14
Yoab Inina na Daud ne Iake runa Absalom
1 Yoab ianei ata Daud anoi ererihu runa Absalom nea 2 reiso iaisosi sio onoo runa ia pina isa waini ianei ianamana iake. Ia pina rei iruei poe nia Tekoa. Tau ia pina rei hokai oyo Yoab iahata, “Eu mai ina na uasau runa sae isa reini osia ee. Aeu roe ia onate aia ne numa na akarota ata atamisi sio matana. Reiso ausahu apia mananokona. Pene asisi unumu. Auna sani ia pina waini iatamisi potuina reini nea. Iatamisi ia waini anoi runai. 3 Ausahu api mananokona oyo aeu roe ia onate aia ne numa na asau osiki sanrei. Ahata, ‘Sahaku imatai nea. Au ruaku uauhanuku runa we hehuka hanaia ua. Ne taue isa uaso oatana runa umau. Oyo ia manaonete inesi ia muie reiso ihunui. Muie reini we ipane taue nanie ohunu anaku hanaie manaonete rei. Ne sani ohunui mo amai ne numa sohoi. Reiso akahaiku na asopo na pene ohunu anaku hanaie rei.”
4 Reiso ia pina rei ihokai roe oyo ikanahata ihahue. Iahata, “Upu. Akahaiku ee.”
5 Iahata, “Sae rei?”
Iahata, “Upu. Au pina reini una we sou uhanu. Umosokiniku. Sahaku imatai nea. 6 Ruaku uauhanuku runa kata we hehuka hanaia ua. Ne nene taue isa uaso oatana runa umau pani nisi. Nisi rei huie reiso sio umau oneteso tewa. Reiso oakarema runa umau rotu-tu ia manaonete inesi ia muie oyo ihunui. 7 Reiso muie reini ipane taue anoo rasaa tanuku onina nanie ohunui. Oahata, ‘Atapi ia waini ihunu wanini rei osima, na ahunui ipusu wanini. Ihunu reiso kahurae apasanai na ahunui. Ahunui na ami asupu ne rusuni numa hutae ne rusun atuhu ai nohua.’ Reiso uainisi arihonia na akahaiku ee na pene ohunui. Tewa mo nesi ia ruai mani. Ia sani usa hanae osa mani. Sani usa hanae rei erematai oyo mka usa ereai tewa nea. Reiso ia sanrei oi. Ohunui oyo ne numa matae sohoi.”
8 Iahata, “Iake. Anunia ne mka uakahaia tau parakana rei.”
9 Iahata, “Upu. Au uanei ata pusu maunaune mo ihunu, reiso kahurae sio ohunui. Ohunui tewa sio osana. Ne sani ohunui tewa au runa we ipane taue sahoro ahana isanae rei. Ne ano mo tewa.”
10 Iahata, “Sani sio umau nanie oakapuku tanua mo aroriso mai. Ne uaunauso mka ereeu oakapuku tanua tewa nea.”
11 Iahata, “Upu. Uainisi arihonia na ano ainisi tau Anahatana waini ano ainisi ainaa runai. Ainisi na Anahatana inete ia waini nanie ihunu anaku ipusu wanini. Pene rotu-tu ia isa honu imatai.”
Iahata, “Usopa tau Anahatana waini iamahaiku anamu hanaie rei mka ne kasiante mkane te hua wenne isa iae remnahui poe tuamane tewa oi.”
12 Iahata, “Upu. Pene akapuku kee na uasau mkane honu.”
Iahata, “Iake. Anamana roe.”
13 Iahata, “Upu. Nanie auna iake osi anaku hanaie sanrei tau sae? Aikee ano ruamu anamu hanaie apesiki waimo hainau. Amuna na arui iake osi Anahatana ne mansiau pusima tewa? Anomu runa au anaku hanaie nanie arui iake osiki ne anomu runa anamu hanaie ruai tewa. Atapiki inuniki tewa tau sae? 14 Imatata mo areino rotu-tu ria supani. Ne sani sio ua openeso tau umau areimo kahurae rotu-tu ria supani tewa. Imatata mo noota sani tihu wani sio ohui poe tuamane mka oripai honu tewa nea. Ita iae imatata ne iamahaita tewa nea. Ne sani sio ua oakapuku tau umau mka rotu-tu ria supani tewa. Sani sio wasoni opalalosa mo noo sani sio no nisa runa Anahatana. Ne nisa rei kahurae rotu-tu ria supani tewa. Anahatana anoi runaso nanie irui iake osiso reiso inina arena na oheu nisa rei.
