Ra Jesús bi ma ꞌbɛꞌa di tsꞌonba rá mbʉi nꞌda
15
Nɛ nubʉya bá ɛ̨ i ꞌda ma ngʉrpihe ngue yʉ fariseo nɛ yʉ xänbate niją. Bá nɛxpʉ Jerusalén ʉ, nɛ bi ꞌyänꞌna ra Jesús:2 ―Hanja ʉ ni xädi hingui tɛn yʉ́n tꞌøtꞌe mam bombøtahʉ nɛ him ꞌbɛ i xʉtꞌyɛ ꞌbʉ i sihmɛ, bi ꞌyɛ̨nꞌʉ.
3 Bi dą a ra Jesús nɛ bi ꞌyɛ̨mbi:
―Pɛ nɛ ahʉ guí fɛsthohohʉ rán tꞌɛ̨di Oją ꞌbʉ guí homhbʉ gui ꞌyøtꞌ nin tꞌøtꞌe zɛhɛhʉ, bi tꞌɛ̨mpꞌʉ yʉ fariseo. 4 Nguetho i mam bʉ ja rám hman Oją: “Gui numansu ni ta nɛ ni mbe.” Nɛ a i mam bʉ ngue: “Nuꞌa toꞌo san rá ta nɛ rá mbe i jatho da tho,” bi ꞌyɛ̨nꞌa ra Jesús. 5 Pɛ nu ahʉ, ꞌdanꞌyo thoho guí mamhbʉ, ngue guí ɛ̨mhbʉ xʉn ho ꞌbʉ di yąrpa Oją a mi ja ngue xtá mbäxꞌa rá mbe o gue rá ta nꞌda ran ꞌyohʉ. Nɛ hin gá xihmbʉ ngue him bi numansu rá ta ꞌbʉ ngubʉ bi ꞌyøtꞌe. 6 Gá ꞌyɛ̨mhbʉ nte ní mba tho yʉ́n tꞌɛ̨di Oją ꞌbʉ guím bɛ̨nsɛ nin tꞌɛ̨dihʉ, bi ꞌyɛ̨nꞌa ra Jesús, bi tꞌɛ̨mpꞌʉ yʉ fariseo. 7 Pɛ ɛ̨mmɛ guidí yorpahʉ a guím bɛ̨mhbʉ, bi ꞌyɛ̨mpꞌa ra Jesús. Majuąni bi man Oją bʉ ja rá søcuą ra Isaías ꞌbɛꞌa guí øthʉ ngue bi ꞌyɛ̨na:
8 Nuya yʉ jąꞌi ya i ɛ̨squi nangue yʉ́ nde,
pɛ maxøtsꞌe thoho nɛ hinga gätho yʉ́ mbʉi.
9 Nɛ säti thoho ꞌbʉ i thąndegui,
nguetho høntꞌʉ yʉ́n tꞌɛ̨di zɛhɛ i xänba ʉ miꞌda,
i ɛ̨n Oją, bi ꞌyɛ̨nꞌa ra Isaías ꞌbʉ mayaꞌbʉ, bi ꞌyɛ̨nꞌa ra Jesús.
10 Nɛ nubʉya, nu ra Jesús bi zonꞌdʉ yʉ jąꞌi:
―Dami ꞌyøhmbʉ ꞌbɛꞌa dí xi ahʉ janangueꞌa gui pąhmbʉ ꞌbɛꞌa nam bønꞌa. 11 Hinga gueꞌa i tsꞌi di tsꞌonba rá mbʉi nꞌda, pɛ gueꞌa ní bøm bʉ rá nde nꞌda, bi ꞌyɛ̨nꞌa ra Jesús.
12 Nɛ dá mbähmbe bʉ mi ꞌbäh ra Jesús.
―Nuꞌʉ yʉ fariseo bi bɛ̨manꞌʉ a gám ma, dá ɛ̨mfe.
13 Nɛ bi dąh ra Jesús, bi ꞌyɛ̨na:
―Høntꞌa go ꞌbɛꞌa ma paxi him bi ꞌyɛ̨zɛhɛ ma Ta, i jatho da mba nsatꞌi. 14 Nte guim bɛ̨mhbʉ nangue ʉ nguetho tenguꞌbʉ i xädä ʉ, nɛ ɛ̨na da ꞌyutꞌ ra ꞌyu yʉ́ mixädähʉ. Nɛ nuꞌbʉ nꞌda ra xädä i sixꞌa rá mixädäui, thąmbɛ̨ni tho gätho yoho da zo bʉ ja nꞌda ra hyąhäi, bi ꞌyɛ̨ngähe ra Jesús ꞌbʉ má ɛ̨mfe.
