5
Daud Iuna Aia tau Otoe Israel Pusiki
1 Taue isa sio onata rerihoni sio ipa Israel pusiso ohokaso mai Daud mai nia Hebron. Ohoka mai oahata, “Upu. Ano runa ami mo, pusita re nasi osa asi. 2 Naone tau Saul iuna aia asi, ano sahoro auna kapitane tau sio soratatua Israel pusiso. Sio nanie oeu oahita ano sahoro auna kapitane tanuso. Samatoro Anahatana itotoe nea iahata, ‘Ano sahoro mka asaka we mansiau sani ia mamsaka rompau isaka ne rompau. Ano sahoro auna aia tanuso.‘”
3 Reiso Daud runa sio ona Israel rei pusiso oapamata sou. Oapamata sou Anahatana inoo oyo ohitiki iuna aia. Ohitiki reiso osona unui tau mina zaitun.
4 Daud iuna aia tau ne musum hutu tonu. Iuna aia rotu-tu musum hutu ate. 5 Mai nia Hebron ia irime otoe Yehuda rotu-tu musum itu hunana nome. Ita pani kota Yerusalem ia irime otoe Israel pusiki runa Yehuda rotu-tu musum hutu tonu rahana tonu.
Daud Inana Yerusalem arihoni sio Yebus
6 Taue isa aia Daud runa ruai ne soratutua oeuso nanie oahita runa sio Yebus wasoni orueso pani kota Yerusalem. Sio Yebus oata kani mka Daud ikuaso tewa. Reiso oahata, “Ano mka anusua mai rei tewa. Sio seu-seua runa sio mata putia mani iae mka pisa oneia.”
7-8 Daud iasau osi ne soratatua rei. Iahata, “Ia seia nanie ihunu sio mata putia runa sio seu-seua wasoni au upeneku tanuso rei kahurae inusu pusu waene wani mai kota muie. Waene wani sio okani nene arena poe hue rotu-tu erehokai roe kota anoe.”
Reiso Daud ne untu tau sio Yebus. Iwahu kota Yerusalem wani sio onanai rerihoni hatu roe pupue rei. Kota Yerusalem rei, sio oaoiki tau Sion oi. (Daud ioi sio Yebus tau sio mata putia runa sio seu-seua reiso sio oahata, “Sio mata putia runa sio seu-seua pene onusu pani Anahatana ne numa mainisie.”) 9 Daud iwahui samatoro iruei tanui. Ihete kota rei nanae tau kota Daud. Pupue rei onana nene aikune erehori kota rei. Onanai na onana numau on poe aikune rotu-tu erehoka pani kota anoe. 10 Anahatana waini ne kawasa mainae erenesi pusire ikata runai. Ikata runai reiso Daud iamkona. Ita ereeu mai musum isa iamkona honu. Ita ereeu mai musum isa iamkona honu rotu-tu iamkona mainae.
Daud Iruei roe Kota Yerusalem
11 Ia onate aia Hiram arihoni kota Tirus iaisosi ne manorina roe Daud roe kota Yerusalem. Iauwatu ai neune on poe otoe Libanon runa sio wasoni opakarian tau aiau rai. Iaisosi sio wasoni opakarian tau hatu na oapuoo numa aia osi Daud. 12 Reiso Daud ianei ata titue Anahatana ihitiki tau aia tau sio Israel. Ianei ata irime sio Israel Anahatana irui iake osiso.
13 Daud isuka iarihoni nia Hebron iruei roe Yerusalem inana sio pinau inasa rei honu. Sio umau iaisene runaso ne sio umau tewa. Reiso ne hehuka sio panesi honu. 14 Sio iki hanaia wasoni oamrai roe Yerusalem mo: Syamua, Sobab, Natan, Salomo, 15 Yibhar, Elisua, Nefeg, Yafia, 16 Elisama, Elyada runa Elifelet.
Daud ne Untu tau Sio Filistin
17 Taa sio Filistin oatinu ata Daud iuna aia tau sio Israel pusiso oyo nanie osotai. Nanie osotai reiso sio Filistin pusiso oeu oninai. Ne Daud iatinu reiso ieui poe numa hatu wani makae. 18 Sio Filistin ohokaso poe Ekote Refeim. Hoka poe oyo orueso poe otoe rei. 19 Reiso Daud iasei tau Anahatana. Iahata, “Upuku Anahatana. Anina na uahita runa sio Filistin rei? Mka arui au we untu?”
Anahatana iahata, “Iake. Ahita runaso. Mka me untu. Au mka urui sio Filistin rei osia.”
20 Reiso ieui pani otoe Baal-Perasim. Hoka pani oyo Daud iahita runa sio Filistin. Oahita, Daud sahoro ne untu. Reiso iahata, “Anahatana iuna we nisau oamnohoso noo sani waene erenia ereuna ai onata ramnohoso.” Reiso ihete otoe rei nanae Baal-Perasim. Nene manariti “Anahatana iuna we nisau oamnohoso.” 21 Sio Filistin orumaso arihoni no anahatanau waroni titue tewa nene siaia. Oarihonire reiso Daud sio onanare.
22 Ita potuina tewa honu sio Filistin ohokaso orue poe Ekote Refaim honu. 23 Ita Daud iasei arihoni Anahatana honu. Iasei oyo Anahatana iahata, “Pene oahita runaso on mai uae. Ne osama ohoriso na oahita runaso hae muie, haineke ai murbei. 24 Munata atinu sio umau oeu roe ai upona rai mo oahita nea. Tau sae? Au uanaone arihonia na uhunu sio Filistin rei.”
25 Daud iuna sani Anahatana iaisosiki rei. Reiso ne untu tau sio Filistin. Ne untu reiso sio Filistin orumaso on ria nia Geba rotu-tu ohokaso nau nia Gezer.