15 Reiso uhokaku mai uainisi arihonia tewa mo we ipane taue oakapuku tanuku reiso ukaitau. Reiso uasau pani anoku ueuku mai tanua na uasau osia. Na hitio atinu we sou reini na akahaiku. 16 Akahaiku na apuhai au runa anaku hanaie arihoni we ipane taue wasoni nanie ohunu uama na osupu rusuni numa hutae rusuni atuhu ai nohua waroni Anahatana irui osima. 17 Uparisaa ata mka asoposo oyo anoku ereuponu tewa nea. Tau ano upuku mo noo sani Anahatana ne maisosie on roe noiyaha waini ianei sae wani iake runa sae wani kahatene. Uainisi na Anahatana waini ano ainisi ainaa runai mo ikata runaya.
18 Iahata, “Au nanie uasau runa sae isa osia. Pene auhuni.”
Iahata, “Upu. Asau roe.”
19 Iahata, “Yoab sahoro iaisosia reisi?”
Iahata, “E-e. Usopa ata Yoab sahoro iaisosiku mai. Iaunauku na uanamana rai pusire osia. Au unoo ata ano anei panesi reiso ia isa mka iakarotaya tewa. Reiso uauhuni arihonia tewa. Yoab sahoro iaisosiku reini. 20 Inina na pene anomu eresaa tau anamu hanaie nea. Upu. Ano anei panesi sani Anahatana ne maisosie on roe noiyaha. Ano anei pusire waroni raeu mai Israel.”
21 Ia pina rei ianamana runa Daud suka oyo inuniki samatoro Daud ianaha runa Yoab. Hoka mai oyo iahata, “Ano anina na pene anoku eresaa tau Absalom nea. Reiso aeu na aoiki na anuni roriki mai nea.”
22 Hoka mai oyo Yoab ikanahata ihahue tau Daud iahata, “Uainisi na Anahatana irui iake osia. Tewa mo ranie hatae reini samatoro uanei ata ano me iake runaku reiso atinu tau we anamanae rei.”
23 Ianamana suka oyo ieui na pani nia Gesur nanie inana Absalom inuniki poe kota Yerusalem. 24 Hoka roe ne Daud iasau iahata, “Kahurae iruei poe ruai ne numa. Upeneku tau unoo uai anoe.” Reiso Absalom inuniki ria ruai ne numa, inikui roe amai tewa nea.
Absalom Ieui roe Amai
25 Sio oainaa runa Absalom tewa mo ia iake tunne pani Israel pusiki. Ia pasa-pasanisie on poe tanikui tuhua rotu-tu roe ne hua wenna. 26 Ne huau kapitoruna. Iatori ne huau rai musum osa iatorire nai osa. Tewa mo mtinta mainae. Ne huau waroni iatorire rai mtinta sani kilo ua nesi. 27 Absalom ne hehuka hanaia tonu, anai pina osa. Anai pina rei ia iake tunne. Nanai Tamar.
28 Absalom inuniki on poe Gesur iruei mai Yerusalem musum ua nea ne ieui roe amai tewasi. 29 Reiso nene taue isa ianaha runa Yoab nanie ieui roe amai. Ne Yoab ihokai mai tanui tewa. Ita Absalom ianaha runai taue isa honu. Ne Yoab ihokai mai tanui tewa sirinia. 30 Reiso iaisosi ne makahaia. Iahata, “Oanei Yoab ne nisi wamo haineke au we nisi nusue? Nisi wani orahu hotone tanui. Oakanupu nisi rei.”
Reiso ne makahaia rei oeu oakanupui.
31 Yoab inoo sanrei oyo ieu roe Absalom ne numa. Hoka roe iahata, “Amuna na me makahaia oakanupu we nisi rei?”
32 Iahata, “Uanaha runaya nanie uaisosia roe amaku na asau runa we sou reini osiki ne apenea ahoka mai so uakanupui rei tea. Nanie uaisosia roe amaku na asei runa sapani na au ueuku arihoni Gesur na ununiku mai Yerusalem reini. Nene iake mo pene ununiku mai rei nea ne urueku pani Gesur mani. Urueku mai rei unoo amaku uai anoi tewa sirinia. Muie reini au unina na ueuku roe amaku ruai. Ueuku roe amaku na sani au usana mo iapasanaku na umataku.”
33 Ianamana sanrei suka oyo Yoab ieui roe Daud nanie iasau runa Absalom ne anamanae rei osiki. Reiso Daud ianaha runa Absalom. Sani rei oyo Absalom ieui roe tanui. Hoka roe oyo ihahue tau amai oyo amai imukiki.