Joona 2

Joona ikwipuuta

Po leelo Joona alɨnkwipuuta kʉ NTWA, Kyala gwake, bo alɨ muu munda muuswɨ jɨla. 2 Alɨnkʉtɨ,

“Naalɨnndɨliile ɄNTWA kʉnongwa jaa bʉtolwe bwangʉ,

Ʉmwene joope alɨnkʉʉnyiitɨkɨla.

Bo ndɨ mu ndwanda lwa kʉ bʉsyʉka, naakʉsʉʉmile ʉbʉtʉʉli.

Gwe NTWA, gwajɨpɨliike ɨnguuto jangʉ.

3 Gwalɨndaagile paasi mfisiba,

mmɨɨsi amasolofu mu nyanja,

ʉmweleesyo ʉgwa mɨɨsi gʉlɨnkʉsyʉngʉʉtɨla ɨfibafu fyosa.

Amajɨga gaako goosa nʉ mweleesyo gwako goosa,

fyalyendile pamwanya pamyangʉ.

4 Ʉne ndɨnkʉtɨ, ‘Ndaagiigwe kʉtali na maaso gaako,

ndikʉjɨkeetaga kangɨ ɨnyumba jaako ɨnyiikemo.’

5 Amɨɨsi gaalɨ kɨfuki ʉkʉbʉmila ʉbʉʉmi bwangʉ,

ɨfisiba fyalɨɨsyʉngʉʉtiile,

ɨnguukwe jaagʉniembile ʉntʉ gwangʉ.

6 Naasulwike mpaka paasi nkɨkolo ɨkya fyamba,

po ɨkiisʉ nɨ fya kʉpɨnga fyake,

filɨnkʉmbinyɨɨlɨla paa paasi pa nyanja bwila.

Looli ʉgwe gwe NTWA, Kyala gwangʉ,

gwalɨɨfyʉsiisye ʉkʉfuma mbʉsyʉka.

7 Ʉne bo ndɨ kɨfuki ʉkʉfwa,

apo naakʉkʉmbwike ʉgwe gwe NTWA.

Ɨnyiipuuto syangʉ silɨnkwenda nʉ kʉfika kʉmyako,

mu nyumba jaako ɨnyiikemo.

8 Abandʉ aba bikʉgɨkonga gyabaakyala, gɨkaja nʉ bʉtʉʉli,

bo bikʉja patali ni ipyana lyako.

9 Looli ʉne lɨɨlɨno, nikʉkʉsookesyaga ɨfya kwikemeesya

nʉ kʉkʉgwɨla ʉlʉpi ni isyʉ lyangʉ.

Ngʉjaga gwa kʉbomba ɨsi mfingile,

nalooli ɄNTWA jo Mpoki.”

10 Po paapo ɄNTWA alɨnkʉjɨlagɨla ɨɨswɨ jɨla ʉkʉtɨ jɨnteeke Joona. Po jɨlɨnkwenda nʉ kʉnteeka Joona pi isɨɨlya.