13
Amnon Inesi Tamar
1 Amnon runa Absalom noa ama tau Daud, ne noa inau sakakau. Absalom hotai susu tau Tamar. Ia iake tunne naiosa. Reiso Amnon anoi ereotoi. 2 Anoi ereotoi reiso nanie inekei runai. Tamar ia pina hehuke asi reiso sio osakai na pene ikata sio hanaia. Osakai reiso isupu arena na inekei runai tewa. Ne anoi erenoa-noai suiosa reiso rotu-tu ikupui.
3 Amnon kakai isa tau Yonadab. Yonadab amai tau Simea, Daud kakai. Uaso noo sani oi neta tau umau. Yonadab ianei ianamana erekaisunu eresaai. 4 Yonadab iasei tau Amnon. Iahata, “Wani. Amuna na onone ranie nooa noo sani anomu kasiane rei? Kasiane tau sae rei?”
Iahata, “Anoku ereoto Tamar, waniku Absalom hotai rei.”
5 Iahata, “Areimo iake. Karahirine mani. Anekea roe naniamu na akarota ata akupua. Mka amamu iatinu na ihokai roe inooa. Asau osi amamu ata, ‘Ama aisosi Tamar ieui mai na iatanunu osiku ee. Iatanunu mai uaku anoe na ikopaku.‘”
6 Reiso Amnon inekei roe naniai rei iakarota ikupui. Amai iatinu oyo roe inooi. Reiso Amnon iasau osi amai. Iahata, “Ama. Aisosi hotaku Tamar mai iatanunu osiku ee. Mai na ikotu poroti mai uaku anoe reini na mka ikopaku.”
7 Oyo amai iaunau runa Tamar. Iaisosi sio umau oeu roe ne numa aia na oasau osiki. Oahata, “Aeu pani hotamu manaonete ne numa na atanunu osiki.”
8 Reiso Tamar ieui poe hotai ne numa waipo inekei poe naniai. Tamar ihoka poe oyo inana poroti wani sio onehui nea samatoro iposoi nanie ikotui tau poroti. Ikotui mai hotai uai anoe. 9 Ikotui suka oyo ihokai arihoni naniai nanie inatare osi hotai na iaire. Ne hotai ipenei iai. Iahata, “Ohoka pusimo.”
Ohoka pusiso oyo numa anoe huie. 10 Ohoka pusiso iasau osi hotai iahata, “Rori muaina mai kamar mai naniaku reini. Rorire mai na akopaku.”
Reiso hotai ipusu irorire pani kamar nanie ikopai. 11 Ne waini nanie ikopai ne isupu ikopai tewa oi. Tewa mo hotai iakahuui iahata, “Hota. Mai uata ineketa.”
12 Iahata, “Pene, hota. Pene anesiku auna hali rei. Ita Israel iuna pumaa sanrei iake tewa. Pene una turuhakan sanrei. 13 Iuna sanrei sahoro uauhuni we kaumaate rei sui supani? Ano iae mai Israel mka sio oamuiraya tewa. Nene iake mo asau osi amaku mka ialapasiku osia tau sahamu.”
14 Ne hotai pene iatinu tanui. Ia sahoro iamkona mainae rotu-tu inesi hotai oyo ineke runai. 15 Onekeso suka oyo hotai ipene tenie tau hotai Tamar. Ipene tenie tanui rei erenesi on mataanoe anoi ereotoi rei. Reiso iahata, “Ahokaya.”
16 Iahata, “Pene. Amuna na aunaku sanrei hota? Aneiku mo me turuhakan rei mainae erenesi wani anekea runaku rei.”
Ne hotai ipenei iatinu tanui. 17 Reiso ioi ne ia makahaie isa iahata, “Mai na ahoka arori ia pina reini. Na akatunepa mitanunue.”
18 Reiso ia makahaie rei ihoka irori ia pina hehuke rei samatoro ikatunepa mitanunue.
Tau Tamar ne naene mo sio pina hehu aiau mo kahurae oatei papi naua-naua waroni marainia. 19 Ne inekei runa hota nea reiso ikiha ne papi naue rei mai tinaini. Tewa mo iaumaa hunu ruai. Iaunutu otumatae roe unui. Iakasope hanai roe unui ieui irani-rani rotu-tu ihokai poe numa.
