22
Daud Inika Ahinae Iainaa runa Anahatana
1 Anahatana iapuheu Daud arihoni Saul runa ne nisau tamena pusiso. Iapuheui oyo Daud inika ahinae osi Anahatana.
2 “Upuku Anahatana. Ano ararou anete au arihoni we nisau
atieu rei sani hatu tinaie rerarou ereneteku.
Atieu rei sani numa hatu wani makae rerarou erenete.
Ano apuheuku.
3 Ano atieu rei sani hatu tinaie
reiso au uparisaa ata ano mka apuheuku arihoni we nisau.
Ano ararou aneteku
atieu rei sani aniaue rerarou erenete soratatue arihoni ne nisau.
Ano amkona reiso asakaku
atieu rei sani korobou hanaie eresaka tau nene sepi-sepie
reiso ano apuheuku.
Ano asakaku sani numa wani makae reiso urumaku roe tanua.
Ano apuheuku arihoni we nisau.
Ano apuheuku arihoni sio wasoni oamkona nanie oaiapaku.
4 Au uainisi uakapona osia.
Ano iake mainae reiso kahurae uainaa runaya.
Au uakapona osia oyo ano apuheuku arihoni we nisau.
5 Naone matane erenohiku sui supani mani
atieu rei sani kolau mainaya nau nuae rapapa hunuku.
Siraka eresupuku
atieu rei sani uane onoe tinaa rasupuku reiso ueu iake tewa.
6 Au uahana anoku reini sani nanie umataku nea.
Atieu rei sani okanihooku tau awaneu nanie onesaku
ne unosu kua ruaku tewa. Tewa mo matane ereeseku.
Atieu rei sani heune erenapaku mai uaku anoe.
7 Au anoku ereuponu reiso uainisi uakapona roe tanua.
Ano atinuku on roe noiyaha.
Ano atinu nioku on roe noiyaha.
8 Ano akapuku tau we nisau
reiso isu mai tuniai. Reiso tuniai eresini koka.
Nante nohue eresini koka pusiki.
9 Ano akapuku tau we nisau reiso okaitau
atieu rei sani sio kaitau usa wenue.
Atieu rei sani okaitau usa itana.
Atieu rei sani okaitau usa hanaya.
10 Ano atinu we mainisie reiso akahaiku sisaa
atieu rei sani ano ruamu akeka nante nanie ruamu aeua mai tanuku.
Ano akahaiku tau me kawasa mainae. Me kawasa mainae noo sani ano aeu roe onoe hahae.
11 Ano akahaiku sisaa
atieu rei sani ano ruamu asaa me maisosie wani nene kihena na ererihu rapu.
Atieu rei sani aeu tau ihute.
12 Ami anei ata ano wani tutua
pusu anoo onoe eresou erehoria.
Pusu anoo pumono erenetea sani ainatae.
13 Ami anei ata ano wani tutua
pusu anoo me rinane wani ita-itane eresita.
Pusu anoo isoe on roe nante eresita tuniai.
14 Ano mo, ano mainae naiosa.
Anomu eresaa reiso niomu sani tinaa.
15 Ano auna isoe reiso we nisau oruma pusiso.
Isoa rai mo atieu rei sani niuna tinaia waroni nanie ana we nisau tanure.
Reiso we nisau oruma wena-wenaso.
16 Anomu eresaa mainae reiso ano anamana akapuku tau we nisau.
Anamana akapuku rotu-tu nuae nosite nooi.
Rotu-tu tuniai nohue poe hue reipo nooi.
17 Ano akahuuku tau hanamu on roe noiyaha na apuheuku.
Atieu rei sani asaruku arihoni tihu naue.
18 Ano apuheuku arihoni we nisau wasoni oamkona,
arihoni sio wasoni openeso tanuku wasoni oamkona mainae. Oamkona mainae reiso uhita unete kua ruaku tewa.
19 Sio okake osoruku tau pannuhu au we siraka
ne ano akahai aneteku.
20 Anomu iake akaumini runaku
reiso ano apuheuku.
We nisau ohoriku ne ano ahokaku aroriku pani otoe huie.
21 Anoku manisate reiso ano aunaku iake.
Au manisate onate reiso ano anoo runaku iake.
22 Au upusu me arena reiso aunaku iake.
Au uarihonia rotu-tu au una kahatene tewa
reiso ano anoo runaku iake.
