12
Natan Iaunau Daud reiso Iatamisi ne Rosau
1 Anahatana iaisosi Natan roe Daud. Natan mo ia mamsima runa Anahatana ne maunauna. Hoka roe oyo iahata, “Upu. Sio mansiau ua wasoni orueso tau niane isa. Ia isa ia kaya, ia isa honu ia mosokinie. 2 Ia waini ia kaya rei ne koropou runa rompau panesi. 3 Ne ia waini ia mosokinie rei mo hasae ne rompa osa mani. Rompa osa rei ihanei on ikine asi. Rompa ikine pina rei iapiarai rotu-tu mainae mai ne numa anoe. Ereruei pani numa anoe erekata ruai runa ne hehuka. Ipanai tau ruai ne muaina. Iunai ereninu tau ne koinanae. Erenekei mo inahiki. Noo sani anai pina ruai.
4 Nene taue isa ia isa ihokai mai ia kaya rei ne numa. Ne ia kaya rei ipenei irehe ne rompa isa te ne koropou isa osiki na ipanai. Reiso inana ia mosokinie rei ne rompa hata osa rei. Nanie irehiki osiki na ipanai.”
5 Daud iatinu rei oyo anoi eresaa hunu ruai tau ia kaya rei. Reiso iahata, “Usopa tau Anahatana waini iamahaiki. Ia kaya reimo kahurae ohunui. 6 Kahurae ikati rompa osa rei tau rompau ate. Ia kaya rei mo anoi runa ia mosokinie rei tewa.”
7 Iahata, “Ano sahoro ia rei. Areini sahoro Anahatana waini ita Israel iainisi iainaa runa iasau. Iahata, ‘Uhitia tau aia nea na arime sio Israel. Usakaya arihoni Saul nea. 8 Saul ne pinau uruiso osia nea. Uhitia tau aia akati Saul nea na arime sio Israel runa sio Yehuda. Samatoro sani rai ralai tewa, mka uakapena panesi osia honu. 9 Amuna na apenea tau we maunauna rai? Amuna na auna kahatena rai? Ano aisosi sio ohunu Uria, ia Het, poe manahitane. Ano atapiki osi sio Amon ohunui oyo anana sahai tau sahamu. 10 Ano atinu tanuku tewa. Ano anana Uria sahai. Reiso mea upu mea momou mka naene isa sio hunu sio umau. Mka naene isa honu sio ohunu sio uasa tonusa honu rotu-tu ereeu ria supani. 11 Tau ruamu me numa matae mka urui siraka. Mka unana me pinau oyo uruiso osi me mansia isa ruai noi mata kahutue ruamu anooso. Mka ineke runaso iauhuni tewa. 12 Ano apalaosa mo auhunia. Ne uapasanaya sanrei mka sio Israel pusiso onoo.”
13 Iahata, “Upalalosa tau Anahatana.”
Iahata, “Upu. Anahatana isiruheu me rosau rai nea reiso mka amataya tewa. 14 Ne upu ano auna pumaa tau Anahatana reiso mka re nisau oatinu oyo oaumaniki. Reiso mka anamu hanaie waini nanie iamrai rei mka imatai.”
15 Natan ianamana suka sanrei oyo inuniki poe ne numa.
Daud Anai Hanaie Imatai
Uria sahai, Batsyeba iruei runa Daud anai. Ia iki hanaie. Ereeu potuina tewa oyo Anahatana irui kupue osiki. 16 Oyo Daud iai-ainisi tau Anahatana na ia ikine rei iake. Reiso iamaoni. Inekei poe tuamane rotu-tu manahane. 17 Sio ona mamsakaya roe ne numa ooso mai nusui oasau. Oahata, “Hitio roe. Pene anekea poe tuamane.”
Iahata, “Upeneku.”
Oahata, “Hitio na aia.”
Iahata, “Upeneku uai.”
18 Nene onona itu oyo ia ikine rei imatai. Ne Daud ne makahaia okaitau osima osiki. Oahata, “Ia ikine rei on iamahaiki asi mo ita iasau iatinu tanuta tewa. Reiso sira tau isima osiki oyo inina arena mka ihunu ruai.”
19 Ne Daud inoo ne makahaia oara-rahuhu osi umau samatoro ianei ata ia ikine rei imatai nea. Oyo iasei tanuso. Iahata, “Ia ikine rei imatai nea?”
Oahata, “E-e. Imatai nea.”
20 Oyo ihitio arihoni tuamane rei. Ihitio oyo isohui, isisi unui, ituka ne apia, oyo ieui roe Anahatana ne numa mainisie oyo iainisi iainaa runa Anahatana. Iainisi suka oyo inuniki poe ne numa oyo iasau osi ne makahaia onata muaina osiki iaiki.
21 Ne makahaia oasei, “Amuna na auna sanrei? Oni ia ikine rei iamahaiki asi mo amaoni, arani, anekea poe tuamane. Ne tau imatai nea oyo ahanua nanie aia!”
22 Iahata, “Oni ia ikine rei iamahaiki mo au uamaoni, urani hitio Anahatana anoi runaku na irui iake osiku na iamahaiki. 23 Ne muie reini oimo imatai reiso nanie una sae oi? Nanie uamaoni sui osa tau sae? Kani mka uapuhaiki honu? Ne pani muie mka upusui. Ne ia mo mka inuniki mai au mai tuniai tewa.
24 Ia ikine rei imatai reiso Batsyeba anoi repunokoi. Ne Daud iasau osiki, “Purumene. Pene anomu kasiane.”
Oyo uaso onekeso reiso Batsyeba tinaini taua honu. Oyo anai iamrai, ia iki hanaie. Ohete nanai tau Salomo. Anahatana anoi runa ia ikine rei. 25 Reiso iaisosi Natan roe tanui. Natan mo ia mamsima runa Anahatana ne maunauna rei. Anahatana iaisosiki na iasau osiso na ohete Salomo nanai isa honu.
Daud ne Untu tau sio Raba
26 Tau nene muie rei Yoab iahita runa sio Amon poe nia Raba. Iwahu no aia ne numa hatu wani makae. 27 Reiso iaisosi sio umau osima osi Daud. Iahata, “Au uahita runa sio Raba rotu-tu uwahu no aia ne numa hatu wani makae. Usaka no waene nea na pene oripai. 28 Reiso mai na upu amanou re soratatua nesia rei na oahita runa niane rei. Oahita runa rotu-tu inusu irue tanui. Tewa mo mka pani muie sio oainaa runa au. Oasau ata au sahoro uwahure. Reiso upuku ruamu aeu mai na oainaa runa ano.”
29 Iatinu sanrei oyo Daud iamanou ne soratatua nesia rei oyo oeuso poe Raba. Hoka poe oyo onusu oahita rotu-tu orue tau niane rei. 30 Oyo Daud inana sio no aia ne topi aia. Topi rei nene mtinte kilo hutu tonu rahana nima sanrei. Sio opunu hatu kino-kinoa waroni hunonia mainaya tanui. Daud inana hatu isa arihoni topi rei ipunui tau ruai ne topi aia. Daud sio iae owahu apia panesi arihoni niane rei. 31 Owahu sio mansiau oi. Owahuso na ounaso opakarian osiso. Oaisosiso opakarian tau karakaia, lawanka mamono, runa tumaneu. Opakarian ouna hatu tena. Daud sio oaisosi sio Amon sui nia tamena sanrei oi. Oyo Daud runa ne soratatua pusiso onuniso roe kota Yerusalem.