20 Hoka poe oyo hotai Absalom inooi oyo iasei, “Kani hotamu Amnon inekei runaya? Inekei runaya reiso amaturua mani nea. Pene anomu erepeka-peka runai. Ia mo hotamu ruai. Pene auna purie osi sio panesi oatinu.”
Oyo Tamar ruai iruei poe Absalom ne numa. Ne anoi kasiane. Anoi repunoko ruai.
21 Tau amai iatinu sanrei reiso anoi eresaa hunu ruai. 22 Absalom anoi erenuku-nuku erenaka-naka. Reiso ipenei ianamana runa Amnon. Iuna pumaa hotai reiso penei tanui.
Absalom Ihunu Amnon
23 Ereeu nene musum ua nau sanrei oyo Absalom ne makahaia nanie oatori rompa nene hunua na oahenire osi sio wasoni ohoni papita tanure. Reiso ouna maise onate. Sio oatori rompau nene hunua rai poe Baal-Hazor haineke otoe Efraim nene nenene. Ouna maise onate reiso inoti runa nea kakau nea waniu. 24 Ieu roe amai na isima osi amai na inoti runa amai oi. Iasau osi amai, “Ama. Saka aeu poe we maisene rei oi. Ami atori rompau nene hunua reiso auna maisene. Reiso asaka ahoka poe runa me sio onata mai me numa aia anoe.
25 Iahata, “Pene anoti pusima anaku. Tewa mo sani pusima ahokama poe aunaya resuni-sunia.”
Ne Absalom itentene tau amai sirinia. Ne amai iae ipenei tau ihoka poe oi. Hasae iainisi na Anahatana irui iake osiki.
26 Oyo Absalom iahata, “Ama. Ano aeu tewa sanrei mo, atapi kakaku Amnon ieu ikatama.”
Iahata, “Ruae nea. Ia pene ieu nea.”
27 Ne Absalom iasau suiosa inesi amai. Reiso amai irui kakai Amnon runa nea waniu tamena rei oeuso okatai.
28 Hoka poe oyo Absalom inata muaina osiso. Ia iasau osi ne maisosia iahata, “Osaka ono-noo Amnon sani iamseni mainae nea tau ininu anggur areimo osaka ohunui. Pene okaitau. Au sahoro uhana sou rei. Kahurae oapamese anomo pene omoni-moni.”
29 Reiso ne maisosia ohunui pusu Absalom iasau rei. Nea waniu onoo sanrei oyo oruma osaa no naitana ikina oyo orumaso.
30 Oruma onuniso wasoni na poe arena sama tihue asi, sio umau osima osi Daud nea. Oahata, “Upu. Absalom ihunu pusi me hehuka hanaia nea. Pusiso omataso nea.”
31 Noa ama iatinu sanrei oyo iatamisi ne hehuka reiso ihitio ikiha ne papite oyo inekei poe tuamane. Ne makahaia pusiso okiha no papita oi. 32 Ne Yonadab, Simea anai rei iatinu. Simea mo Daud kakai. Iatinu oyo iahata, “Mema. Pene anomu reupono ata me hehuka hanaia pusiso omataso. Ne hasae Amnon mani sahoro imatai. Tewa mo on Amnon inesi hotai Tamar rei mo Absalom isaka nanie ihunui. 33 Reiso pene atinu tau sou rai ata me hehuka hanaia pusiso omataso. Tewa mo sio wasoni omataso hasae Amnon ruai mani.”
34 Ia mamsaka Daud ne numa aia inoo sio panesi omusu on roe pupue on poe Horonaim. Inoo sanrei oyo ieu poe isima osi Daud. 35 Ne Yonadab iasau osi Daud sanrei, “Mema, me hehuka hanaia reimo poe tea. Manisate sani sinasi uasau rei.”
36 Ianamana suka oyo sira tau Daud ne hehuka hanaia onusu pani numa anoe. Orani reiso Daud runa ne makahaia opusu orani pusiso.
37-39 Absalom ihunu kakai suka oyo irumai. Irumai pani momoi waini iuna aia pani otoe Gesur. Momoi rei nanai Talmai, amai tau Amihur. Iruei pani rei rotu-tu musum tonu.
Daud iatamisi Amnon onone ranie rotu-tu potuina. Ne ereeu rotu-tu anoi kanihue runai mkane-mkane nea reiso anoi ererihu runa Absalom nea.