17
Husai Iakarota Absalom
1 Absalom ineke runa amai ne pinau suka oyo Ahitofel iaunaui honu. Iahata, “Atapiku uroma sio nihu hutusa rahana ua. Uromaso na mka-mka pumono upusu amamu na uahita runai. 2 Uahita runai pannuhu waira imankaei asi. Uasirai na ikaitau hunu ruai. Ikaitau hunu ruai oyo ne mamsakaya pusiso orumaso oarihoniki. Hasae amamu ruai sahoro mka uhunui. 3 Uhunui ne mka ne mansiau ununi urori pusiso mai osia. Mka onuniso mai tanua sisaa sani ia pina mausaha honue inuniki noi sahai on sini. Ne mansiau mka usiruso tewa. No kasiante mkanesini tewa oi. Hasae amamu sahoro uhunui.”
4 Ne maunaune rei, Absalom runa sio ona Israel pusiso oatinui iake.
5 Masike oatinu iake nea iae, Absalom ianaha runa Husai. Iahata, “Oaoi Husai mai na iatinu runa ne sou ee. Oaoi Husai ia Arki rei mai.”
6 Reiso Husai ihokai roe oyo Absalom isima runa Ahitofel ne maunaune rei. Isima suka oyo iasei. Iahata, “Ipusu ia ne maunaune rei te pene? Sani ipeneta mo asau mai. Ano me maunaune sapani?”
7 Iahata, “Upu. Ahitofel ne maunaune reini mo eresana. 8 Upuku ano anei tewa? Amamu runa ne mamsakaya mo sio manahitana wasoni oamkona, okaitau tewa. Sio mo sani binatang wani sio onana nene anaya reiso reahita erenina nene anaya. Isa honu amamu mo imaha nea tau iahita. Tewa mo iahita suiosa. Ineke ikata ne mamsakaya tewa. 9 Sani reini mo kani waira iauhuniki tau hatu nohue isa nea? Te iauhuniki noi naniai tamene isa honu. Pene rotu-tu amamu iahita ihunu me mamsakaya umau. Mka sio oatinu oasau oahata, ‘Sio wasoni opusu Absalom reimo oamnahu nea. Sio omata pusiso.’ 10 Reiso masike sio mamsakaya wasoni okaitau tewa iae okaitau sirinia. Masike sio wasoni okaitau tewa sani maisan erekaitau tewa rei. Tewa mo sio mai Israel reini pusiso oanei ata amamu ianei iahita. Pusiso oanei ata sio wasoni okatai mo, okaitau tewa.
11 Reiso sanrei mo pusu au we maunaune reini. Amanou sio Israel pusiso rotu-tu sio panesi sani sisia nau nuae. Amanou pusiso rurue erekotu rurue. Oyo ano ruamu ororiso na aoo roe uae na pusita iahita runa amamu. 12 Iahita runa amamu waimo sui supani isupui. Mka isoruso sani one tinia rasou tuamane pusiki. Mka sio umau osihaso tewa. Mka ihunu pusiso utuso. 13 Sani irumai iauhuniki roe kota isa mo, mka ita Israel pusita inoa roe kota rei ikohu numau pusire ininai. Ikohu numau nene hatu rai ikanihoo pusire tau awane samatoro irati pusire uture tau awane rei. Iratire pusu pupue wani nene sanene tinaie rei rotu-tu hoka poe ekote. Irati hatu rotu-tu roe pupue rei isupu hatu isa tewa nea.”
14 Absalom runa sio Israel pusiso oatinu Husai ne maunaune rei oahata, “Husai ne maunaune rei mo iake arihoni Ahitofel.”
Anahatana iunaso openeso oatinu tau Ahitofel ne maunau iake rei nanie Absalom isupu siraka.
