Yʉ́ ngʉrpi yʉ judío bi ꞌyäh miꞌda yʉ hmɛpya
16
Nɛ nuꞌbʉ ma sømhbe bʉ, bi zøm bʉ ꞌda ma ngʉrpihe ngue yʉ fariseo nɛ yʉ saduceo, in nde da zäp rá mbʉi a ra Jesús, bi ꞌyɛ̨mbi:―ꞌYurcahe nꞌda ra hmɛpya ngue ga pąhmbe majuąni Oją bá pɛnꞌni i, bi ꞌyɛ̨nꞌʉ.
2 ―Pɛ nuꞌehʉ, bi ꞌyɛ̨nꞌa ra Jesús, guí nuhʉ xʉn thɛni yʉ güi ꞌbʉ xøn de nɛ guí ɛ̨mhbʉ bʉya ngue din hyadi ꞌbʉ bi hyatsꞌi. 3 Nɛ nuꞌbʉ guí nuhʉ tsꞌʉtho xʉn thɛni yʉ güi ꞌbʉ xudi, guí ɛ̨mhbʉ din dąꞌye bʉya. Ɛ̨mmɛ guidí yorpahʉ a guím bɛ̨mhbʉ. Hanja ngue guí pąhmbʉ ꞌbɛꞌa nam bønꞌʉ yʉ güi guí nuhʉ nɛ hin go guí pąhmbʉ ꞌbɛꞌa nam bøn yʉ hmɛpya guí nuhʉ ya, bi ꞌyɛ̨nꞌa ra Jesús. 4 Nu ahʉ guí ꞌbʉhmbʉ ya, gue ahʉ gyʉ tsꞌomꞌbäihʉ, xcá ꞌuehmbʉ bʉ rá ꞌyu Oją, nɛ sä guí ähmbʉ ra hmɛpya ya pɛ hin da tꞌutꞌahʉ ra hmɛpya. Pɛ høntꞌa ra hmɛpya da tꞌutꞌahʉ tengu bi ꞌyøtꞌa ra Jonás mayaꞌbʉ, bi ꞌyɛ̨nꞌa ra Jesús bi ꞌyɛ̨mpꞌʉ yʉ fariseo. Nɛ xø dá mbäcähe a ra Jesús bʉya.
Ra Jesús bi xih yʉ́ xädi di jamansu nangue rá íxi yʉ fariseo
5 Nɛ nubʉya dá penje mahønꞌa ꞌdanguadi ra dądehe a ra Jesús. Nɛ dá pumbɛ̨nihe a ra hmɛ nząi mí sihe ngue min ꞌyoui ra íxi. 6 Nu ra Jesús bʉya bi ꞌyɛ̨ngähe:
―Damim fähmbʉ nangue yʉ́ íxi yʉ fariseo nɛ yʉ saduceo, bi ꞌyɛ̨na.
7 Nɛ dá ɛ̨nsɛhe:
―I man na ya ngue him bá hąhʉ ra hmɛ.
8 Nɛ nu ra Jesús bi bądi ꞌbɛꞌa dá bɛ̨mhbe nɛ bi ꞌyɛ̨nje:
―Hanja guí ɛ̨mhbʉ: “Hinꞌyʉ ra hmɛ ga sihʉ.” Pɛ tsꞌʉtho guí ɛ̨cꞌyɛihʉ. 9 Ha gá pumbɛ̨nihʉ ꞌbʉ má ꞌuįngä goho mahuąhi yʉn ꞌyohʉ ngue høntꞌi yoto yʉ hmɛ nɛ yoho yʉ tꞌʉhuą, nɛ bi bong thoho yoto yʉ ꞌbøtsꞌe yʉ hmɛ. 10 Nɛꞌbʉ má ꞌuįnꞌi cʉtꞌa mahuąhi yʉn ꞌyohʉ ngue høntꞌi cʉtꞌa yʉ hmɛ mi ja, nɛ xʉn ngu yʉ ꞌbøtsꞌe bi yu ꞌbʉ mi bongui. 11 Hanja hin gá pąhmbʉ ꞌbʉ má xi ahʉ nangue yʉ́ íxi yʉ fariseo nɛ yʉ saduceo, pɛ hin nangue ʉ yʉ hmɛ dá xi ahʉ, bi ꞌyɛ̨ngähe.
12 Ja dá pąhmbe bʉya ꞌbɛꞌa nam bønꞌa bi xije ra Jesús. Dá pąhmbe ngue gueꞌa yʉ́n xädi yʉ fariseo nɛ yʉ saduceo, nɛ hinga gueꞌa njuąntho ra íxi bi ma.
Ra Pedro bi ma toꞌo a ra Jesús
13 Nɛ nubʉya dá mbähmbe ra Jesús bʉ ra xɛqui Cesarea, guepʉ min tsꞌʉtꞌabi ra Felipe. Nɛ bi ꞌyängahe dyʉ xädigähe ra Jesús:
―ꞌBɛꞌa im bɛ̨nꞌʉ yʉ jąꞌi ngue toꞌogä, ngue guecä dán jąꞌigä ua ja ra ximhäi, bi ꞌyɛ̨na.
14 Dá thąthe bʉya:
―Nuꞌʉ ꞌda yʉ jąꞌi im bɛ̨ni gueꞌe gra Xuua Nxixyą, nɛ nuꞌʉ ꞌda im bɛ̨ni ngue gueꞌe gra Elías mi ꞌbʉh mayaꞌbʉ. Nɛ nuꞌʉ ꞌda im bɛ̨ni gueꞌe grá Jeremías ngue mayaꞌbʉ xøn du, uague manꞌda rá pøngahyą Oją, i ɛ̨nꞌʉ, dá ɛ̨mfe bʉya.