15 Nu ra Pedro bʉya bi xi a ra Jesús:
―Dami xije nangue a ran tꞌuti gá ma mahɛ̨ꞌbʉ, ꞌbɛꞌa nam bønꞌa, bi ꞌyɛ̨mbi.
16 Nɛ bi dąꞌa ra Jesús:
―Ha nɛ ahʉ xíngui tsꞌʉ guí pąhmbʉ ꞌbɛꞌa nam bønꞌa dí xi ahʉ, bi ꞌyɛ̨na. 17 Ha hin guí pąhmbʉ nu ꞌbɛꞌa da zi nꞌda, da yʉrpʉ ja rá nde nɛ da mba bʉ ja rá foho, nɛ hingui ząm bʉ, bi ꞌyɛ̨ngähe. 18 Pɛ nu ꞌbɛꞌa gätho da bøn bʉ ja rá nde nꞌda í nɛxpʉ rá mbʉi nɛ gueꞌa di tsꞌonꞌa nꞌda. 19 Nguetho guepʉ mbo rá mbʉi nꞌda ni nɛxꞌʉ yʉ tsꞌonꞌyomfɛ̨ni, ran thodu, ran ꞌyomtꞌɛ̨ni madagueꞌbʉ bin thątꞌa nꞌda o hin gana din thąti, nɛ yʉm fɛ̨, nɛ yʉ fɛhni, nɛ yʉn tsꞌante, nɛ gueꞌʉ gätho ní nɛxpʉ rá mbʉi nꞌda ʉ. 20 Nɛ gätho ʉ gueꞌʉ ní tsꞌomꞌbäi nꞌda ra jąꞌi ʉ. Pɛ nuꞌbʉ bin sihmɛ nɛ him bi ꞌyøtꞌa ran tꞌøtꞌe ngue din xʉtꞌyɛ, hinga gueꞌa dán tsꞌonꞌa, bi ꞌyɛ̨ngähe ra Jesús.
Nꞌda ra xisu hin rá mɛnguhʉ a ra Jesús bi ꞌyɛ̨cꞌyɛi a rá tsꞌɛdi nɛ bi yąnꞌa rá tꞌįxu
21 Nɛ nubʉya dá pømhbe bʉ a ra Jesús dá mbähmbe bʉ ja rá xɛqui ra hnini Tiro nɛ ra hnini Sidón. 22 Nɛ dán cꞌathe nꞌda ra xisu ra mɛngu Canaan, hing ra israel a. Nɛ tsꞌɛdi bi mbafi, bi ꞌyɛ̨mpꞌa ra Jesús:
―Gra Hmu, rám bomꞌbɛto i ra David, din ja nin huɛ̨cate nangue ma tꞌįxu in ꞌyoui nꞌda ra zįthu ngue ɛ̨mmɛ di ʉnbi.
23 Nu ra Jesús bi thotho, tenguꞌbʉ him bi ꞌyø a bi xifi. Nugähe bʉya dá xihmbe ra Jesús:
―Dami ꞌyørpa ra mate a ra xisu, janangueꞌa da mbengui, nɛ i mbafi i tɛngahʉ.
24 Nu ra Jesús bʉya bi ꞌyɛ̨na:
―Nu Oją bá pɛngui ga ørpa rá ꞌbɛfi ngue høntꞌʉ ma mɛnguhʉ yʉ israel ga jamansu, nguetho i ꞌbʉi tengu yʉ dɛꞌyo bi ꞌbɛh ra ꞌyu, bi ꞌyɛ̨na.
25 Pɛ nu ra xisu bi zøm bʉ ꞌbäh ra Jesús bin dąnyahmu nɛ bi ꞌyɛ̨mbi:
―Gra Hmu, dami zɛqui.
26 Pɛ nu ra Jesús bi ꞌyɛ̨mbi:
―Hingui ho ꞌbʉ nꞌda ran ꞌyohʉ da hyąnba rá hmɛ yʉ́ tꞌʉhni, go di unꞌdʉ yʉ tꞌʉꞌyo, bi ꞌyɛ̨mbi.
―Majuąni guím ma gra Hmu, pɛ nɛꞌʉ yʉ tꞌʉꞌyo i si yʉ xɛca hmɛ ꞌbom bʉ ja ra ꞌbimɛxa ngue i hɛ ʉ yʉ́ hmu.