Daud Sio Osipu Toha Wae Yordan
15 Husai isima runa Ahitofel uaso oaunau Absalom osi Zadok runa Abyatar. Zadok runa Abyatar wasoni sio mamkenu makapanau osi Anahatana rei. Isima osi uaso iahata, “Ahitofel iaunau Absalom runa sio ona Israel na opusu amai nene mono reipani na pusiso oahita runa umau. Ne au mo uaunaui na inapa iamanou sio soratatua panesi samatoro ipusu amai na oahita runa umau. 16 Reiso rapu na aisosi ia isa iasau osi Daud na pene oneke ria tihue wani nanie oeu ria otoe huie. Pene onekeso on mai hae. Irapu na osipu toha Wae Yordan. Tewa mo ia runa ne mansiau pusiso mka oahita runaso oyo ohunuso.”
17 Yonatan runa Ahimaas osaka orori sou osi Daud reiso orue oauhuniso onapa poe wae huhune wani nanae En-Rogel. En-Rogel wani haineke Yerusalem reiso ia pina makahaie isa isaka ieu-weu poe tanuso isima runa sou on roe Yerusalem osi uaso. Tewa mo pene rotu-tu sio umau onoo uaso oeu-weuso roe Yerusalem mka osima osi Absalom. 18 Ne ia pina makahaie rei ieu irori Husai ne sou rei ia hehuke isa inoo sio iki hanaia ua rei oyo isima osi Absalom. Reiso uaso orumaso ohokaso ria numa isa ria nia Bahurim. Poe numa nusue rei parike isa wapo. Reiso uaso onususo poe parike anoe rei. 19 Ia pina onate ria numa rei isou parike rei tau nipae isa samatoro iaunutu manei kania roe parike hahae rei. Manei nooi sani ana. Inete parike hahae rei reiso noo mosai tewa. Sio umau oaneiso tewa.
20 Absalom ne maisosia ohokaso ria ia pina rei ne numa. Oasei oahata, “Ahimaas runa Yonatan oi?”
Iahata, “Wasoni matoro osipu toha waene rei.”
Reiso onina uaso ne osupuso tewa. Oyo onuniso roe Yerusalem honu. 21 Onuniso oyo Ahimaas runa Yonatan uaso ohokaso arihoni parike rei. Ohokaso oyo uaso orumaso rapu ria Daud sio. Hoka ria oyo osima runa pusire. Oahata, “Ahitofel iaunau Absalom nanie oahita runaya. Reiso aeu rapu arihoni waene reini. Asipu toha waene on sini.”
22 Oyo Daud runa ne mansiau osipu toha Wae Yordan rotu-tu pusiso utuso ohokaso ria hae tau kinoke.
23 Ne Ahitofel ianei ata Absalom ipusu ne maunaune tewa reiso inuniki. Iapusaa naniai wani irue tanui roe ne keledai totu hahae. Keledai nooi sani naitanane ne ikine mani. Iapusaa naniai oyo inuniki poe ruai ne niane. Hoka poe oyo iaunau ne pina hehuke iautotu pusi ne numa hutae oyo iakatana ruai. Iakatana ruai oyo imatai. Imatai nea oyo okaniki poe amai ne kupuro nusue.
24 Daud sio oeu rotu-tu ohokaso ria nia Mahanaim. Tau rei Absalom sio wasonau osipu toha Wae Yordan ikata sio Israel umau. 25 Absalom ihiti Amasa tau ia kapitane tau sio soratatua Israel ikati Yoab. Amasa mo amai tau Yitra ia Israel. Inai tau Abigail. Abigail amai tau Nahas. Abigail mo kakai tau Zeruya, Yoab inai. 26 Absalom runa ne soratatua onekeso nau otoe Gilead.
27 Ne Daud sio mo ohokaso ria Mahanaim. Hoka ria Sobi, Makhir runa Barzilai tonuso onapaso. Sobi mo amai tau Nahas. Nahas ne niane tau Raba ria otoe Amon. Makhir mo amai tau Amiel ia Lodebar. Barzilai mo ia on nau nia Rogelim nau otoe Gilead. 28 Tonuso onapaso orori nakau waroni oatanunu tanure. Orori kinoa. Orori muaina sani manei, hotone, tariku, manei masininate, kihue msinae, kihue mainae, 29 kilalante, susu matae, rompau runa keju. Orori pusire osi Daud runa ne mansiau. Tewa mo oanei ata Daud runa ne mansiau omakaneaso, anoo kasaya. Tewa mo oeu rotu-tu eresuni-suniso on nau otoe huie.