Ɨnduufyo kʉ booloolo bwa Kyala kwa Isilaɨli
149
Muntuufyege ɄNTWA!Mummwɨmbɨlege ɄNTWA ʉlwɨmbo ʉlʉpya,
muntuufyege nkɨlʉndɨlo kya biikemo baake.
2 Isilaɨli asekelege kʉ mpeli gwake,
abandʉ baa mu Syoni bampaalege ʉmalafyale gwabo.
3 Bajɨtuufyege ɨngamu jaake nʉ kʉmoga,
bammwɨmbɨlege nʉ kʉkʉba ɨndingala na mapango.
4 Namanga ɄNTWA ikwikyela na bandʉ baake,
ikʉbapa ʉbʉtoli aboonywa.
5 Abiikemo basekelege kʉ bʉsisya bwake,
bampaalege nalɨnga balambaleele.
6 Balaatege fiijo ʉkʉntuufya Kyala,
nɨ nyʉʉbo ɨnyʉʉgi mmaboko gaabo,
7 bo bikʉtwala ʉlʉbukɨsyo kʉ bapanja,
nʉ kʉbafunda aba bakammanya Kyala.
8 Babapinye abanyafyale baabo nɨ minyololo,
abalongosi baabo nɨ mbɨngo ɨsya kyela,
9 ʉkʉtɨ balongigwe bo muno sisimbiigwe,
ʉlo lo lwɨmɨko lwa biikemo baake boosa.
Muntuufyege ɄNTWA!