Hèbùdéèpa 3

Sèsíì wɛhinà-á-ma Mɔ̀yísì.

¹ N kúcàpa nà n potɔ̰ɔ̰̀pa-nà, nɛ yòǹ Weèdi kpɛ́ɛpá-dà nì yíí-pa è yɔ̀ pá dɛ́tá hḭ́ǹka kááma. Ye kú kpɛ́mú, nɛ́ héé kà nɛ nɔ̀ǹci é n'cɔ̰mú Sèsíì hḭ́ǹka. Weèdi tɔn-kó-dà-ní k'ò yòǹ ti dɔ̀hàka kpɛ̰́ǹn, ti dań-sa kú hḭ́ǹka k'yè yòǹ bemú. ² Weèdi-dà d'oò ta̰kadà óò púká ye tɔmù-ní, k'ò mɛ̀ɛ mù pa̰á̰ nà cɔ́cɔ́ma é n'yònà Mɔ̀yísì mɛ̀ɛ té de pa̰káàma o kpɛ́mú Weèdi hɔ̰́ɔ̰̀ta nìku wɛǹni cɔhɔ̀ka. ³ Mɛ̀ǹǹ maá-ko hɔ̰́ɔ̰̀ta-dà pà hɔ̰́ cóńta-má sàma, pà pú cóńtí hɔ̰́ɔ̰̀ta mɔ́ntá. Ma kú bookú-dà ti yònà é cuùu-má Sèsíì é ha̰tá-nà Mɔ̀yísì. ⁴ Hɔ̰́ɔ̰̀ta bá mɛ̀ǹtà dɛ̀ɛ̀-ta káá mɛ̀ǹǹ tà maá-ko-dà, há̰kà Weèdi-dà pa̰à̰ niìi wɛǹni. ⁵ Mɔ̀yísì mɛnn de cɔ́dí-ma tɔná ò de pa̰kú-na Weèdi hɔ̰́ɔ̰̀ta nìku wɛǹni cɔhàka. Ò de yòǹ deho mɛ̀ǹǹ yònà é caka-kó-dà nìpa Weèdi de kó yɔ̀ɔ pà caka-sá. ⁶ Kídísì mɛnn há̰ yòǹ Weèdi bíitá-d'èè, nì hḭ́nà-ko k'ò nihí ni hɔ̰́ɔ̰̀ta kpɛ́ɛpá wɛǹni, ò cɔ́dí-ma o tɔná mɛhɛká. Ti yòǹ o hɔ̰́ɔ̰́tà kpɛ́ɛpá-dà, kà ti púsí ti dandaká nà yaǹnaakú ti daḿma ti kɔ̰́nì-ku.

Mɛ̀m̀pà káá-pa dandaní-dà dúti Weèdi muhipàma mɛhɛká.

⁷ Ye kú kpɛ́mú-dà tee nɛ yònà é taàa-má nɛ yàma mɛhɛká Weèdi Sèdi hḭ́mpú. Nì yɔ̀:

Kà nɛ yeèkaà Weèdi boòku

yenì kpɛ́ɛ́dì-ní,

⁸ nɛ dá kpená nɛ yàma,

é n'yònà nɛ yààpa de hḭmpú.

Ye kú wɔ̀ni-hɔ̰, pà de n kpekáà-nà

toòka-dà càwenkú mɛhɛká, è n cɔ̀kù.

⁹ Ye pesá, nɛ yààpa de n cɔkù-ú-ma,

è kó dɛ́há n kó hḭmpú,

nà pà baà de dɛ́hà-mà

n pa̰à̰-sa háá beeká púnàhi mɛhɛká.

¹⁰ Ye kú kpɛ́mú-dà tee fɔ̰́ɔ̰́di

de n cɛ̰ɛ̰́-ma pa hḭ́ǹka kà n yɔ̀:

Pà yehènì pa yàma-dà wɔ̀ka wɛǹni.

Pà pú kpɛ̀i é yá̰dá

n cɔ̀ku kpɛ́ɛsá n pà cakáà-sa.

¹¹ Ye kú kpɛ́mú-dà tee, n fɔ̰́ɔ̰́di mɛhɛká

n wɛ̰́háà-ma è yɔ̀:

Pà pú kó dúú daadí yènì,

n muhipàma teǹka mɛhɛká!

¹² Ye kú kpɛ́mú, nɛ yònà é pa̰á̰ yɔkàma-dà n kúcàpa nà n potɔ̰ɔ̰̀pa-nà, kà n'ɔɔ̀cɔ̰́ǹ kú yàma dá n'yòǹ kpákpààma é tṵ́má è pú n'dań, háá é n'tee-nà k'ó yeda Weèdi mɛ̀nì fòù-di tṵṵ̀napú. ¹³ Há̰kà, nɛ́ n'yahikànì nɛ tɔɔ̀pa wɔ̰̀ǹti daàka wɛǹni, bá kà daadí pà toò-di yenì dɛumú sá̰á̰-ma. Mɛma, sḭ̀ḭ̀ma pú kó yehèna n'ɔɔ̀cɔ̰́ǹ kó kpená o yàma. ¹⁴ Ti pɛ́dà nà Kídísì-dà è dehú. Há̰kà k'yé nɛɛ́ mà n'yòǹ, yè békú kà tí n'sɔ̰ncí é n'wɛ̰ɛ̰̀-ɛ̰́-ma tenten háá é yɔ̀ɔ deèta, daḿma ti de káá-di-ní nà cetáma. ¹⁵ Pà wà̰tà Weèdi pɔ̀kàhi mɛhɛká è yɔ̀:

Kà nɛ yeèkaà Weèdi boòku

yenì kpɛ́ɛ́dì-ní,

nɛ dá kpená nɛ yàma,

é n'yònà nɛ yààpa de hḭmpú,

é n kpeka-nà toòka.

¹⁶ M̀mɔ́ḿpa-dà há̰ de yeèkaà Weèdi boòku é nì kpeka-nà toòka? Yè pú yòǹ Mɔ̀yísì de denà-pa-ní kú wɛǹni Èsípútì teǹka dò? ¹⁷ M̀mɔ́ḿpa-dà Weèdi de mɔkáà-nà-ma fɔ̰́ɔ̰́di háá beeká púnàhì? Yè pú yòǹ mɛ̀m̀pà de pa̰à̰-pa sḭ̀ḭ̀ma é kpíí càwenkú mɛhɛká dò? ¹⁸ M̀mɔ́ḿpa-dà Weèdi de wɛɛ̀-nà-ma é wɛ̰́ha è yɔ̀: Pà pú kó dúú ni muhipàma teǹka mɛhɛká? Yè pú yòǹ mɛ̀m̀pà de yeéè-pa pà kó teha-má ni kpɛ́ɛmá dò? ¹⁹ Ye kú pa̰á̰mà wɛnnì-ní, ti dɛ́hà-á-dà pà de pú nɛɛ̀-ma é dúú Weèdi muhipàma teǹka mɛhɛká, mìì tee-sá pà de pú dań ni hḭ́ǹka.