Joona ikʉkalala paapo ɄNTWA alɨ nʉ lʉpaakɨsyo
4
Looli Joona sikaalɨnkyeliile, po aakaleele fiijo palɨ ɨsi. 2 Aaliipuutile kʉ NTWA aatile, “Gwe NTWA, bʉle sikaja syo ɨsi naajobaga ʉne bo ndɨ nkiisʉ kyangʉ? Syo sisiisi syalɨmbelile ʉne ʉkʉbopela mu Talisisi, paapo naameenye ʉkʉtɨ ʉgwe gwe Kyala, gwiswile ʉlʉpaakɨsyo nʉ lʉgano. Ʉkaja mwengo ʉkʉkalala, ʉlɨ ni ipyana fiijo. Ʉtikʉtwala ʉlʉfundo nakalɨnga, looli kʉbaswa abandʉ. 3 Gwe NTWA, apa silɨ bo ʉlʉ. Po ngʉkʉsʉʉma ʉʉngogege ʉne, paapo ʉne kʉnunu ʉkʉtɨ mfwege ndɨngajangako kʉ bʉʉmi.” 4 ɄNTWA alɨnkʉnndaalʉʉsya Joona, alɨnkʉtɨ, “Bʉle, apa kʉkalala bo ʉlo, kʉbomba nunu?”5 Joona alɨnkʉsookamo nkaaja, alɨnkwakʉtʉʉgala ʉlʉbafu ʉlwa kʉbʉsookelo ʉlwa kaaja akaa Ninibe. Palapala alɨnkʉjenga ɨkɨtembe, mo alɨnkʉtʉʉgala nkɨpepo kyake, namanga ʉmwene aatɨgɨ akakeetege akaaja kala, ʉkʉtɨ asibonege ɨsi sikʉkabonekelaga.
6 ɄNTWA Kyala alɨnkʉmesya ʉmpiki apa alipo Joona. Gʉlɨnkʉkʉla nʉ kʉtaba pamwanya, nʉ kʉmpelela ɨkɨpepo, ʉkʉja kya kʉmmbʉmbʉlʉsya bo atunganyiilwe. Po Joona alɨnkʉhoboka fiijo kʉnongwa jaa mpiki gʉla. 7 Ɨliisikʉ lya bʉbɨlɨ bo bʉkiile, Kyala alɨnkʉlɨtʉma ɨliifiliifili lyo lɨlɨnkʉgʉlya ʉmpiki, gʉlɨnkʉʉma. 8 Ɨliisʉba bo lɨfyʉkile, Kyala alɨnkʉtʉma ʉmbelo ʉgwa kʉbʉsookelo ʉgʉ gʉlɨ na mafuku mingi. Ʉlʉmu ʉlʉkalɨ lʉlɨnkʉmmbalɨla Joona pantʉ. Alɨnkʉjeetanika, alɨnkʉnyonywa ʉkʉfwa alɨnkʉtɨ, “Paakipo ʉkʉtɨ mfwege, ʉkʉkɨnda ʉkʉjako kʉ bʉʉmi.”
9 Kyala alɨnkʉmmbʉʉla Joona alɨnkʉtɨ, “Bʉle, apa kʉkalala kʉnongwa jaa mpiki, kʉbomba kanunu?” Ʉmwene alɨnkwamula alɨnkʉtɨ, “Eena, ngʉbomba kanunu ʉkʉkalala, ʉkʉfwana nʉ kʉfwa.”
10 ɄNTWA alɨnkʉmmbʉʉla, alɨnkʉtɨ, “Ʉgwe ʉgʉpaakiisye ʉmpiki, ʉgʉ nɨ mbombo ʉkagʉbombelapo, ʉkagʉmesyapo, ʉgʉ gʉmelile nkabalɨlo kaa kɨlo kɨmokyene nʉ kʉʉma kangɨ ɨkɨlo kɨmo. 11 Ʉne bʉle, ngabagɨla ʉkʉkapaakɨsya akaaja kala akanywamu akaa Ninibe, aka balimo abandʉ ʉkʉkɨnda 120,000, aba bakabagɨla ʉkʉpaagʉlania ɨnunu nɨ mbiibi, gɨlimo ɨmitiimo ɨmingi fiijo!”