बिहा भोज ची मिसाल
(लूका 14.15-24)
22
1 ईशु बल्ति वा मिशाला में किहुं लागला, 2 “स्वर्ग चा राज्य ओ राजा चे समान छै, जेह्णे आपणे पुता चे बिहा मां छेड़ा ङिला । 3 ते ओह्णे आपणे दासा नु भेजले छेड़ा ङिले आले बन्दा नु बिहा चे खाणे खाणे चे वास्ते हकारती आऔ; पर वा बन्दा ने ओठे कोह्नी आणे चाहले । 4 बल्ति ओह्णे नेरा दासा नु हा केहती कने भेजले, ‘छेड़ा ङिले आले बन्दा नु हा किहा, कि ङेखा, मैं खाणे तियार करती चुकला, माये आच्छे ते पड़ले आले पशु बाड़ले गेले, ते सारे कोच्छ तियार छै । बिहा चे खाणे मां आवा ।’ 5 पर बन्दा ने वांह्चे पे कुई ध्यान कोह्नी ङिला । वे ऊठु टुरती पले, कुई आपणे खेता मां काम करने चे वास्ते, ते कुई आपणे काम धन्धे सुनु । 6 पर नेरा बन्दा ने जको बचली आली हुती, ओह्चे दासा नु पकड़ती कने वानु कोटले, ते वानु मारती नाखले । 7 बल्ति राजे नु गुस्सा आला, ‘ते ओह्णे आपणी सैना भेजती कने वा हत्यारा चा नाश करला, ते वांह्चे नगरा नु फूंकती नाखले । 8 बल्ति ओह्णे आपणे दासा नु केहले, ‘बिहा चे खाणे ते तियार छै, पर जानु छैड़ा ङिला गेलता ला वे बन्दी ऐ लायक कोह्नी ठहरली । 9 ऐ वास्ते चौराहा पे जावा, ते जितनी बन्दी तम्हानु मिली, सारा नु बिहा चे खाणे मां हकारती आवा ।’ 10 वा दासा ने सड़का पे जती कने का बुरे, का भले, जितने मिड़ले, सारा नु भेले करले, ते बिहा चे घर मेहमाना लारे भरीती गेले ।11 “जिसे बेह्ले राजा मेहमाना नु ङेखणे चे वास्ते भीतर आला; ते ओह्णे ओठे हेक बन्दे नु ङेखले, जको बिहा ची ओढणी कोह्नी घाली भिलता । 12 ओह्णे ओकनु पुछले, ‘ओ यार, तु बिहा ची ओढणी घाले बेगेर इठे किवें आती गेला ?’ ओह्चे मुंह बन्द हुती गेले । 13 बल्ति राजे ने सेवका नु केहले, ‘ऐचे हाथ पग ब़ाथी कने ऐनू ब़ाहरु अन्धारे मां नाखती ङिहां, ओठे रोणे, ते ङांत पिसड़े हुवी ।’
14 “कांकि हकारले गेले तां ब़ोहत पर चुणले आले थोड़े छी ।”
रोमी राजे चा कर चुकावणे
(मरकुस 12.13-17; लूका 20.20-26)
15 बल्ति फरीसिया ने जती कने आपस मां हा विचार करला, कि ईशु नु किसे तरीके लारे ऐचीया खौद चा केहलिया आलिया बाता मां किवें फंसाऊ । 16 ते फरीसिया ने आपणे चेला नु हेरोदियों चे लारे, ईशु चे गोढु हा कहणे वास्ते भेजले कि, “ओ गुरु, अम्ही जाणु कि तु सच्चा छी, ते नरीकारा चा रस्ता सच्चाई लारे सिखावी, ते काई वी परवा ना करी, कांकि तु बन्दा चे मुंह ङेखती कने बाता ना करी । 17 ऐ वास्ते अम्हानु बावड़ तु का समझी ? रोम चे राजे कैसर नु कर ङेणा ठीक छै के कोह्नी ?”
18 ईशु ने वांह्ची हा चाल जाणती कने केहले, “ओ कपटी! ते हठीली बन्दी, मनु का परखा पली ? 19 ‘कर ङेणे चा सिक्का मनु ङिखाणा ।” बल्ति वाह्णे हेक चांन्दी चा सिक्का ओह्नु ङिला । 20 ईशु ने वाकनु पुछले, “हा मोहर ते नाम काये छै ?”
