26
1 Oyo Agripa iasau osi Paulus, “Au utapia aanamana anete ruamu.” Reiso Paulus iatieu, oyo ianamana inete ruai. 2 “Tapea, upuku, Aia Agripa. Au uahana au we untu tau au pisa uanamana unete ruaku osia ranie hatae reini. Unete ruaku rerihoni pusire waroni sio Yahudiu oamanaruku tanure. 3 Au we untu tau ano aanei panesi rerihoni ita Yahudiu re monna runa sae waroni ami atuntana runare. Reiso uainisi na ano aatinu rerihoni au sapare tanuku.
4 Sio Yahudiu panesi oanei sapani na uamahaiku on au honue asi. Sio oanei sapani na uamahaiku poe au ruaku we niane runa sapani na uamahaiku roe Yerusalem. 5 Potuina nea sio oanei rerihoni au. Kani sio nanie, sio pisa osima ata uamahaiku sani ia onate rerihoni akama Yahudi. Upusu monna mtinta pusire waroni ami rerihoni tikane rei opusure. 6 Muie reini mo, au wani uooku mai rei na omi oasau ata kani usana te tewa tau uparisaa mka ami asupu sae wani Anahatana itotoe osi mania upu ata mka iruiki. 7 Sio Yahudiu rerihoni sio ipana hutusa rahana ua oainaa runa Anahatana tau onone tau ranie. Sio oparisaa ata mka Anahatana irui sae wani itotoe rei. Aikee, Aia Agripa, sio wasoni oamanaru au reini tau au oi uparisaa ata mka Anahatana irui sae wani itotoe rei. 8 Sapani na omi Yahudiu oparisaa tewa ata Anahatana ne kawasa iapuhai sio matana?
9 Naone au ruaku uahata kahurae au unesi sio wasoni oparisaa tau Yesus, ia waini on pani nia Nasaret rei. 10 Reiso unesiso roe kota Yerusalem. Sio imam onata orui kawasa osiku na unusu Anahatana ne mansiau pani pui anoe. Sio ohunu sio wasoni oparisaa rei, au uasau ata iake. 11 Uuna sinsaraso sui numa mananouna osi sio Yahudiu runa utentene tanuso oanamana kahatene rerihoni Yesus. Anoku titie mainae tau sio reiso ueu sui kotau sui sio rakana usuiso na uuna sinsaraso.
12 Reiso nai osa wani ueuku poe Damsyik. Urori sura kawasae rerihoni sio imam onata na uuna sinsara sio wasoni oparisaa tau Yesus. 13 Au wani ueu sui arena tau ranie katopu, Aia Agripa, oyo unoo itane eresita on roe nante. Eresita mainae erenesi ranie. Wani eresita erehori au runa sio wasoni oeu okataku. 14 Pusima aamnahuma poe tuamane. Oyo uatinu nioke ereasau osiku tau sou Ibrani sanrei, “Saulus, Saulus. Ano anesi au, areimo auna sinsaraku, nanie ta hae? Ano anesi au, areimo auna ruamu resunia sani koropou ereuna ruae resuniki kani eresiku upue ne kahitate. 15 Oyo uasau, ‘Upuku, ano seia rei?’ Upuku on poe iasau osiku, ‘Au reini, au Yesus ano wani auna sinsaraku. Auna we mampusua sinsaraso, areimo sani auna au ruaku sinsaraku. 16 Ahanu na aoo roe. Uatuhete ruaku osia na uhitia na aanori runaku runa asima runa anoo au ranie hatae reini. Asima runa sae waroni mka uatuhetere tanua tau muie oi. 17 Mka ualapasia rerihoni sio Israel runa sio niana wasoni sio Yahudiu tewa. Au uaisosia aaunau noi sio wasoni sio Yahudiu tewa 18 na ano auna sio oanei we maunauna sani aheka sio matao usena na onoo. Uaisosia aatuheteso na sani ia isa ieu iarihoni naniai erepumonoi, oyo ihokai pani manahane, ia aia sakahatene iaisosiso tewa nea. Ne Anahatana sahoro iaisosiso na iuna heu no rosau, oyo ouna osa runa sio wasoni Anahatana iuna anoo manisata tau sio oparisaa tau au.
19 Reiso, Aia Agripa, au upusu Yesus ia-ia. Yesus waini iatuhete ruai osiku on roe noiyaha rei na unooi. 20 Mataanoe uaunauso poe nia Damsyik. Ita uaunauso roe kota Yerusalem. Uaunau sio sui otoe Yudea pusiso. Ita uaunau sio wasoni sio Yahudiu tewa. Uaunauso ata kahurae sio oarihoni no rosau, oyo opusu Anahatana ne maunauna runa oatuhete ata oarihoni no rosau pusu oamahaiso manisata. 21 Reiso tau rei, sio Yahudiu osotaku roe Anahatana ne numa mainisie. Osotaku oyo, ohunu reaku. 22 Ne rotu-tu reini Anahatana iakahaiku. Reiso wani uooku mai rei na usima rerihoni Yesus osi sio pusiso, sio mainaya runa sio wasoni sio mainaya tewa. Sae waroni uasau rei runa sae waroni sio mamsima runa Anahatana ne anamanaya runa Musa oaunutu anoo tanure, pusire osa. 23 Pusima aasau ata Ia Anahatana Iratiku Iapuheuso Okarihuru mka sinsarai, oyo iuna tumata waini mataanoe imatai, oyo iamahaiki honu. Iamahaiki na isima osi sio Yahudiu runa sio wasoni sio Yahudiu tewa ata Anahatana mka iapuheuso na oamahaiso rotu-tu ria supani. Sani kamane eresita na onoo pusire, Anahatana iapuheuso pusu iunaso oanei ne maunauna.
24 Paulus waini ianamana inete ruai sanrei, oyo Festus iakapona sanrei, “Paulus, ano amukea nea. Anoo me surata panesi rotu-tu amukea nea.” 25 Ne Paulus on poe iasau, “Upuku, Festus. Umukeku tewa. Au wani uasau anamanaya waroni titue runa iaka. 26 Aia Agripa ruai ianei ata au wani uasau rerihoni Yesus titue. Reiso tau ia aia Agripa ianei nea rerihoni sae waroni uasau rei, uanamana umoni tewa. Au uanei ia-ia ata ianei pusire rerihoni Yesus. Ianei oi ata sio ouna sani uasau rei osi Yesus, oauhuniso tewa. Ounai mai manahane. 27 Aia Agripa. Ano aparisaa tau sae waroni sio mamsima runa Anahatana ne anamanaya oaunutu anoo tanure, tea? Uanei ano aparisaa.”
28 Oyo Agripa iasau osi Paulus, “Ano aahata aaunauku rapu-rapu mani sanrei, oyo nanie auna au unusu Sarane?” 29 Oyo Paulus on poe iasau honu, “Au uainisi tau Anahatana na rapu-rapu mani te, potuina te, ano, Aia Agripa, runa omi pusimo utumo wani oatinu tau au ranie hatae reini ouna Saraneu sani au reini. Ne uainisi tewa na omi, sio okanihoomo tau ranteu sanrei.”
30 Oyo ia aia, ia waini ia ne kawasa tau otoe rei, Bernike, runa sio pusiso wasoni oru-rue okataso, pusiso ohitioso. 31 Ohokaso pani manahane, oyo pusiso oasau osi umau, “Ia rei iuna sae isa tewa na kahurae sio ohunui te osakai pani pui anoe.” 32 Oyo Agripa iasau osi Festus, “Sinana pene iainisi na ia Natu Kaisar iasei tanui, ami ahokai arihoni pui anoe.”