7
Anahatana Itotoe osi Daud
1 Anahatana isaka aia Daud arihoni ne nisau pusiso. Reiso iruei pani ne numa aia. Ihiti nisa tewa nea. 2 Taue isa ioi Natan, ia mamsima runa Anahatana ne anamanaya. Ioiki oyo ihoka. Daud iahata, “Masi anoo. Au wani urueku mai numa aia wani sio onanai arihoni ai neune. Ne Anahatana ne kotane wapani ereruei tau numa wani sio onanai rerihoni makapana unta mani!”
3 Iahata, “Upu. Auna sae wamo asau runai rei. Tau sae, Anahatana ikata runaya.”
4 Ne nene pumono pani sanrei Anahatana iahata, 5 “Natan. Saka asau osi aia Daud, we manorine. Ahata, ‘Ano nanie anana numa osi au si? 6 Oni au ualapasi omi Israel arihoni sio Mesir wasoni ounamo tau manianeu rotu-tu reini au urueku noi numa iake isa tewasi. Ne usuka-suka na urueku mai numa wani sio onanai rerihoni makapana unta sirinia. 7 Oni usuka-suka runa omi Israel, au uasei arihoni onana numa arihoni ai neune on pani Libanon osiku tewa tau hae? Uasei tau sio wasoni orimemo tewa. Orimemo osaka we mansiau sani ia mamsaka rompa isaka ne rompau. Au uasei runa numa wani iake rei rerihonimo tewa.
8 Reiso asau osi aia Daud we manorine rei. Ahata, ‘Au mo, au Anahatana wani we kawasa mainae erenesi pusire. Unanaya arihoni asaka-saka me rompau sui otoa wani nene monota. Unanaya na uhitia na asaka we mansiau sio Israel. 9 Ukata-kata runaya sui supani mani. Ahita, au uakahaia na ahunu-hunu me nisau pusiso. Au nanie una nanamu mainae sani sio wasoni sio mainaya erenesi sio mainaya pusiso mai tuniai reini. 10 Au mka urui otoe osi we mansiau, sio Israel. Uruiki na uautueso mai tanui. Otoe rei osi sio ruao. Sio umau mka oakaremaso tewa nea. Sio kahatena mka ouna sinsaraso sani naone tewa nea. 11 Naone uhiti sio mainaya ne sio kahatena ouna sinsaraso sirinia. Ne mka au una na pene ahita runa me nisau nea. Au mka una me numa erekikasi. 12-13 Mka akore-korea amtuaya oyo amataya apusu mea upu mea momou oyo uhiti anamu hanaie isa ikatia iuna aia. Ia sahoro mka inana au we numa. Au unai irime we mansiau ro-rotu-tu ria supani. 14 Mka ioi au tau amai, au uoi ia tau anaku hanaie. Munata isana, mka uhitai sani amai ihita anai. 15 Ne au mka anoku runai sirinia sani naone utotoe rei. We anamanae wani utotoe rei mka anoku erepeka runai sirinia. Urati Saul na uhiti ano. Ne mka urati mea upu tewa. 16 Mka me numa rekawana rotu-tu ria supani. Ia isa arihoni mea upu mka irime aia rotu-tu ria supani.‘”
17 Reiso Natan isima osi Daud runa sae waroni Anahatana iasau osiki rei.
Daud Iainisi
18 Natan isima runa Anahatana ne anamanaya osi aia Daud suka oyo Daud inusu pani Anahatana ne numa. Iruei nanie iainisi. Iahata, “Upuku Anahatana wani ano arime tuniai reini. Au reini mo, au seia? Au runa we pina hehuka ami seiso rotu-tu asakama ia-ia na ahiti au urime me sio Israel reini? 19 Upuku ano wani arime tuniai reini. Erenesi rei, ano atotoe osi au, me maniane, rerihoni wea upu wea momou pani muie. Masike au tumata iae, ano atotoe rerihoni wea upu wea momou sirinia. 20 Ita uasau runa sae osia honu? Ano anei pusire rerihoni au, me maniane reini, Upuku wani arime tuniai reini. 21 Ahiti au tau aia runa pusire pusu me anamanaya. Pusu ruamu me maue. Ahiti au tau aia reiso atuhete, me maniane au nea.
22 Upuku Anahatana ano wani arime tuniai reini. Ano mo, ano mainae naiosa. Hasae ano sahoro ano Anahatana. Ia isa mai tuniai reini sani ano tewa. Naone sio osima sanrei nea reiso ami anei ata ia isa sani ano tewa. 23 Mai tuniai reini pusiki sio umau sani me mansiau ami Israel tewa. Hasae ami Israel reini sahoro ano apuheuma arihoni sio wasoni ounama tau manianeu. Apuheuma na aunama tau me mansiau. Auna sima-simana waroni mainaya sani auna waene erenuniki remanou on ria hae on nau hae na mania upu onikuso pusu kaimenne kua tihue. Auna sima-simana waroni rasiraso sani auna waene ereneniki tau nasi na apuheu mania upu arihoni otoe Mesir. Ano anei sio niana runa no anahatanau waroni titue tewa arihoni no niana. Reiso sio mai tuniai pusiso ohete-hete nanamu. 24 Ano auna ami Israel tau me mansiau rotu-tu ria supani. Upuku ano auna Anahatana tau ami pusima nea.
25 Reiso Upuku Anahatana au uainisi na asui sae wani atotoe rerihoni au, me manorine, runa mea upu. Asuiki 26 na sui supani-supani mani sio oai-ainaa runaya. Oahata, ‘Upuku Anahatana wani me kawasa mainae erenesi pusire, ano mo, Anahatana wani ano arime ami Israel.’ Ia isa rerihoni wea upu mka irime ami Israel pusima.
27 Upuku wani me kawasa mainae erenesi pusire. Ano mo, ano Anahatana wani ami Israel ainisi ainaa runaya. Ano ruamu asima osiku, me manorine, ata mka wea upu ouna aia tau sio Israel pusiso. Reiso ukaitau uainisi arihonia tewa. 28 Upuku wani ano arime tuniai reini. Ano mo, Anahatana. Ami aparisaa sae wani atotoe. Atotoe arihoni sae wani iake osi au, me manorine. 29 Reiso au uainisi arihonia na anomu iake arui iake osi wea upu. Arui iake osiso rotu-tu ria supani. Upuku wani ano arime tuniai reini. Ano atotoe tau pusire nea mka arui iake osi wea upu rotu-tu ria supani.”