KALATA GWA JOONA
Joona ikʉkaana ʉlʉlagɨlo lwa NTWA
1
ɄNTWA alɨnkʉmmbʉʉla ʉnkunguluka Joona, ʉmwana gwa Amitai, alɨnkʉtɨ, 2 “Sumuka bʉʉka kʉkaaja akanywamu kala akaa Ninibe, ʉkalʉmbɨlɨle nʉ kʉbasoka abandʉ abaa nkaaja kala, bʉno nsibwene ɨmbiibi syabo.” 3 Looli Joona bo apɨliike ɨndʉmi ɨjɨ, aalondaga ʉkʉbopela nkaaja akaa mu Talisisi ʉkʉtɨ alɨngabomba ɨmbombo jaa NTWA. Alɨnkʉsulukɨla mu Jopa, alɨnkʉjaaga ɨsitima.a Ɨjɨ jaabʉʉkaga kʉ Talisisi, alɨnkʉtala taasi ʉkʉhomba ɨndalama ɨsya kwendela, alɨnkwipakɨla ʉkʉbʉʉka nabo kʉ Talisisi. Aatɨgɨ agele ʉkʉja patali nʉ NTWA.4 Po leelo bo ɨsitima jikwenda, ɄNTWA alɨnkʉtʉma ʉmbelo ʉgwa maka fiijo pa nyanja, nɨ nyanja jɨlɨnkwenda nʉ kʉsambʉka, jɨlɨnkʉja na majɨga amanywamu amasisya. Ɨsitima jɨlɨnkʉjʉngaanika fiijo ʉlwa kʉtɨ jɨponege nʉ kʉpangʉkana.
5 Ababombi baa mu sitima boosa balɨnkʉtetema fiijo, kʉkʉtɨ mundʉ alɨnkʉgɨlɨlɨla gyabaakyala gyake, kangɨ balɨnkʉtɨ nʉ kʉnaganiapo ɨfitwalo fimo, balɨnkʉfisopa mmɨɨsi mu nyanja, kokʉtɨ ɨsitima jɨpepʉkepo ʉbʉsito. Akabalɨlo aka Joona jo aalɨ mbʉjo ʉbwa paasi munkatɨ mu sitima, mo aalambaleele aagonile ʉtʉlo ʉtʉsito. 6 Ʉmwɨmɨlɨli ʉgwa sitima alɨnkʉmmbʉʉkɨla, alɨnkʉnndaalʉʉsya alɨnkʉtɨ, “Ʉlɨ na fiki gwe mundʉ ʉgwe, gwe kʉgona tʉʉ tʉlo? Gwe lembʉka! Nsʉʉme Kyala gwako, pamo Kyala ʉjo atʉkʉmbʉke, tʉngiisa kʉsobela mu nyanja muno.”
7 Ababombi baa mu sitima balɨnkʉjobesania ʉjʉ nʉ nnine, ʉjʉ nʉ nnine, balɨnkwitɨkana balɨnkʉtɨ, “Oko! Isaga tʉlagʉle, ʉkʉtɨ tʉmanye ʉnkoosi ʉgʉ gʉtwagile pa bʉtʉlanongwa bwani.” Po balɨnkʉlagʉla, balɨnkʉmmwaga Joona. 8 Balɨnkʉmmbʉʉkɨla, balɨnkʉmmbʉʉla balɨnkʉtɨ, “Tʉbʉʉle, jwani ʉjʉ atʉtwaliile ʉbʉtolwe ʉbʉ? Bʉle, ɨmbombo jaako, kʉbomba mbombo nki? Kangɨ ʉfumile kʉʉgʉ? Ɨkiisʉ kyako kyo kɨlɨkʉ? Nɨ kɨkolo kyako ʉlɨ mfiki ʉgwe?” 9 Joona alɨnkʉbabʉʉla, alɨnkʉtɨ, “Ʉne ndɨ Nhibʉli. Ngwipuuta kʉ NTWA, Kyala ʉgwa kʉmwanya, ʉjʉ apelile ɨnyanja nɨ kiisʉ.”
10 Po Joona alɨnkʉbabʉʉla ʉkʉtɨ ammbopaga ɄNTWA Kyala. Bo bapɨliike ɨsyo ababomba mbombo abaa mu sitima balɨnkʉtiila fiijo. Balɨnkʉjoba balɨnkʉtɨ, “Gwe mundʉ ʉgwe, ʉbombile ɨsya fiki?” 11 Ɨnyanja jɨlɨnkongelela ʉkʉsambʉka kabiibi fiijo, po balɨnkʉnndaalʉʉsya balɨnkʉtɨ, “Tʉtɨ fiki na nungwe ʉkʉtɨ ɨnyanja jɨbote?” 12 Ʉmwene alɨnkʉbabʉʉla alɨnkʉtɨ, “Amungole, mundaage mu nyanja, po ɨnyanja jikʉboteelaga, paapo mmenye ʉkʉtɨ kʉnongwa jangʉ gʉbiisiile ʉmbelo gwa mpetapeta ʉgʉ.”
13 Leelo ababomba mbombo abaa mu sitima balɨnkwijʉʉla ʉkʉfiga na maka ʉkʉtɨ bagomoke kwi isɨɨlya. Leelo baatoliigwe paapo ɨnyanja jaasambwike ʉkʉkɨndapo. 14 Po paapo balɨnkʉnndɨlɨla ɄNTWA, balɨnkʉtɨ, “Ʉgwe gwe NTWA, ʉbombile ɨsi sikʉkyeliile. Tukʉsʉʉma, tʉpelile tʉngiisa kʉfwa kʉnongwa jaa kʉnngoga ʉmundʉ ʉjʉ, kangɨ ʉlɨngatʉbɨɨka ʉkʉja batʉlanongwa, kʉnongwa jaa koona iilopa lya mundʉ ʉjʉ akatʉla najɨmo.” 15 Balɨnkʉnkola Joona, balɨnkʉntaaga mmɨɨsi mu nyanja. Po joope ɨnyanja jɨlɨnkʉleka ʉkʉsambʉka jɨlɨnkʉbota. 16 Ababombi baa mu sitima bala balɨnkwenda nʉ kʉntiila fiijo ɄNTWA. Balɨnkʉnsookesya ɄNTWA ɨfya kwikemeesya nʉ kʉpinya ʉlʉfingo lwa kʉmmbombela.
17 Po leelo ɄNTWA alɨnkʉjɨtʉma ɨɨswɨ ɨnywamu fiijo ʉkʉja ngengenge itolo pakʉmmila Joona, jo jɨlɨnkwenda nʉ kʉmmila. Po paapo Joona alɨnkʉja munda muuswɨ kʉkabalɨlo kaa masikʉ matatʉ.