16
Timotius Ieu Ipusu Paulus Runa Silas
1 Paulus ieu ikata Silas honu rotu-tu ihokai poe nia Derbe, oyo ieui poe nia Listra. Hoka poe oyo, isupu ia mampusue isa nanai Timotius. Inai, ia Yahudi. Iparisaa tau Yesus nea. Ne amai, ia Yunani. 2 Sio wasoni oparisaa poe Listra runa Ikonium oahata Timotius mo, ia iake. 3 Paulus inina na Timotius ieu ikatai, reiso irehiki. Tau sae, sio Yahudiu sui otoe rei oanei ata amai, ia Yunani. Sio oanei ata sio orehiki tewasi. Reiso Paulus irehiki. 4 Oeu ohori niana sui otoe Galatia osima osi sio wasoni oparisaa runa maunauna on roe sio maisosia runa sio onata tau sio wasoni oparisaa roe kota Yerusalem. Sio oaunauso na opusu maunauna rai. 5 Reiso sio wasoni oparisaa, oparisaa ia-ia. Ranie hatae isa, ereeu mai poua tonu rei sio okikasi oasinena suiosa.
Paulus Inoo Masasua Nau Troas
6 Anahatana Ne Inaha isopo na pene Paulus sio oaunauso tau Anahatana ne anamanaya nau otoe Asia. Reiso oeuso ria otoe Frigia runa otoe Galatia. 7 Hoka ria haineke nenene wani eresama otoe Misia runa otoe Bitinia, oyo nanie onusu otoe Bitinia. Onusu rea, ne Yesus Ne Inaha isoposo honu. 8 Reiso oniku Misia, oyo oeuso nau nia Troas. 9 Hoka nau oyo, nene pumono pani sanrei oyo, Paulus inoo masasua. Inoo ia Makedonia isa iooi hainekei iainisi runa anoi pusiki sanrei, “Aeua mai otoe Makedonia na aakahaima.” 10 Paulus inoo masasua rei, oyo isima osi au, Lukas, runa ne netau tamena. Mata hun tewa oyo, ami aautotu apia, nanie aeuma nau Makedonia. Tau sae, ami aapamata sou ata Anahatana iaisosima aaunau sio nau rei tau Sou Iake rerihoni Yesus.
Lidia Iparisaa Tau Yesus Ria Niane Filipi
11 Ami aeu aarihoni nia Troas asaa kapane rotu-tu ahokama nau nusa Samotrake. Hoka nau oyo, hanu sanrei ahokama nau nia Neapolis. 12 Hoka nau oyo, aeuma ria Filipi, niane isa ria otoe mataanoe pani Makedonia. Sio Romau sahoro onana kota rei. Ami aararane onona inasa rai. 13 Tau ranie hatae rei iaranahata ahokama rerihoni niane rei nene mitanunue. Ahokama pani mui, oyo aeuma pani waene nusue. Tau sae, ami ata pani rei mka asupu sio Yahudiu naniao na oainisi tanui. Asupui, oyo ami aru-ruema aanamana runa sio pinau wasoni oamanouso pani rei. 14 Ia isa rerihoni sio rei nanai Lidia. Iaheni nipa msinaya. Nipaya rai hunoni mainaya. Ne niane wani Tiatira. Ia Yunani ne iainisi iainaa runa Anahatana sani sio Yahudiu. Reiso Anahatana irue anoi na ianei Paulus ne maunauna runa iparisaa. 15 Sio oriti heu Lidia runa sio pusiso wasoni orue tau ne numa no rosau, oyo iainisi tau ami sanrei, “Wea amau, wea hotau. Munata omi oahata titue au uparisaa tau Yesus nea, mai, oararanemo mai au we numa.” Oyo iapamanuma, reiso aararane tau ne numa rei.
Sio Onusu Paulus Runa Silas Pani Pui Ria Niane Filipi
16 Taue isa ami wani aeuma pani naniama wani aamanouma na aaisisi, oyo asupu ia pina maniane isa. Ia pina rei, sakahatene ererui kawasa osiki na iuna nau, oyo iasau pani muie mka sapani. Iuna nau, oyo sio wasoni oaisosiki osupu kepeni panesi. 17 Ia pina rei ieu ipusu-pusu Paulus runa pusima iaka-akapona, “Sio reino mo, sio wasoni Anahatana waini ia mainae nai osa ne manorina. Sio wasoni osima osimo runa sapani na Anahatana iapuheumo na oamahaimo rotu-tu ria supani.”
18 Iuna sanrei rotu-tu onona ate te nima sanrei, oyo Paulus iakapuku. Ikuai iapamese ruai tewa nea. Reiso iuniki, oyo iasau osi sakahatene rei, “Tau Yesus ne kawasa, au uaisosia na ahokaya aarihoni ia pina reini.”
