Ʉlwipuuto lwa kʉsʉʉma ʉbʉtʉʉli
Ʉlwipuuto ʉlwa Ndaabɨti.
86
Gwe NTWA, ʉmbɨlɨkɨsye, ʉʉnyaamule,namanga ʉne ndɨ ntolwe, kangɨ ndɨ moonywa.
2 Ʉbʉlɨndɨlɨle ʉbʉʉmi bwangʉ,
paapo ngʉkwɨmɨka ʉgwe, gwe Kyala gwangʉ,
ʉmboke ne mbombeli gwako, ne ngʉkʉsʉʉbɨla.
3 Gwe Ntwa, ʉmbaakɨsye,
namanga ngʉkʉlɨlɨla akabalɨlo koosa.
4 Gwe Ntwa, ʉmbepo ʉlʉsekelo ne mbombeli gwako,
paapo ngwipuuta kʉmyako ʉgwe.
5 Gwe Ntwa, ʉlɨ mooloolo, kangɨ ʉlɨ nʉ lʉhobokelo,
ʉlɨ ni ipyana lingi kʉ bandʉ boosa aba bikwipuuta kʉmyako.
6 Gwe NTWA, ʉpɨlɨke ʉlwipuuto lwangʉ,
ʉpɨlɨke ʉkʉlɨla kwangʉ, ʉmbaakɨsye.
7 Nkabalɨlo kaa bʉtolwe bwangʉ, ngʉkʉkoolela,
paapo ʉgwe kʉʉnyaamula.
8 Abapanja bikwipuuta kwa gyabaakyala ɨgya lʉko loosa,
looli akajako ʉjʉ afwene na nungwe, gwe Ntwa,
akajako ʉjʉ ikʉbomba ɨmbombo ɨsisya bo ʉgwe.
9 Ɨfikolo fyosa ɨfya bandʉ, ɨfi ʉfipelile,
fikwisa kʉkwinamɨlaga ʉgwe, gwe Ntwa,
fikwisa kʉjɨgɨndɨkaga ɨngamu jaako.
10 Namanga ʉlɨ nkʉlʉmba,
kʉbomba ɨsya kʉswigɨsya,
namanga gwimwene gwe Kyala.
11 Gwe NTWA, ʉʉmanyisye ɨnjɨla syako,
po ngwendaga mbwanalooli bwako,
ɨndumbula jangʉ joosa jɨsaalege, ʉkʉjɨɨmɨka ɨngamu jaako.
12 Gwe Ntwa, Kyala gwangʉ,
ngʉkʉtuufyaga ʉgwe nɨ ndumbula jangʉ joosa,
ngʉjɨpaalaga ɨngamu jaako bwila na bwila.
13 Namanga iipyana lyako kʉmyangʉ ikʉlʉmba,
ʉmbokile kʉ bʉsyʉka.
14 Gwe Kyala, abaa matingo baanyiinʉkiile,
abandʉ abagaasi bikʉlonda ʉkʉʉngoga,
abandʉ aba batikʉkʉpaasya ʉgwe.
15 Looli, ʉgwe gwe Ntwa,
ʉgwe gwe Kyala gwa kɨsa ni ipyana.
Ʉkaja mwengo ʉkʉkalala, gwiswile iipyana nʉ bwanalooli.
16 Ʉʉsanukɨle, ʉmbaakɨsye,
ʉmbepo amaka gaako ne mbombeli gwako,
ʉmboke, ne mwana gwa mbombeli gwako ʉnkiikʉlʉ.
17 Gwe NTWA, ʉʉnangɨsye ɨkɨmanyilo ɨkya booloolo bwako,
ʉkʉtɨ aba baambengile, basʉʉke,
paapo ʉndʉʉlile nʉ kʉʉsʉʉbɨsya.