6
Daud Sio Orori Anahatana ne Kotane roe Kota Yerusalem
1 Daud sio no untu tau sio Filistin oyo inini ne soratatua nihu hutu tonu mai Israel. Ininiso na oamanouso. 2 Ikataso poe Baale-Yehuda. Oeu poe na onana Anahatana ne kotane wani sio oaiinu maunauna hutusa pani anoe. Kotane rei, sio oaoiki tau Anahatana waini ne kawasa mainae erenesi pusire. Kotane rei, sio ouna siaie hunahane tanui. Sio maisosia on roe noiyaha wasoni no kihena orueso roe hahae. Siaie rei eresou erenete kotane rei. Anahatana iruei irime tuniai reini paka sio maisosia rei tihue. 3 Reiso Daud sio onana kotane rei arihoni Abinadab ne numa. Ne numa waro pupue. Onanai samatoro oapusaai roe kareta honue wani koropou ranesai. Abinadab ne hehuka hanaia uaso, Uza runa Ahio orori arena. Uza hae kareta nusue, 4 Ahio roe uae. 5 Daud runa sio Israel pusiso oeu omara-maraso roe uae. Omara-maraso okaumini rotu nanie hunu ruao runa ohete ahinaya oainaa runa Anahatana. Oaise maisena ua noore sani gitar. Oaise tihane wani nene hou-hou rahori nusue runa maisena ua honu waroni sio okekure.
6 Ohokaso mai Nakhon ne tihue wani sio opapa manei mai tanui. (Manei nooi sani ana.) Koropou ramasiru reiso Uza iakahuu kotane rei na pene remnahui. 7 Ne Anahatana anoi eresaa tanui. Iakahuu kotane iamuira Anahatana tewa reiso anoi eresaa. Anoi eresaa reiso ihunui mai kotane nusue. 8 Reiso ohete tihue rei tau Peres-Uza. Nene manariti “Anahatana anoi erehitioi tau Uza.”
Daud anoi eresaa tau Anahatana ihunu Uza. 9 Anoi eresaa ne ikaitau Anahatana. Reiso iahata, “Sapani na urori kotane rei?”
10 Reiso irori kotane rei na roe Yerusalem tewa. Iaunutui mai Obed-Edom ne numa. Ia arihoni nia Gat. 11 Kotane rei ereruei hunana tonu mai Obed-Edom ne numa reiso Anahatana irui iake osiki runa ne numa hutae pusiki.
12 Ia onate aia Daud iatinu sio oasau oahata, “Anahatana irui iake osi Obed-Edom runa ne numa hutae pusiki tau sae kotane rei wamo tanui.” Ianei sanrei oyo ieui poe inanai. Inanai nanie iroriki roe Yerusalem. Orori-roriki ouna karisaa mainae anoo mirika. 13 Hoka poe oyo sio nome ohana kotane rei. Ohanai osahu nai nome oyo Daud iaisosiso oaraoo. Oaraoo oyo ikenu koropou hanaie runa koropou anae osi Anahatana. Koropou anae wani sio opanai suiosa nanie okenui osi Anahatana. 14 Ikenui pusi oyo Daud imara-marai ikaumini rotu nanie ihunu ruai iainaa runa Anahatana. Imarai rei hasae irehe nipa monne wani pukune. 15 Reiso Daud runa sio Israel pusiso onana kotane rei ororiki roe Yerusalem oainaa runa Anahatana omara-maraso, oaka-kapona, oauhona rompa nene sepi-sepie.
16 Sio wasoni orori kotane rei roe Yerusalem Saul anai pina, Mikal, iakanini sui yanela inoo sahai, Daud isoman-somani imara-marai iainaa runa Anahatana. Inooi oyo ipenei tanui.
17 Hoka roe oyo oaunutu kotane rei pani numa wani sio onanai rerihoni makapana unta. Numa wani Daud iapuooi nanie oaiinu kotane rei. Iaunutui pusi oyo iakanupu makapanau osi Anahatana runa ikenu makapanau na iheu nisa runa Anahatana. 18 Ikenure oyo iainisi na Anahatana irui iake osi sio Israel pusiso. Iainisi tau Anahatana waini ne kawasa mainae erenesi pusire. 19 Iainisi pusi oyo isama muaina osi sio pusiso. Isama sio pinau runa sio hanaia pusiso tau poroti, kue kismis, runa koropou sinte wani okotui. Oai pusi oyo onuniso sui no numau.
20 Daud iae inuniki roe ne numa nanie iainisi na Anahatana irui iake osi ne pina hehuke. Hoka roe oyo sahai Mikhal ihokai isupui oyo iahata, “Mm. Ranie hatae reini ia aia Israel iuna ruai sani ia ikine. Aikee ia mainae. Ano aeu sanakua akata me makahaia no pina manianeu sani ano ikine.”
21 Iahata, “Au umaraku rei nanie tau uainaa runa Anahatana. Anahatana waini ipenei tau amamu runa ne numa hutae. Reiso ihiti au na urime ne mansiau, sio Israel. Ihitiku reiso umara-maraku uainaa runa Anahatana tea. 22 Ne masike au una ruaku au ikine erenesi sinasi iae, areimo iake. Au una pumaaku ne sio manianeu wasoni ano asau tanuso reimo, mka oamuiraku sirinia!”
23 Sahai Mikal, Saul anai, isusu tewa rotu-tu imatai.