Hèbùdéèpa 4

¹ Weèdi de ti hḭ́nà-di nùdi è yɔ̀ ti kó nɛɛ́ dúú-ma ni muhipàma mɛhɛká nì dɔ̀haà-ma ti kpɛ́mú, nì káà dehú-ma. Ye kú kpɛ́mú, nɛ́ pa̰á̰ yɔkàma kà n'ɔɔ̀cɔ̰́ǹ nɛ mɛhɛkà dá yetá mɔ́ńka ò kó dúú-ma ma mɛhɛká. ² Tḭ́ńti mɛ̀ɛtékà, ti yeèkaà-á-ma ye kú wɛnaamà-ní é n'yònà ti yààpa de mà yèkaà-ma. Àmá wɛmá pà de yeèkaà-ma, mà de pú pà pa̰à̰ yècḭ́ḭ̀, mìì tee-sá pà de mà yèkaà pà pú taà dandaní ma hḭ́ǹka. ³ Tḭ́ńti mɛ̀m̀pà mà dań-pa, tḭ́ńti-dà dúti ye Weèdi muhipàma mɛhɛká. Àmá mɛ̀m̀pà pú dań-pa Weèdi de wɛdà-á-dà pa hḭ́ǹka è yɔ̀:

Ye kú kpɛ́mú-dà tee, n fɔ̰́ɔ̰́di mɛhɛká,

n wɛ̰́háà-ma è yɔ̀:

Pà pú kó dúú daadí yènì,

n muhipàma mɛhɛká!

Mɛmá-dà nì de wɛɛ̀-ma è yɔ̀ɔ pa̰á̰pu niìi wɛǹni nà fòùku cetáma. ⁴ Kàcɔ̰́kà bɛ́kà Weèdi pɔ̀kàta mɛhɛká pà wɛɛ̀ dayehidí hḭ́ǹka è yɔ̀: Weèdi yɔ̀ɔ ni tɔmú wɛǹni daàa kàkɔ̀dì-dà é muhipa dayehidí. ⁵ Ti mɛ̀ɛ yeèkaà-á-dà-ní hḭ́ńkà Weèdi hḭ́n-má è yɔ̀: Pà pú kó dúú daadí yènì n muhipàma teǹka mɛhɛká. ⁶ Mɛ̀m̀pà de cedí yekà-pa ye wɛnaamà de pú dúú ye muhipàma teǹka mɛhɛká, mìì tee-sá pà de pú teháà Weèdi hḭ́mpú. Há̰kà, tɔɔ̀pa káà kó nɛɛ́ dúú-ma ka mɛhɛká. ⁷ Ye kú kpɛ́mú-dà tee Weèdi hḭ́nà-ma daadí tɔɔ̀di è nì yún è toò «yenì-ní». K'yé m'péé péé, kà ní wɛdá ye daadí hḭ́ǹka nà Dàfítì nùdi wɛmá ti yɔ̀ɔ wɛɛ́-ma-ní è yɔ̀:

Kà nɛ yeèkaà Weèdi boòku

yenì kpɛ́ɛ́dì-ní,

nɛ dá kpená nɛ yàma.

⁸ Kà Sòsùwéè de túdí Ìsìdàyɛ́dìpa é pà dúùwa ye muhipàma mɛhɛká, Weèdi de koò pú kó wɛdá daadí tɔɔ̀di nìcɔ̰́nì kú wɛmá. ⁹ Mii kpɛ̀i é caka è yɔ̀ muhipàma tɔɔ̀ma-dà kadí kà Weèdi kó mà pa̰a̰ ni nìpa. Ye muhipàma yònà dayehìdí kú kpɛ́ɛmá-dà, ¹⁰ è yá̰á̰ mɛ̀ǹǹ kó dúú-ko Weèdi muhipàma mɛhɛká, ye yaǹn kó muhipa-á-ma nà tɔná ò de pa̰kú-na é n'yònà Weèdi de muhipáà-ma nà ni kpɛ́ɛná. ¹¹ Ye kú kpɛ́mú, tí pa̰á̰-nà wɛ̰́ɛ̰́ma é dúú ye muhipàma mɛhɛká, k'yé teha kà t'oòcɔ̰́ǹ dá yetá tṵṵ̀na Ìsìdàyɛ́dìpa hḭmpú é yeda Weèdi hḭ́mpú, ye wɔ̀ni é mà mɔ́ńka.

¹² Weèdi wɛmá fòù-ú-ma, è tṵ́mà káá kpeèti. Mà naa-á-ma é ha̰tá-nà sepɛ̰ɛ̰̀ɛ̰dí mɛ̀nì naa-dí ni pḭ̀ǹdicí ci dɛ́ɛ̀ka. Mà hɔ̰́ dúú-ma háá nìdo o mɛhɛká mɔ́nká, é ta̰ntá o yàma n'ɔ̀ɔ sèdi, é ta̰ntá o wɔ̰̀ǹku tukanáka n'ɔ̀ɔ kɔ̰́ɔ̰̀ka wɔ́ɔmá. Mà hɔ̰́ fohìna-á-ma ò màhu-sá o yàma mɛhɛká, n'ɔ̀ɔ̀ kpɛ̀i é pa̰á̰-sa. ¹³ Yècḭ́ḭ̀ kɔ́ɔ́ mìì sɔ̀ɔ-sá Weèdi yìhìka. Nì pa̰à̰-sa wɛǹni foó-ma yè pú sɔ̀di ni yìhìka. Mɛní kú yìhìka-dà mɛ̀ɛ dɛɛ̀ ti kó wáńtá caka-má ti pa̰à̰-sa wɛǹni.

Sèsíì-dà yòǹ dɔ̀hàka kpɛ̰́ǹn mɔ́nń.

¹⁴ Ti káá dɔ̀hàka kpɛ́ǹn mɔ́nń-dà, mɛ̀ǹǹ dìsi-kó hḭ́ǹka háá é ta̰ntá Weèdi pesá. Ye mɛnń-dà héé Sèsíì, Weèdi bíitá. Ye kú kpɛ́mú, tí m'púsí dɛ́dɛ́í ti dań-sa kú hḭ́ǹka k'yè yòǹ bemú. ¹⁵ Ti pú káá dɔ̀hàka kpɛ̰́ǹn mɛ̀ǹǹ pú kó nɛɛ́ ti kɔń-nà-ko mìì ti dɔǹ-nà-sa mɛhɛká. Múńdìkaà, p'òò bɛń-ma niìi wɛǹni mɛhɛká é n'yònà tḭ́ńti, àmá ò pú pa̰à̰ sḭ̀ḭ̀ma. ¹⁶ Ye kú kpɛ́mú, héé-nà kà tí hɛ́tá Weèdi wóokàtàda pesá, pa̰á̰suumá sṵ́n-sá è pú n'wani. Ye pesá, ti kó dɛ́tá-ma Weèdi séèma kɔḿma nà ni pa̰á̰suumá, k'yé teha k'yé ti tempa-nà wɔ̀ni yè kó béka-dí tempàma.