Kyala ndongi gwa boosa
94
Gwe NTWA, gwe Kyala gwe kʉbukɨsya ʉbʉbiibi.Gwe Kyala, gwe kʉbukɨsya ʉbʉbiibi, gwisetʉle kʉ bandʉ.
2 Gwe ndongi gwa kiisʉ kyosa,
inʉka, ʉbafunde abaa matingo ʉkʉkongana nɨ mbombo syabo.
3 Gwe NTWA, mpaka ndɨli ababiibi bikʉsaalaga?
Ʉkʉfika ndɨli ababiibi bikʉsekelaga?
4 Mpaka ndɨli ababomba mbiibi bikwituufyaga?
Mpaka ndɨli abaniongafu boosa bikwijumbɨkaga?
5 Gwe NTWA, bikʉbatakania abandʉ baako,
bikʉbataamya abaa kɨlɨngo kyako.
6 Bikʉbagoga abafwɨle na baheesya,
bikʉbagoga abapɨɨna.
7 Kangɨ bikʉtɨ, “ɄNTWA atikʉsibona,
Kyala gwa Jaakobo atikʉsyagania.”
8 Mwe basita mahala, mwinogone!
Mwe bakonyofu, ndɨli amukʉjaga na mahala?
9 Ʉjʉ aapelile ɨmbʉlʉkʉtʉ, bʉle, akabagɨla ʉkʉpɨlɨka?
Ʉjʉ aapelile ɨfisige, bʉle, akabagɨla ʉkʉkeeta?
10 Ʉjʉ ikʉfikemela ɨfikolo fyosa, bʉle, akabagɨla ʉkʉfifunda?
Ʉjʉ ikʉbamanyisya abandʉ, bʉle, akaja na mahala?
11 ɄNTWA asimeenye ɨnyiinogono sya bandʉ,
asimeenye ʉkʉtɨ sya itolo.a
12 Gwe NTWA, asajiigwe ʉmundʉ ʉjʉ kʉmfunda,
nʉ kʉmmanyisya ʉlʉlagɨlo lwako,
13 ʉkʉtɨ mbʉtolwe ʉmpege ʉlʉtengaano,
ʉkwakʉfika apa abaniongafu bakʉmbɨliigwe ʉbwina.
14 Namanga ɄNTWA atikwisa kʉbataaga abandʉ baake,
atikwisa kʉkɨleka ɨkɨlɨngo kyake.
15 Ʉbʉlongi bukwisa kʉjaga bwa bʉgolofu,
abagolofu boosa bikwisa kʉbʉkongaga.
16 Jwani ikʉʉnyɨɨmɨla ʉkʉbapɨnga ababiibi?
Jwani ikʉndʉʉla ʉkʉlwa na babomba mbiibi?
17 ɄNTWA Kyala, lɨnga akaalɨndʉʉlile,
ngalɨ mbʉʉkile kʉ bʉsyʉka.
18 Bo ndile, “Ngʉtyelemuka,”
gwe NTWA, iipyana lyako lyalɨɨnyiinwile.
19 Bo ngʉpaasya fiijo mu ndumbula jangʉ,
ʉgwe kʉʉsʉʉbɨsya nʉ kʉmba ʉlʉsekelo.
20 Abalagɨli ababiibi, ʉkabagɨla ʉkʉbombanila nabo,
aba bikʉbɨɨka ɨndagɨlo ɨsya koonanga.
21 Bikʉja pamopeene ʉkʉlwa na bagolofu,
bikwitɨkana ʉkʉbalonga abasita nongwa ʉkʉgogigwa.
22 Looli ɄNTWA jo ilinga lyangʉ,
jo Kyala gwangʉ lo lwalabwe lwangʉ lwa kʉbopelako.
23 Ʉmwene ikwisa kʉbabukɨsya ʉbʉtʉlanongwa bwabo,
ikwisa kʉbapyuta kʉ bʉbiibi bwabo.
Eena, ɄNTWA Kyala gwɨtʉ ikwisa kʉbapyuta loosa.