Ra Xuua Nxixyą bi thɛcpa rá ꞌyʉga
14
Nɛ min tsꞌʉtꞌabi bʉ ra xɛqui Galilea a ra Herodes. Nɛ nuꞌbʉ mi sifi ꞌbɛꞌa gä bi ꞌyøtꞌa ra Jesús ꞌbʉ min ꞌyo bʉ, bi ꞌyɛ̨nꞌa:2 ―Masque ra Xuua Nxixyą a, bi dąmbɛ̨ni bʉ ꞌbʉ ʉ xʉn du, janangueꞌa i ja rá tsꞌɛdi xʉn ho i øtꞌ yʉn tꞌøtꞌe mixte, bi ꞌyɛ̨m bʉya.
3-5 Nguetho guesɛ a ra Herodes bi hyo a ra Xuua Nxixyą. Bin cuɛ a ra Herodes ꞌbʉ mi sifi ngue hingui ho a bi ꞌyøtꞌe ngue bi zinsɛ a rá ꞌbɛpo, nuꞌa ra xisu mi ꞌbʉhmi a ra Felipe ꞌbʉ mi sinꞌa ra Herodes. Nɛ nuꞌa ra xisu, ra Herodías a. Nɛ bi ꞌyɛ̨nꞌa ra Xuua: “Hingui ho gá ꞌyøtꞌe ngue gá sinba rá xisu a nin ꞌyohʉ,” bi tꞌɛ̨mpꞌa ra Herodes. Bin cuɛtho ra Herodes bʉya bi gotꞌa fädi a ra Xuua nɛ bi manda dí tuꞌtꞌi con yʉ cadena. Nɛ mim bɛ̨ni xta hyo a ra Xuua, pɛ him bi hyo nguetho mi su din cuɛ yʉ jąꞌi, ngue nu yʉ jąꞌi mi pądi rá pøngahyą Oją a ra Xuua. 6 Pɛ nuꞌbʉ mi zøn ra pa bin ja rá ngopa a ra Herodes ꞌbʉ mi dät ra jɛya mahønꞌa, bi ꞌyøtꞌa nꞌda ran tsꞌihmɛ nɛ bin nɛ a rá tꞌįxu a ra Herodías. Nɛ bi numanho a ra Herodes a ran hnɛi bi ꞌyøtꞌ bʉya. 7 Nɛ bi ꞌyɛ̨mpꞌa ra hmute: “Dami ꞌyädi ꞌbɛꞌa gätho guí nde gui ꞌyäqui. Majuąni dí xi i, ga ꞌda i ꞌbɛꞌa gätho gui ꞌyäqui,” bi ꞌyɛ̨nꞌa ra Herodes. 8 Nɛ nuꞌa ra hmute bʉya bi ꞌyä a rá yą ra Xuua Nxixyą ngue di o ra mbohi, nguetho gueꞌa xí xi a rá mbe a da ꞌyäpꞌa.
9 Nɛ bi du rá mbʉi a ra Herodes bʉya, him mi ndehma da hyo a ra Xuua, pɛ hinꞌyʉ ꞌbɛꞌa sä da ꞌyøtꞌe nguetho ya xí xifi di unni ꞌbɛꞌa gä da ꞌyäpi, nɛ ya xí ꞌyøh yʉ jąꞌi di unni ꞌbɛꞌa gätho da ꞌyäpi. 10 Nɛ bi manda bʉya ngue da mba ba thɛcpa rá yą ra Xuua Nxixyą bʉ ja ra fädi, nɛ ba jätꞌa nꞌda ra mbohi din tꞌunꞌna ra hmute. 11 Nɛ nuꞌbʉ min tꞌunni bi dɛn a ra mbohi bi unꞌna rá mbe bʉya.
12 Nɛ nu yʉ́ xädi ra Xuua bʉya, bá tunba a rá ngøcꞌyɛi bʉ ja ra fädi, bi ꞌyägui. Nɛ bi mba bʉya bá xi a ra Jesús ngue ya bi du ra Xuua.
