Ʉlwipuuto lwa mundʉ ʉjʉ ikʉboneligwa
Kʉ mpaali gwa lwɨmbo. Ʉlwɨmbo ʉlwa mahala ʉlwa Ndaabɨti, ʉlwa kwɨmbɨla ɨfyombo fya mbote.
55
Gwe Kyala ʉpɨlɨkɨsye ʉlwipuuto lwangʉ,ʉlɨngaasindaga iikosi bo ngʉkʉsʉʉma.
2 Gʉmbɨlɨkɨsye nʉ kʉʉnyaamula,
ngateele nʉ bʉtolwe bwangʉ.
3 Ndɨ nʉ lʉtende, abalʉgʉ bangʉ bikʉndiilɨsya,
ngʉboneligwa na babiibi.
Namanga bikʉndwalɨla ɨndaamyo,
kʉ ngalalɨsi syabo bikʉʉfwɨma.
4 Ɨndumbula jangʉ jikʉfulala nkatɨ mmyangʉ,
ʉlʉtende ʉlwa bʉfwe lʉngolile.
5 Ʉlʉtende nʉ kʉsɨlɨla fiijo fiinyiisiile,
ngʉtiila fiijo, amaka gaamalɨkiile.
6 Ndɨnkʉtɨ, “Lɨnga naalɨ na mapɨko bo ʉlwa ngʉnde,
naapululukɨlaga kʉbʉtali kʉkʉbwaga ʉbʉtʉʉsyo.
7 Ngalɨ mbʉʉkile kʉbʉtali fiijo,
naajaga kʉtʉʉgala mmatengele. Sela
8 Ngalɨ ngʉʉjile fiijo ʉkʉbʉlonda ʉbʉjo,
ʉkwepʉka ʉmbelo ʉnkalɨ na kafulafumbɨ.”
9 Gwe Ntwa, ʉbapyute abalʉgʉ, goonange ɨnjobelo syabo,
namanga ngʉkʉbona ʉkʉlʉndʉkana nʉ bwite nkaaja.
10 Pakɨlo na pamuusi bikwembeela nkaaja moosa,
bikʉtwala ʉlʉbonelo nʉ bʉbiibi nkaaja.
11 Ʉloonangɨko lʉbalaniile moosa nkaaja,
ʉlʉbonelo nʉ bʉsyobi bʉtikʉsookamo ʉmo.
12 Akaja ndʉgʉ gwangʉ ʉjʉ ikʉndʉka,
lɨnga syalɨ bo ʉlo ngalɨ ngibile.
Akaja jo ʉjʉ tʉkɨndeene ʉjʉ ikʉʉnyiilaamwa,
ngalɨ niibɨɨliile, alɨngaambonaga.
13 Looli ngɨmba jo ʉgwe, gwe mwinangʉ,
gwe mmanyaani gwangʉ, gwe tʉmanyeene fiijo.
14 Twaliisibiile ʉkʉjobesania ɨnunu,
twabʉʉkaga pamopeene twesa mu tempeli.
15 Ʉbʉfwe bʉbaage abalʉgʉ bangʉ,
basulukege kʉ bʉsyʉka bo bʉʉmi,
namanga ʉbʉbiibi bwijengile mu ndumbula syabo.
16 Looli ʉne ngʉnndɨlɨla Kyala,
ʉmwene ɄNTWA aikʉmboka.
17 Namajolo, nʉlʉbʉnjʉ na pamuusi,
ʉne ngwilʉmbʉʉsya ʉkʉlɨla,
ʉmwene ikʉpɨlɨkaga iisyʉ lyangʉ.
18 Aikʉmboka mbwite, ngʉja ndʉtengaano,
namanga abalʉgʉ bangʉ bingi.
19 Kyala ʉjʉ ikʉlagɨla bwila na bwila,
aikʉmbɨlɨka ʉne nʉ kʉbatola. Sela
Namanga bakiigana ʉkwandʉka,
kangɨ batikʉntiila Kyala.
20 Ʉmwinangʉ alwile na bamanyaani baake,
oomwile ʉlwitɨkano lwake.
21 Amasyʉ gaake manyaafu ʉkʉlʉkɨnda ʉlʉketa,
looli ɨnyiinogono syake siiswile ʉbwite.
Ʉbʉjobi bwake bwa booloolo ʉkʉkɨnda amafuta,
looli buboolile bo ʉlwa lʉʉbo ʉlʉʉgi.
22 Gʉnndekele ɄNTWA ɨkɨtwalo kyako jo ikʉkʉtʉʉla,
atiisakʉnndekamo sikʉ ʉngolofu ʉkʉtoligwa.
23 Looli ʉgwe Kyala, aakʉbasopa mbwina ʉbʉsolofu,
abagogi na basyobi.
Batikwisa kʉja nʉ bʉʉmi ʉbʉtali,
looli ʉne ngʉkʉsʉʉbɨlaga ʉgwe.