23
Daud ne Ahinae wani Muie Tunne
1 Areini mo Daud ne Ahinae Wani Muie Tunne:
“Au, Daud wani unika ahinae.
Amaku tau Isai.
Anahatana waini ia aihuhue ihiti au tau au mainae.
Anahatana waini Yakub iainaa runai ihitiku.
Sio Israel anoo runaku. Anoo runa au sahoro uahinaku.
2 Anahatana ne Inaha iaisosi au uanamana ukatiki.
Ne anamanaya waroni anoku.
3-4 Anahatana waini ita Israel iainaa runai ianamana.
Anahatana waini isaka ineteku sani hatu tinaie ianamana osiku. Iahata,
‘Ia sahoro irimeso ipusu maunaune mka iuna ne mansiau okarihuru oamahai.
Atieu rei sani ranie eresita tau omnanoe wani kaie ereuna atuhu raruhu mine-mineta rakarihuru ramahai.
Ia sahoro irimeso iamuira runa Anahatana mka iuna ne mansiau okarihuru oamahai.
Atieu rei sani uane suka oyo ranie eresita ereuna monota mine-mineta rakarihuru ramahai.’ 5 Anahatana itotoe ata mka irui iake osiku
runa wea upu wea momou tea.
Itotoe ata mka irui iake rotu-tu ria supani tea.
Reiso mka iapuheuku arihoni we nisau tea.
Mka irui pusire waroni uninare osiku tea.
6 Ne sio kahatena wasoni sani mono unia waroni sio opesire.
Sio ohohu oamanou mono unia tau hanao tewa.
7 Oakahuu tau alati mamono isa.
Tewa mo tau atiene hatae.
Monota raimo, sio oakanupure.