Bi ꞌuįnꞌi cʉtꞌa mahuąhi yʉn ꞌyohʉ ra Jesús
13 Nɛ nu ra Jesús ꞌbʉ mí ꞌyøde bi du ra Xuua, ꞌbex dá mbähmbe dá huhe bʉ ja ra mbosa mí nde xcá sømhbe bʉ ꞌdanguadi, mi ɛ̨na xcám ꞌbʉsɛhe nꞌda zi ora. Pɛ nuꞌbʉ mi pą ʉ yʉ jąꞌi ngue dá mbähmbe bʉ a ra Jesús, nɛ ʉ bá nɛxpʉ ja yʉ́ hnini bi dɛngähe, bin ꞌyogua thoho gätho bʉ ja rá nyąni a ra dądehe. 14 Nɛ nuꞌbʉ má cąhmbe bʉ ja ra mbosa a ra Jesús, xʉn ngu ʉ yʉ jąꞌi xí zøm bʉ. Nɛ ɛ̨mmɛ bi huɛ̨cꞌʉ bʉya nɛ bi hoqui høntꞌa go toꞌo mí ʉ. 15 Nɛ nuꞌbʉ min de bʉya dá ɛ̨mbähe a ra Hmu:
―Ya bin de ya, nɛ njongui ꞌbʉcua ja ra xɛqui ua, dami xih yʉ jąꞌi da mba bʉ ja yʉ hnini nɛ da däm bʉ ꞌbɛꞌa da zi, dá ɛ̨mbähe a.
16 Nɛ bi ꞌyɛ̨nꞌa ra Jesús:
―Pɛ hingui jatho da mba, pɛ guesɛ ahʉ dami ꞌuįmhbʉ, bi ꞌyɛ̨ngähe.
17 Nɛ dá thąhmbe bʉya:
―Pɛ hinꞌyʉ ꞌbɛꞌa da zi, nɛ høntꞌi cʉtꞌa yʉ hmɛ i ja ua nɛ yoho yʉ huą, dá ɛ̨mfe bʉya.
18 ―Bá cʉhʉ ua, bi ꞌyɛ̨nꞌa ra Jesús.
19 Nɛ bi xih yʉ jąꞌi ngue din säya bʉ ja yʉ tꞌɛi, nɛ bi hyąn ʉ cʉtꞌa yʉ hmɛ nɛ yoho yʉ huą. Bi ndøsꞌ mahɛ̨tsꞌi nɛ bi ꞌyäp rán jąpi Oją, nɛ bi xɛm bʉya nɛ bi ꞌdacähe dá darpähe yʉ jąꞌi. 20 Gätho bin sihmɛ ʉ yʉ jąꞌi nɛ bin niyą nɛ bi bong miꞌda yʉ xɛqui bi yuꞌi ꞌdɛꞌma yoho yʉ ꞌbøtsꞌe. 21 Nɛ nuꞌʉ gätho bin sihmɛ í juaꞌi cʉtꞌa mahuąhi ʉ yʉn ꞌyohʉ, nɛ hin njon bi mbeh yʉ xisu xinga gue yʉ tꞌʉhni.