Oyo sira tau erehokai rerihoni ia pina rei. 19 Sio wasoni oaisosiki oanei ata mka sio osupu kepeni tewa nea rerihoni ia pina rei. Reiso osota Paulus runa Silas onesa uaso pani niane tihue wani huie na sio onata tau niane rei oasei tanuso. 20 Orori uaso na oamanane ia natu Kaisar ne mansia mainaya, oyo oasau, “Mania amau, sio reini mo, sio Yahudiu. Reiso sio wasoni ouna sio panesi otuntana runa umau mai ita re niane reini. 21 Ita wani ia natu Kaisar ne mansiau. Sio onina na ipusu no monna waroni re natu rei isopo na pene iunare.”
22 Oyo sio hutue pusiso nanie ohitaso nea. Reiso sio onata oaisosiso okiha uaso no papita, oyo onosure. Onosure oyo, osapu-sapuso tau ai anaya. 23 Osapu-sapuso mainae, oyo onususo pani pui. Sio oaisosi ia mamsaka pui na isakaso ia-ia. 24 Reiso ia mamsaka pui inususo pani kamar hainau pani pui anoe, oyo ikanihoo aio atua rapanaha hini na pene nisuo.
25 Tau saa monon tihu sanrei oyo, Paulus runa Silas wasoni oainisi, wasoni ohete ahinaya oainaa runa Anahatana. Sio tamena wasoni sio osakaso pani pui oatinu. 26 Sira tau isu mainae rotu-tu tuamane wani sio onana pui tanui erekoka. Pui mitanunua pusire rahekaso runa ranteu waroni sio okanihooso runare, ranosu pusire. 27 Ia mamsaka pui rei imaranae. Imaranae oyo, inoo pui mitanunua raheka pusire. Reiso isaru ne tunue nanie ihunu ruai. Iahata sio pusiso wasoni isakaso pani pui orumaso nea. Ikaitau mka sio oasau isakaso ia-ia tewa, oyo ohunui. 28 Ne Paulus iakapona nioni mainae, “Pene ahunu ruamu! Ami pusima ami wani sirinia!”
29 Iainisi kamana, oyo irumai pani pui anoe. Ikana-kananunui, oyo iamnohoi mai Paulus runa Silas uaso ua anoa, nanie iainisi sae isa. 30 Oyo iautunu uaso ohokaso, oyo iasei, “Wea upu, kahurae au uuna sae na Anahatana iapuheuku na uamahaiku rotu-tu ria supani?”
31 Sio on poe oasau sanrei, “Parisaa tau Upuri Yesus Kristus, oyo Anahatana iapuheua. Ano runa sio pusiso wasoni orueso tau me numa.”
32 Oyo sio oatuhete ia mamsaka pui runa sio wasoni noi ne numa pusiso tau maunauna rerihoni Upuri Yesus. 33 Oyo nene pumono pani sanrei oyo, ia mamsakae rei iautunu uaso, oyo isohu no apata. Isohu no apata, oyo sio osohu heu no rosau, ia mamsakae rei runa sio wasoni noi ne numa pusiso. 34 Oyo iautunu uaso roe ne numa nanie ipanaso. Ipanaso oyo, ia runa sio wasoni noi ne numa pusiso anoo miri-mirika tau sio oparisaa tau Anahatana nea.
35 Hanroe tau omnanoe oyo, ia natu Kaisar ne mansia mainaya oaisosi sio polisiu oeuso pani ia mamsaka pui oaisosiso oasau, “Ahoka sio ua rei.” 36 Reiso ia mamsakae isima osi Paulus sanrei, “Ia natu Kaisar ne mansia mainaya oaisosima nea na ahokamo. Reiso onunimo. Oeu ia-ia.”
37 Ne Paulus iasau osi sio polisiu rei, “Masike sio osupu mani isanae isa tewa iae, ia natu Kaisar ne mansia mainaya oaisosiso ohitama runa sio pusiso onooi. Masike ami mani kawasa sani ia natu Kaisar ne mansiau iae, sio ohitama, oyo onusuma pani pui anoe. Ne muie reini mo, sio nanie oaisosima anunima aauhunima? Ami apenema. Aaisosi sio mainaya rei ruao ohokaso na oautunuma ahokama.”
38 Sio polisiu oeu osima runa anamanaya rai osi sio mainaya. Sio mainaya oatinu ata Paulus runa Silas sani ia natu Kaisar ne mansiau, oyo okaitau hun ruao. 39 Reiso oeuso pani pui rei oripakoku tau uaso. Oyo oautunuso ohokaso rerihoni pui anoe rei oai-ainisi na sio oeu oarihoni kota rei. 40 Uaso ohoka rerihoni pui anoe rei, oyo oeuso pani Lidia ne numa. Hoka pani oyo, oamanouso runa sio wasoni oparisaa pusiso. Oakahaiso tau no maunauna, oyo oeu oarihoni niane rei.