23 Au upusu me maue.
Au uatinu tau me maunauna pusire uture.
24 Ia isa mka iasau tewa ata au we isanaya
tewa mo upusu me maunauna pusire uture.
Au usaka ruaku na pene upalalosa.
25 Reiso ano aunaku iake pusu anoku manisate.
Ano anei ata anoku kaie.
26 Ano asaka aka-kahai sio wasoni osaka opusu-pusu me maunauna.
Ano me iake tau sio wasoni bisa oasau tewa ata no isanaya.
27 Ano manisate onate runa sio wasoni manisate onate.
Ne ano apasana sio wasoni no huna-hunau kahatena.
28 Ano apuheu sio wasoni ohati ruao tewa.
Ne ano arati sio wasoni ohati ruao.
29 Ano atieu rei sani kamane wani eresita-sita.
Ano atieu rei sani asita anei pumono wani erehoriku.
30 Ano akahaiku reiso au ukua sio wasoni oahita runaku.
Ano aunaku uamkona reiso usomani uniku kota nene pakelo wani sio onanai arihoni hatu onata.
31 Upuku Anahatana, ano me arena katopue.
Me anamanaya pusire uture manisata.
Ano mo atieu rei sani aniaue osi sio pusiso utuso wasoni oaraonoso tanua.
32 Hasae ano sahoro ano Anahatana.
Hasae ano sahoro anete araonoma atieu rei sani hatu tinaie.
33 Ano sahoro auna au uahita kua.
Ano auna anoku manisate.
34 Ano auna au urau aiku atua kuruta
atieu rei sani maianane ererau ai atua kuruta.
Ano akahaiku usihaku roe tineta mainaya.
Tinetaya waroni mainaya reiso we nisau osui kuaku tewa.
35 Ano atuheteku tau uahita
reiso ukua uhihi henue wani makae mainae.
36 Ano arui aniaue osiku wani unete ruaku tanui
reiso uamahaiku.
Ano akahai au ikine honue reini rotu-tu aunaku au mainae.
37 Ano auna arena hekani osiku
reiso aiku atue ereunihehiki tewa.
38 Usui we nisau rotu-tu owena-wena pusiso.
Uhunu pusiso utuso samatoro ununiku.
39 Uhunu pusiso utuso reiso ia osa-sa ihanu tewa nea.
Omata oama-manouso poe aiku atua.
40 Ano aunaku uamkona reiso uahita kua runa we nisau.
Ano auna we nisau pusiso utuso okanahata hahue tanuku.
41 Ano auna we nisau pusiso oruma orike totuku.
Uhunu pusiso utuso.
42 Oakapona, “Akahaiku ee.” Ne isa iakahaiso tewa.
Oakapona, “Upuku Anahatana akahaiku ee.” Ne ano apenea atinu tanuso.
43 Uhunu pusiso omataso atieu rei sani ai ehuka.
Uheta tau pusiso atieu rei sani uheta tau tapuna.
44 Ruaku we mansiau nanie ohunuku ne ano apuheuku.
Akahaiku reiso urime sio niana-niana sirinia.
45 Sio rakana okanahata ohahue tanuku.
Matoro oatinu we anamanae ne oatinu tanuku nea.
Tewa mo ano akahaiku.
46 Sio okaitau oahita runaku.
Okaitau rotu-tu okana-kananunu
reiso ohokaso arihoni tihua-tihua waroni oauhuniso tanure nanie osopa hanao.
47 Upuku Anahatana ano wani amahaia.
Uainaa runaya wani ano asaka aneteku
atieu rei sani hatu tinaie eresaka erenete.
Uhete nanamu ano wani apuheuku.
48 Ano sahoro ruamu auni siraka osi we nisau.
Ano sahoro arui kawasa osiku reiso urime sio niana-niana.
49 Ano sahoro apuheuku arihoni we nisau.
Ano sahoro auna au we untu tau we nisau.
Ano apuheuku arihoni sio kahatena wasoni nanie ohunuku.
50 Reiso uainaa runaya sui sio niana-niana.
Au uahina uainaa runaya.
51 Ano arui we untu mainae osiku suiosa.
Anomu runa au suiosa. Au wani ano ahitiku.
Anomu runa au runa wea upu wea momou rotu-tu ria supani.”