21 वाह्णे ओह्नु केहले, “कैसर चे ।”
बल्ति ओह्णे, वानु केहले, “जको कैसर चे छै, ऊ कैसर नु ङिहां । जको नरीकारा चे छै, ऊ नरीकारा नु ङिहां ।”
22 ईं सुणती कने वानु अचम्भा हुती गेला, ते ओह्नु छोड़ती कने चाहले गेले ।
सदूकिया ची चाल
(मर. 12.18-27; लूका 20.27-40)
23 ओही ङियो सदूकी जको हा किही कि, मेला आला चे जीते होणे छे ही कोह्नी ओह्चे गोढु आले । ओकनु पुछु लागले, 24 “कि ओ गुरु, मूसा ने केहले हुते, कि अगर कुई बिना ऊलादी चे मरती जाऐ, ते ओह्चा भऊ ओची राङे लारे बिहा करती कने आपणे भावा चे वास्ते ऊलाद पैदा करो । 25 इठे अम्चे सात भऊ रेहेते; पहला बिहा करती कने मरती गेला; ते ऊलाद ना होणे चे कारण आपणी राङी नु आपणे भावा चे वास्ते छोड़ती ङिले । 26 जुही ङुजे ने ते तींजे ने वी जुही करले, ते साता भावा तक जुही हुले । 27 सारा चे बाद वा अस्त्री वी मरती गेली । 28 कांकि वा सारा ची राङ हुती चुकली हुती, तां जिते होणे पे वा साता मु काई राङ हुवी ?”
29 पर ईशु ने वानु जवाब ङिला, “कि तम्ही पवित्र शास्त्र ते नरीकारा ची सामर्थ नु ना जाणा, ऐही वजह कनु तम्ही भुल मां पड़ती गेले । 30 कांकि जिते होणे पे बिहा नी हुवी, पर वे स्वर्गा मां नरीकारा चे स्वर्गदूता रोक हुवे । 31 पर मेला आला चे जीते होणे चे बारे मां हा वचन तम्ही कोह्नी पढ़ला जको नरीकारा ने तम्हानु केहले, 32 ‘कि मैं अब्राहम चा नरीकार, ते इसहाक चा नरीकार, ते याकूब चा नरीकार छै’ ? ओ तां मेला आला चा कोह्नी, पर जिता चा नरीकार छै ।”
33 हा सुणती कने बन्दी ओह्चे वचना कनु हैरान हुती गेली ।
सारामु बङा हुक्म
(मर.12.28-34; लूका 10.25-28)
34 जिसे बेह्ले फरीसिया ने हा सुणले, कि ईशु ने सदूकिया ची ब़ोलती बन्द करती नाखली, तां वे भेले हुले । 35 ते वांह्चे महू हेके ने जको व्यवस्था नु सिखाणे आले ने ईशु नु परखणे चे वास्ते ओकनु पुछले । 36 “ओ गुरु, व्यवस्था मां किसा हुक्म बङा छै ?”
37 ईशु ने वानु केहले, “तु प्रभु आपणे नरीकार नु आपणे सारे मन लारे, ते सारे प्राण लारे, ते आपणी सारी समझ लारे प्यार राख । 38 बङा ते खास हुक्म हाओ ही छै । 39 ते विचे ही समान हेक नेरा वी हुक्म छै, ‘कि तु आपणे पड़ोसिया चे लारे आपणे समान प्यार राख ।’ 40 मुसा ची सारी व्यवस्था ते भविष्यवक्ता ची किताब या ङुहु हुक्मा पे ही टिकली आली छै ।’ ”
दाऊद चे पुता चे बारे मां सवाल
(मर. 12.35-37; लूका 20.41-44)
41 जिसे बेह्ले फरीसी भेले हुले भिलते, ते ईशु ने वाकनु पुछले । 42 कि “मसीह चे बारे मां तम्ही का समझा ? ओ काई ऊलाद छै ?”
वाह्णे ओह्नु केहले कि, “दाउद ची ।”
43 ईशु ने वाकनु पुछले, “ते दाउद आत्मा मां हुती कने ओह्नु, ‘प्रभु का किहे’ ?” इसड़े लिखले आले छै, 44 ‘कि प्रभु ने, “माये प्रभु नु केहले, “माये सज्जे पासु ब़ेहसती कने शासन कर, जबतक कि मैं दुधे दुशमना नु दुधे पगा तले ना करती ङिये ।” ’ 45 जिसे बेह्ले दाउद ने ओह्नु, प्रभु केहले, तां ओ ओह्चा पुत किवें हो सगे ?”
46 ओह्चे सवाला चा कुई जवाब ना ङे सगले; पर ओ ङिहां कनु लाती कने, ओकनु काई वी कसा पूछणे ची हिम्मत कोह्नी हुली ।