15 Nu ra Jesús bʉya bi ꞌyängähe:
―Xiꞌahʉ, ꞌbɛꞌa guím bɛ̨mhbʉ ngue toꞌogä.
16 Ra Simón Pedro bʉya bi dąti:
―Gueꞌe rá thahni i Oją ngue ra Cristo, rá Tsꞌʉntꞌʉ i Oją i ꞌbʉi.
17 Ra Jesús bi ꞌyɛ̨mbi:
―Mająpi i gra Simón, rá tsꞌʉntꞌʉ i ra Jonás, nguetho nuꞌa gá ma hinga nꞌda ra jąꞌi bi bɛ̨nꞌni i, pɛgue Oją ma Ta bí ꞌbʉh mahɛ̨tsꞌi bi bɛ̨nꞌni i. 18 Pɛ nɛꞌa dí xi i, nuꞌi gra Pedro, nuꞌa ni thuhu nam bøni gue ra do. Nguetho tengu ꞌbʉ da gueꞌe gra dongu guepʉ dí mbʉh rán ngu Oją, nangueꞌe ga dʉꞌmä ga pɛtꞌʉ da ꞌyɛ̨cꞌyɛigui. Nɛ hinꞌyʉ ꞌbɛꞌa da zä di jua ʉ, xíng ran dąte, bi ꞌyɛ̨nꞌa ra Jesús. 19 Nɛ ga ꞌda a nꞌda nin tꞌɛ̨di ngue gui xih yʉ jąꞌi ꞌbɛpʉ dí yʉtꞌa nꞌda bʉ di manda Oją. Tenguꞌbʉ ga ꞌda a nꞌda ran sogui ngue gui xocpʉ di manda rá tsꞌɛdi Oją. Nɛ nuꞌa gui ꞌyɛ̨mbi hingui ho ua ja ra ximhäi, nɛpʉ mahɛ̨tsꞌi da tꞌɛ̨mbi hingui ho a. Nɛ ngutho a gui ꞌyɛ̨mbi xʉn ho, nɛpʉ mahɛ̨tsꞌi da tꞌɛ̨mbi xʉn ho a, bi ꞌyɛ̨nꞌa ra Jesús.
20 Pɛ nubʉya, nu ra Jesús bi hɛgähe hin ga mamhbe bʉ ꞌbʉh yʉ jąꞌi ngue guesɛ a rá Thahni Oją, ngue ra Cristo.
Ra Jesús bi ma da tho nɛ da dąmbɛ̨ni
21 Nɛ nuꞌa ra pa a, bi dʉꞌmi bi xije jatho da mba bʉ Jerusalén di ʉnba bʉ ʉ ma ngʉrpihe, ngue yʉ dącꞌyɛi nɛ yʉ mbäją nɛ yʉ xänbate niją. Nɛ bi xije da tho nɛ da dąmbɛ̨ni ꞌbʉ ná hyupa. 22 Nɛ nubʉya bi zixpʉ maꞌueni a ra Pedro nɛ bi zʉi, bi ꞌyɛ̨mbi:
―O guidí japi da bɛntꞌi i, damin yąni, bi tꞌɛ̨mpꞌa ra Jesús, bi ꞌyɛ̨nꞌa ra Pedro.
23 Nɛ bi dąꞌa ra Jesús:
―Dami pøni gra zįthu. Ní mba, nguetho guí ɛ̨ngui hin ga øtꞌä a bi zän Oją. Hinꞌyʉ nin ꞌyomfɛ̨ni tengu im bɛ̨n Oją, pɛ høntꞌa im bɛ̨n yʉ jąꞌi guím bɛ̨ni, bi ꞌyɛ̨nꞌa ra Jesús, bi tꞌɛ̨mpꞌa ra Pedro.
24 Nɛ nubʉya, bi ꞌyɛ̨ngähe:
―Pɛ toꞌo gätho in nde da dɛngui i jatho hin da bɛ̨nꞌa rá pähä zɛhɛ nɛ da hyät yʉn ʉnbi madagueꞌbʉ da tho. 25 Nguetho nuꞌa toꞌo di huɛ̨czɛhɛ rá te, da mba ma ʉnbi rá te bʉ ja ran dąte, pɛ nuꞌa toꞌo hingui su da thącpa rá te nanguecä, da dįnꞌa ra te maząi a. 26 Pɛ nuꞌbʉ nꞌda ra jąꞌi, madague da ꞌyøtꞌe rá mbɛti ꞌbɛꞌa gätho i ja ua ja ra ximhäi, pɛ nte ní mbatho ꞌbʉ him bi pøh rá te. Nguetho njoꞌo nꞌda ra jąꞌi da zä da guzɛhɛ rá te, bi ꞌyɛ̨nꞌa ra Jesús. 27 Nguetho nugä ngue dán jąꞌigä ua ja ra ximhäi, nɛ din jagä rá tsꞌɛdi ma Ta bʉ mahɛ̨tsꞌi ꞌbʉ bá pengä mahønꞌa, nɛ gätho yʉ́m ꞌbɛhni ban ꞌyohe ꞌbʉ bá ɛ̨cä. Nɛ i ja ꞌbɛꞌa ga undä nangue ꞌbɛꞌa bi ꞌyøtꞌa nꞌda ngu nꞌda yʉ jąꞌi. 28 Majuąni dí xi ahʉ, hinga gä gní tuhʉ ꞌbʉ bi dʉꞌmi di manda ma tsꞌɛdi ua, guecä dán jąꞌigä ua ja ra ximhäi, bi ꞌyɛ̨ngähe ra Jesús.