Ʉmalafyale ʉnsʉngʉligwa na Kyala
2
Fiki ɨfikolo fikʉjobesania ʉkʉnsambʉkɨla Kyala,kangɨ ɨfiisʉ fikwinogona ɨsya mwalo?
2 Abanyafyale abaa mfiisʉ biitendekiisye,
abalongosi bikʉjobesania pamopeene,
ʉkʉnsambʉkɨla ɄNTWA nʉ mpakigwa amafutaa gwake.b
3 Bikʉtɨ, “Natwijaabʉle mbʉlagɨli bwabo,
natwijaabʉle tʉje baabʉke.”
4 Ʉjʉ ikʉtʉʉgala kʉmwanya ikʉseka,
ʉNtwa ikʉbiilaamwa.
5 Po akaleele, ikʉbakemela,
alɨ nɨ ngalalɨsi ikʉbatiilɨsya, ikʉtɨ,
6 “Nʉmmbɨɨkile ʉmalafyale ʉjʉ nʉnsalile,
pa kyamba Syoni, ɨkyamba kyangʉ ɨkiikemo.”
Ʉmalafyale ʉjo ikʉtɨ,
7 “Angʉfumusyaga ɨndagɨlo sya NTWA,
aalɨɨmbʉʉlile aatile,
‘Ʉgwe ʉlɨ mwanangʉ,
ʉmwisyʉgʉ ʉne ngʉpaapile.c
8 Ʉʉsʉʉme,
ʉne angwisa kʉkʉpa ɨfikolo fyosa ʉkʉja kɨlɨngo kyako,
nʉ bʉnyafyale bwa fiisʉ fyosa bukʉjaga bwako.
9 Kwisa kʉbatajʉlania nɨ ngili ɨjaa kyela,
kwisa kʉbabogojolania bo ʉlwa ndeko.’ ”d
10 Po leelo, mwe banyafyale ʉmwe, mujege na mahala,
mwe balongosi baa pakiisʉ, mukʉsokigwa.
11 Mummbombelege ɄNTWA nʉ kʉntiila,
kangɨ musekelege nʉ kʉtetema.
12 Namufugamege kʉmyake alɨngiisa kʉkalala,
mulɨngiisa kʉpyutigwa nakalɨnga,
namanga ɨngalalɨsi syake sikwisa mbɨmbɨbɨ.
Basajiigwe aba bikʉbopela kʉmyake.