9
Daud Ioi Mefiboset Iruei mai Kota Yerusalem
1 Taue isa Daud iasei, “Sio umau arihoni Saul ne mansiau wasoni oamahaiso asi? Munata wasoni au nanie una iake osiso tau we neta Yonatan.”
2 Sio oaisosi Saul ne maniane isa nanai Ziba ihokai mai Daud. Hoka mai oyo iahata, “Ano mo, ano Ziba si?”
Iahata, “E-e. Upu.”
3 Iahata, “Saul ne mansiau umau wasoni oamahaiso asi? Au nanie una iake tanuso tau au utotoe osi Anahatana nea.”
Iahata, “Upu. Yonatan anai hanaie isa waini. Ne ieui iseu-seu.”
4 Iahata, “Wani iruei supa?”
Iahata, “Waira iruei ria Makhir ne numa. Amiel anai rei. Wasora orueso ria nia Lodebar.”
5 Reiso Daud iaisosiki na ioi Yonatan anai hanaie rei.
6 Yonatan anai hanaie rei nanai Mefiboset. Reiso ihokai mai tanui oyo ihahue tanui. Iamuirai.
Daud iahata, “Mefiboset.”
Iahata, “Oe. Upu.”
7 Iahata, “Pene kaitau. Au mka unaya iake pusu amamu Yonatan. Momomu Saul ne tuamana pusire, mka uruire osi ano runa mea upu rotu-tu ria supani. Ne ano mka aia akataku mai numa aia suiosa.”
8 Ihahue honu oyo iahata, “Au reini au seia, upu? Na nanie auna iake tanuku reini. Au sani asu wani erematai nea rei tea.”
9 Oyo Daud ioi Ziba, Saul ne maniane rei. Iahata, “Saul runa ne mansiau numa hutaya pusire nanie uruire osi momoi reini. 10 Reiso ano runa me hehuka runa me makahaia pusimo kahurae opakarian tau numa hutaya rai. Orahu osiki na nene huaya rai, oruire osiki na akaponu ne numa. Ne Mefiboset mka iaiki mai numa aia rotu-tu imatai.” (Ziba ne hehuka hanaia sio hutusa rahana nima. Ne makahaia sio hutu ua.)
11 Ziba iahata, “Upu. Sae waroni aisosiku unare mka upakarian tanure.”