Joona ikʉbomba ɨsi ɄNTWA aalɨnndagiile
3
Po leelo ɄNTWA alɨnkʉmmbʉʉla Joona ʉlwa bʉbɨlɨ, 2 alɨnkʉtɨ, “Sumukaga ʉbʉʉkege kʉ Ninibe, akaaja kala akanywamu, ʉkalʉmbɨlɨlege ɨnongwa ɨjɨ ngʉja pakʉkʉlagɨla.” 3 Joona alɨnkʉsumuka, alɨnkʉbʉʉka kʉ Ninibe bo muumo ɄNTWA aalɨmmbʉʉliile.Akaaja kala akaa Ninibe kaalɨ kanywamu fiijo. Ʉbweleefu bwake abandʉ bendaga ɨnjɨla ɨjaa masikʉ matatʉ. 4 Ʉnkunguluka Joona alɨnkwingɨla nkaaja kala, alɨnkʉsyʉngʉʉtɨla akabalɨlo akaa isikʉ lɨmo. Po alɨnkʉlʉmbɨlɨla kʉ bandʉ, alɨnkʉtɨ, “Bo gakɨndile amasikʉ amalongo mana, akaaja akaa Ninibe kikʉpyutigwa!”
5 Po abandʉ abaa mu Ninibe baaliitiike ɨliisyʉ lya Kyala ɨlɨ aalʉmbɨlɨlaga Joona. Balɨnkʉfumukɨsania ʉkʉtɨ boosa bafipɨɨkege ɨfindʉ. Ʉkwandɨla ʉmundʉ ʉnkʉlʉmba ʉkʉfika ʉnnandɨ, boosa balɨnkʉfwala amalogota ʉkʉja kyo kɨmanyilo kya kʉpɨndʉka.
6 Ʉmalafyale gwa mu Ninibe joope alɨnkwambɨlɨla ɨndʉmi. Po alɨnkʉsumuka, alɨnkʉsookapo pa kɨkota kyake ɨkya bʉtwa. Alɨnkʉfuula ɨmyenda gyake ɨgya bʉtwa, alɨnkʉfwala amalogota, alɨnkwenda nʉ kʉtʉʉgala pa mfwandɨlo. 7 Alɨnkʉlagɨla kʉ bandʉ baake, alɨnkʉfumusya ɨndʉmi nkaaja akaa mu Ninibe, alɨnkʉtɨ, “Kʉ lʉlagɨlo lwa malafyale na mafumu gaake: Ʉmundʉ angalyangamo nakamo nʉ kʉnwa amɨɨsi, gyope nɨ mitiimo, gɨje gya ngʼombe pamo ɨgya ngʼoosi. 8 Abandʉ bafwalege amalogota, ɨmitiimo gɨkupɨkɨligwege na malogota. Abandʉ boosa banndɨlɨlege Kyala na maka palɨkɨmo, bapɨndʉkege. Abandʉ boosa baleke ʉkʉbomba ɨmbiibi nʉ kʉja nʉ bwite. 9 Lʉmo Kyala abagiile ʉkʉsileka ɨngalalɨsi ɨsi aalondaga ʉkʉbomba ʉkʉtɨ tʉlɨngapyutigwa. Jwani ameenye?”
10 Po paapo Kyala alɨnkʉsikeeta ɨmbombo syabo, alɨnkwaga ʉkʉtɨ balekile ʉkʉbomba ɨmbiibi. Kyala alɨnkwenda nʉ kʉbahobokela, akaabapyutile bo muno aajobiile.