Ajar barak supayak Timotius tuꞌuk-tuꞌuk nuk luvang polayanan ah
4
Ahkuk moletah kok nuk husuk Hotalak khavun Yesus Kristus, jok ahkan ngohakim paring ulun jok bolum khavun jok mahtoi, khavun jok ahkan lombut moletah korajaan-Ah: 2 Narung ah noh Auh Hotalak, siap sodiak noh pios yam pios ondo ah, motohtok ah noh inon jok salak, ngajar marak ah noh idoh kotului dosa-dosa doh. Umbak kosabar muk nuk luvang ajar barak jok hinut. 3 Kotului ahkan lombut ondo ah dolang ulun iyam duon doh nai nyonih ajar barak jok hinut. Holovik hinok idoh naꞌah dolang guruk palsu jok sosuai mbak kokanin arop doh. Yok erih dolang guruk jok ahkan marak aꞌang jok sosuai mbak kokanin doh kiyak. 4 Atak doh noh nuhtup tolingan doh, idoh iyam kanik nyonih ajar barak jok hinut. Totahpik idoh mosonih tolingai doh erih umbak dolang kolimoi. 5 Tahpik nguasak ah noh arop muk nuk luvang paring aꞌang, sabar kiyak noharep kojorak muk, nguai ah noh korejak muk ngajar Tarung Pios erih khavun nguai ah kak mbak pios paring polayanan muk.6 Mongenai arop kuk, huntuh was donik noh ohkot ah ahkuk mahtoi. Pomalus kuk kolo danum anggur jok konguih sobagai sonyurung jok tonongak noku Hotalak. 7 Ahkuk was lomba mbak pios, khavun docok noh nuk garih pongohpah ah. Ahkuk tehtap sotia mbak Kristus nyiring pongohpah komolum kuk 8 Khavun huntuh Tuhan uwas nyodiak mahkota jok hinut jok tonongak ahkak kuk beteng ondo polombut Ah. Iyok Hakim jok adil jok ahkan nyodiak mahkota erih ahkan paring ulun jok tuꞌuk-tuꞌuk ngindoi polumbut-Ah.
Pongohpah Tanjik
9 Ngimo-ngimos ah lombut noku ahkuk. 10 Ahkuk poduluk mbak ihkok Timotius, tului Demas was nohtah ahkuk khavun tulak noku Tesalonika, iyok ngurah kosenang duniak tuh. Totahpik Kreskes konguhtus kuk noku Galatia khavun Titus noku Dalmatia. a 11 Tihkas Lukas kiak jok mocon hicok mbak ahkuk. Tulak nai ngomin Markus khavun mangit iyok noku ahkuk homboh-homboh mbak ihkok, kotului iyok bogunak ahkak kuk khavun touk dohop korejak kuk. b 12 Ahkuk umbot nguhtus Tikhikus tulak noku Epesus. c 13 Ngindoi ihkok lombut, ngomiu ah noh jubah kuk jok arok nuk Troas nuk lohpo Karpus. Ngomiu ah noh kak buhkuk-buhkuk kuk. Jok paling peting buhkuk-buhkuk jok tonapak tahkan uhpak. d
14 Aleksander jok tuhkang nguan umat erih, iyok tumbuk nguan aꞌang jok paling jaek ahkak kuk. Tuhan ahkan ngohukum iyok numun jok konguai ah. e 15 Ihkok alah touk-touk mbak iyok tului iyok jok paling ngolavan ajar barak tok.
16 Beteng kuk nuk pongadilan marak arop kuk iyam salak, iyam arok icok behtik pun jok kanik dohop ahkuk. Totahpik idoh paring ah nohtah ahkuk. Ahkuk bodoa supayak Hotalak ngapun tobiat doh erih. 17 Totahpik Tuhan was jagak ahkuk khavun Iyok nongak kuk komuhat, sohinggak duok kuk ngajar mongenai Tarung Pios erih ahkan paring ulun jok iyam ulun Yahudi sohinggak idoh nyonih ah. Tuhan molahpas ahkuk tahkan bohayak jok touk munuk ahkuk. 18 Tuhan ahkan nyolamat ahkuk tahkan paring aꞌang jaek jok konguan ulun supayak ahkuk solahkak. Iyok ahkan ngomin ahkuk mbak solamat noku luvang Korajaan Ah nuk surga. Kongisung noh Iyok nyiring iyam arok tihkas nyamah ah! Amin.
Salam Pongohpah ah
19 Salam kuk ahkan Priskila, Akwila khavun ahkan koluarga Onesiforus. f 20 Nuk luvang ponyalan kai, Erastus mocon nuk Korintus, Trofimus poros khavun ihkai nohtah yok nuk Miletus supayak sonyahkang. g 21 Ngotiak ah noh noku ohtoi sojaham musim sorongin.
Salam tahkan Ebulus, Pudes, Linus, Klaudia khavun dolang ulun jok pocayak idoh motiang salam ahkan mik.
22 Timotius ahkuk bodoa nihak ngindoi Tuhan jagak komolum muk.
Kopion ahtoi-Ah jok punak hajok hicok humbak mbak ihkam paring ah.
Salam tahkan ahkuk, Paulus