌyɛihʉ xinda gue nꞌda rá hmudä ra cꞌu ngue ɛ̨mmɛ zicuɛ. Nɛ nuꞌbʉ da zøni gui ꞌyɛ̨cꞌyɛihʉ tengu nꞌda rá hmudä ra cꞌu, da zä gui xihmbʉ nꞌda ra tꞌøhø: “Dami ꞌuegue gui thąn nʉ nꞌdanni,” gui ꞌyɛ̨mfʉ, nɛ da ꞌuegue. Hin te gui hyɛ̨mfʉ ꞌbʉ majuąni gui ꞌyɛ̨cꞌyɛihʉ. Gätho xʉn hɛ̨i i sä gui ꞌyøthʉ, bi ꞌyɛ̨nje. 21 Pɛ nuꞌʉ ꞌdaꞌʉ yʉ zįthu tengu min ꞌyoui a ra tsꞌʉntꞌʉ, xʉn hɛ̨i da hyøn a thi ʉ, pɛ høntꞌbʉ ɛ̨mmɛ hąh rá mbʉi din yąui Oją nɛ da ꞌyɛꞌtꞌ ran tsꞌihmɛ nꞌda, da zä da hyøn a thi ʉ, bi ꞌyɛ̨ngähe ra Jesús.
Ra Jesús bi ma mahønꞌa da tho nɛ da dąmbɛ̨ni
22-23 Nɛ nuꞌbʉ mán ꞌyohe bʉ ra häi Galilea, bi ꞌyɛ̨nje mahønꞌa a ra Jesús:
―Nugä ngue dán jąꞌigä ua ja ra ximhäi, dan dägä bʉ ꞌbʉh yʉ jąꞌi ngue da thogä. Pɛ ga thąmbɛ̨ni ꞌbʉ ná hyu pa, bi ꞌyɛ̨nꞌa ra Jesús. Nɛ ɛ̨mmɛ bi du ma mbʉigähe bʉya.
Nꞌda ran tꞌänni toꞌo i jut ra mbɛti nangue ra niją
24 Nɛ nuꞌbʉ má sømhbe bʉ ra hnini Capernaum a ra Jesús, bi tꞌɛ̨mpꞌa ra Pedro:
―Xi ni xänbatehʉ, ha hingui jutꞌa ra mbɛti dí hąxähe nangue ra niją, bi tꞌɛ̨mbi.
25 Bi dą a ra Pedro bʉya:
―Hąhą i jutꞌi, bi ꞌyɛ̨mpꞌʉ.
Nɛ nubʉya nuꞌbʉ mi yʉrpʉ ja ra ngu xín säya a ra Jesús, ꞌbex bi tꞌänꞌna ra Pedro:
―ꞌBɛꞌa guím bɛ̨ni gra Simón, ha nɛꞌʉ yʉ́ tꞌʉhni yʉ tsꞌʉtꞌabi i jutꞌa ra mbɛti ua ja ma häihʉ, uague høntꞌʉ yʉ jąꞌi thoho, bi ꞌyɛ̨nꞌa ra Jesús.
26 Bi dą a ra Pedro:
―Nuꞌʉ yʉ jąꞌi thoho.
―Janangueꞌa hin mán zähmaꞌbe ga jutꞌä ꞌbʉ hingui jutꞌʉ yʉ́ tꞌʉhni yʉ tsꞌʉtꞌabi, bi ꞌyɛ̨nꞌa ra Jesús.
27 ―Pɛ ni mba bʉ ja ra dądehe, gui hyʉꞌtsꞌa nꞌda ra huą, nɛ gui xemba rá nde. Gui tįm bʉ nꞌda ra mbɛti, ngueꞌa xøtꞌa ga jutꞌui a ra cota a ra niją, nꞌdahma hin da bɛ̨manꞌʉ ʉ i hąx ra mbɛti, bi ꞌyɛ̨nꞌa ra Jesús.