28 Ra Jesús bʉya bi ꞌyɛ̨mpꞌa ra xisu:
―Gra xisu, ɛ̨mmɛ guí ɛ̨cꞌyɛi xʉn ho a ma mate. Janangueꞌa din ja a gá ꞌyädi, bi ꞌyɛ̨mbi.
Nɛ ꞌbexgue gueꞌa ra ora bi yąnꞌa rá tꞌįxu.
Bi hoc miꞌda yʉ hyɛ̨nni a ra Jesús
29 Nɛ nubʉya nu ra Jesús bi bøm bʉ. Dá mbähmbe bʉ ja ra ndendądehe bʉ Galilea nɛ dá texhe bʉ ja ra nyuni, nɛ bi hyupʉ a ra Jesús. 30 Nɛ xʉn ngu yʉ jąꞌi bi zøm bʉ mi hudi, nɛ bá tsꞌinba yʉ dogua, nɛ yʉ xädä, nɛ yʉ gore, nɛ yʉ doꞌyɛ, nɛ xʉn ngu miꞌda yʉ mbɛdi nɛ yʉ hyɛ̨nni bá tsꞌinba bʉ mi huꞌa ra Jesús. Nɛ nu ra Jesús bʉya gätho bi hocꞌʉ. 31 Nɛ nu yʉ jąꞌi bi hyonya thoho ꞌbʉ mi nu bin yą yʉ gore nɛ bin ꞌyo ʉ mí dogua nɛ bi yąnꞌʉ mi doꞌyɛ, nɛ bin zø yʉ́ dä ʉ mi xädä. Nɛ nuꞌbʉ mi nu ꞌbɛꞌa bi ꞌyøtꞌa ra Jesús, bi ꞌyɛ̨spa Oją, ngue ma Ojąhe dyʉ israelhe. Nɛ hyu pa dán degähe bʉ yʉ jąꞌi.
Bi ꞌuįnꞌi goho mahuąhi yʉn ꞌyohʉ ra Jesús
32 Nɛ nu ra Jesús bi zongahe bi ꞌyɛ̨ngähe:
―Ɛ̨mmɛ dím bɛ̨ngä yʉ jąꞌi i ꞌbʉcua nguetho ya ná hyupa i ꞌbʉcua nɛ hinꞌyʉ ꞌbɛꞌa da zi yʉ. Nɛ nuꞌbʉ ga xifi da mba bʉ yʉ́ ngu, masque hin da hyätꞌi da zøm bʉ ja yʉ́ ngu, bi ꞌyɛ̨nꞌa ra Jesús.
33 Nɛ dá ɛ̨mhbe bʉya:
―Pɛ hin hapʉ ga tįmhbʉ ra hmɛ ga unhndʉ yʉ jąꞌi, nguetho ɛ̨mmɛ xʉn ngu i ꞌbʉcua, nɛ njongui ꞌbʉcua ngue ga tämfʉ ra hmɛ, dá ɛ̨mfe.
34 ―Hangu guí hąhʉ ra hmɛ thą, bi ꞌyɛ̨nꞌa ra Jesús.
―Yoto thoho yʉ hmɛ nɛ zi yoho yʉ tꞌʉhuą, dá ɛ̨mfe.
35 Nɛ nu ra Jesús bi xih yʉ jąꞌi din säya bʉ häi. 36 Nɛ bi hyąnꞌʉ yʉ hmɛ a ra Jesús nɛ yʉ huą, nɛ bi ꞌyäp rán jąpi Oją nangue ʉ bi hyąni. Nubʉya, nu ra Jesús bi xɛn yʉ hmɛ nɛ yʉ huą nɛ bi dargähe ngue ga unhde yʉ jąꞌi bʉ mí hudi. 37 Nɛ gätho ʉ mí ꞌbʉpʉ bin sihmɛ ʉ nɛ bin niyą, nɛ bi bongui yoto yʉ ꞌbøtsꞌe ꞌbʉ mi niyą. 38 Nɛ goho mahuąhi ʉ yʉn ꞌyohʉ bin sihmɛ, nɛ njom bi mbeh yʉ xisu nɛ yʉ tꞌʉhni. 39 Nɛ nu ra Jesús bʉya bi xih yʉ jąꞌi da mbeng yʉ́ ngu. Nɛ nuꞌbʉ mi mbeng yʉ jąꞌi bʉya dá mbähmbe mahønꞌa a ra Jesús, dá huhe ra mbosa mahønꞌa ngue ga sømhbe bʉ ra xɛqui Magdala.