14
Paulus runa Barnabas Oaunauso pani Nia Ikonium
1 Hoka pani nia Ikonium oyo, Paulus runa Barnabas uaso onususo pani sio Yahudiu no numa manoune sirinia. Pani rei oaunauso iake, reiso sio panesi oparisaa tau Yesus, sio Yahudiu runa sio wasoni sio Yahudiu tewa. 2 Ne sio Yahudiu umau openeso oparisaa tau Yesus, reiso oapamanu sio wasoni Yahudiu tewa na ouna sio rei anoo rasaa tau sio wasoni oparisaa. 3 Reiso uaso orueso potuina pani rei. Oaunauso rerihoni Upuri, okaitau tewa. Upuri iatuheteso ata sio no maunauna rerihoni sapani na irui iake osiso areimo manisate. Iatuheteso tau irui kawasa osiso na ouna sima-simana waroni retuhete ata no kawasa rerihoni Anahatana runa sima-simana raasiraso. Sima-simana sani osuiseneso runa onei sakahatena. 4 Sio Ikonium wasoni osamaso tau ua. Sio umau opusu sio Yahudiu na openeso oparisaa tau Yesus, sio umau opusu sio maisosia uaso.
5 Oyo sio wasoni sio Yahudiu tewa, sio Yahudiu, runa sio ona Yahudiu oheu, nanie ouna uaso sinsaraso. Nanie orauso tau hatu. 6 Ne uaso oatinu rerihoni kaheute rei, reiso orumaso nau nia Listra, nia Derbe runa otoe Likaonia pusiki. 7 Tau otoe rei, oaunauso tau Sou Iake rerihoni Yesus.
Paulus runa Barnabas Oaunauso nau Nia Listra
8 Paulus runa Barnabas ohokaso nau nia Listra, oyo osupu ia isa waini ieu ise-ise. Ia reimo iamrai sanrei. On iamrai ieui tau aini tewasi. Aini atua manna. 9 Waini iru-ruei iatinu Paulus iaunauso. Paulus iroui, oyo ianei ata iparisaa ata Anahatana imaha iunai iake. 10 Reiso Paulus iasau osiki nioni mainae, “Hitio roe. Aoo katopu!” Oyo isomani roe, oyo ieui.
11 Sio hutue rei wasoni oatinu tau Paulus ne maunauna onoo Paulus ne sima-simane rei, oyo oakapona tau sio no sou, areimo sou Likaonia. Oahata, “Sio wasoni ita iainaa runaso okaisunuso mai tuniai reini nea! Ouna tumatau nea!” 12 Oyo ohete Barnabas nanai tau Zeus. Ohete Paulus nanai tau Hermes. Tau sae, sio Listra oainaa runa Zeus runa Hermes sani sio Yahudiu oainaa runa Anahatana. Ohete Paulus nanai tau Hermes. Tea mo, ianamana iake. Hermes iae ianamana iake. 13 Reiso ia waini isaka ianori runa Zeus iatinu tau rei. Ia rei isaka Zeus ne numa hae niane muie. Tau numa rei, sio oainaa runa Zeus. Reiso inesa koropou hanaiya runa irori kupako mai kota rei nene mitanunua. Oyo ia runa sio hutue rei, nanie orehire osi Paulus runa Barnabas oainaa runaso.
14 Sio maisosia, Barnabas runa Paulus, oatinu tau rei, oyo okiha no papita na sio oanei ata openeso tau sio Listra oainaa runaso. Oruma kua sio hutue rei tihue oakapona sanrei, 15 “He, omi wani ouna sanrei, nanie tau sae? Ami reini mo, ami tumatau oi, tea? Ami sani omi reino oi. Ami wani asima runa Sou Iake rerihoni Yesus osimo. Ami wani aasau osimo ata kahurae oarihoni oainaa runa sae wani remahaiki tewa, sani Zeus runa Hermes. Kahurae oainaa runa Anahatana waini iamahaiki. Anahatana sahoro ihaye nante, runa tuamane, runa nuae runa pusire waroni tuniai reini. 16 Masike naone Anahatana itapiso opusu ruao no maue, 17 iatuheteso rerihoni ruai oi. Iatuheteso pusu irui iake osiso. Iuna uane osi pusita. Iuna atuhu raruhu. Tau musum tinou, iuna atuhu huaya. Reiso irui muaine osita. Iuna anori mirika.” 18 Ne masike oaunauso sanrei iae, mtinte oapamanuso na pene orehi koropou rai osiso. Ne poe oyo, orehire tewa.
19 Oyo sio Yahudiu umau ohokaso mai Listra on ria kota Antiokhia ria otoe Pisidia runa otoe Ikonium, oyo oanamana osi sio panesi rotu-tu oapamanu orau Paulus tau hatu. Reiso oraui, oyo onesai pani niane muie oahata imatai. 20 Ne sio mampusua ohoriki, oyo ihitio roe, oyo inusui pani niane rei honu.
Hanu roe oyo, ieui pani nia Derbe ikata Barnabas.
Paulus runa Barnabas Onuniso pani Kota Antiokhia pani Otoe Siria
21 Hoka pani nia Derbe oyo, Paulus runa Barnabas uaso oaunauso tau Sou Iake rerihoni Yesus rotu-tu sio panesi ouna Yesus ne mampusua. Oyo uaso onuniso poe nia Listra, nia Ikonium runa kota Antiokhia poe otoe Pisidia honu. 22 Sui niana rai, oakahai sio mampusua na oparisaa ia-ia. Oaunauso na oparisaa asi. Oahata, “Kahurae sinsarata panesi naone, samatoro ipusu tau Anahatana irime tuniai reini.” 23 Ohiti sio onata tau sio wasoni oparisaa no tikana pusire. Oyo oahusieso oainisi tau Upuri waini sio oparisaa rei na Upuri ikata runaso. Oahusieso, oainisi, oamaoni.
24 Oyo uaso oeuso honu onikuso poe otoe Pisidia rotu-tu ohokaso nau otoe Pampilia honu. 25 Hoka nau oyo, oaunauso tau Anahatana ne anamanaya nau nia Perga, oyo oeuso nau nia Atalia. 26 Hoka nau oyo, osaa kapane, nanie onuniso pani Antiokhia. Sio Antiokhia sahoro oahusieso runa oainisi na Anahatana irui iake osiso na sio oaunauso runa ouna sima-simana. Ouna sanrei nea.