Bin ꞌyo maxøtsꞌe ra dądehe a ra Jesús
22 Nɛ nubʉya, bi xije ga mbähmbe ngue ga ꞌdaxhe ra dądehe mahønꞌa. Dá huhe a ra mbosa dá mbähmbe bʉya. Go bi gosɛ bʉ a ra Jesús, bin ꞌyɛ̨hmbʉ yʉ jąꞌi. 23 Nɛ nuꞌbʉ mi mba ʉ yʉ jąꞌi bi ndezɛhɛ bʉ ja ra nyuni nɛ bi nyąui bʉ Oją. Bá hazɛhɛ bʉ a. 24 Nɛ nuꞌbʉ má mbähmbe ngue dá huhe ra mbosa, ꞌbʉ mi zøm made ra dehe, bi zɛh ran dąhi nɛ ɛ̨mmɛ bin ja yʉ tꞌøthe, nɛ tsꞌɛdi midí cosꞌa ra mbosa. 25 Nɛ nuꞌbʉ ya mbɛ mí tsꞌʉtho da hyatsꞌi, nɛ ꞌyo a ra Jesús bʉ maxøtsꞌe ra dehe ngue da zʉꞌa ra mbosa. 26 Nɛ nuꞌbʉ mambá ɛ̨pʉ ra Jesús, nɛ i ꞌyo bʉ maxøtsꞌe ra dehe dá handähe bʉya, ba ɛ̨pʉ nɛ hin dí pąhmbe ngue gueꞌa. Ɛ̨mmɛ dán suhe nɛ dá mbahmbe:
―Ba ɛ̨hnʉ nꞌda ra ánima, dá ɛ̨mhbe.
27 Nɛ bi dąrcähe a ra Jesús:
―Dami hyuthʉ nzambʉi, o guín suhʉ, guecä, bi ꞌyɛ̨ngähe.
28 Nɛ bi dątꞌa ra Pedro bʉya:
―Nuꞌbʉ gueꞌe ma Hmu i, dami jaqui nɛcä dan ꞌyo maxøtsꞌe ra dehe nɛ ga søm bʉ guí ꞌbäi, bi ꞌyɛ̨nꞌa.
29 ―Ba ɛ̨cua, bi ꞌyɛ̨nꞌa ra Jesús, bi tꞌɛ̨mpꞌa ra Pedro bʉya.
Nɛ nuꞌa ra Pedro bʉya bi gąpʉ ja ra mbosa nɛ bi dʉꞌmi bin ꞌyo maxøtsꞌe ra dehe ngue in nde da zøm bʉ bí ꞌbä a ra Jesús. 30 Pɛ bi nu ngue ɛ̨mmɛ ntsꞌɛdi ran dąhi nɛ ꞌbex bin su bʉya, nɛ bi dʉꞌmi bi dontꞌa mbonthe. Nɛ ntsꞌɛdi bi mbah pʉya:
―Ma Hmu, dami yąngui, bi ꞌyɛ̨na.
31 Nɛ ꞌbex bi bɛndba rá ꞌyɛ a ra Jesús bʉya.
―Hanja tsꞌʉtho guí ɛ̨cꞌyɛi ngue i ja ma tsꞌɛdi nɛ ꞌbexgue gá su ꞌbɛꞌa gán nu, bi ꞌyɛ̨mpꞌa rá hmu.
32 Nɛ nuꞌbʉ mi hyu ra mbosa a ra Pedro nɛ ra Jesús bʉya, ꞌbex bin hɛ̨ a ran dąhi. 33 Nɛ nugähe mí huhmbe bʉ mbo ra mbosa dán dąnyahmuhe bʉ mí ꞌbä a ra Jesús nɛ dá ɛ̨mfe:
―Majuąni maha, gueꞌe rá Tsꞌʉntꞌʉ i Oją, dá ɛ̨mfe.
Bi hocꞌʉ yʉ hyɛ̨nni bʉ ra hnini Genesaret a ra Jesús
34 Nɛ dá thohmbe bʉya dá sømhbe bʉ ꞌdanguadi ra dehe bʉ mi ja ra xɛqui Genesaret. 35 Nɛ nuꞌʉ yʉ jąꞌi mi ꞌbʉpʉ, ꞌbʉ mi nu bi zøm bʉ ra Jesús, ꞌbexgue bi mbɛnh ra nde hønbʉ go hapʉ ja yʉ hnini ngue ya mí ꞌbʉpʉ ra Jesús. Nɛ bá tsꞌinbi gätho yʉ hyɛ̨nni bʉ mi ꞌbʉcähe a ra Jesús. 36 Nɛ bi ꞌyäh ra mate ʉ ngue bi därpa rá nyąni rá pahni ra Jesús, nɛ ꞌbex bi yąn ʉ bʉya.