Hèbùdéèpa 2

Ti dá yɔ̰́sa fḭ́hìnamá wɛmá Weèdi bíitá ti cakáà-ma.

¹ Yè yòǹ-mà mɛma, ti yònà é púsí dɛ́dɛ́í biɔhànamá pà ti biɔhànà-ma-dà, k'yé teha kà ti dá fédí. ² Wɛmá Weèdi tɔntɔndipá de cakáà-ma de yòǹ wɛbeèdi-dà. Mɛ̀m̀pà de pú mà besí-pa, yoo é tṵṵ̀na mà hḭ́mpú, pa bá mɛ̀ǹǹ dɛ̀ɛ̀-ko de dɛ́tà-á-ma toyɔ̰́ńti ò sànà-ti. ³ Tḭ́ńti mɛ̀ɛtékà, kà ti pú kɛdà yècḭ́ḭ̀ fḭ́hìnasàma wɛmá ti yeèkaà-ma, ntɛ́ ti kó hḭmá é yentá Weèdi toyɔ̰́ńti? Ti Teó mɔ́nń-dà cedí mà caka, kà mɛ̀m̀pà é mà yèkà-pa nà pa toòka é ti caka è yɔ̀ mà yòǹ wɛbeèdi-dà. ⁴ É yídá, kà Weèdi mɔ́nní mɛ̀ɛ té tuɛ̀ha é bɛka è yɔ̀ pà cakú-sa yòǹ wɛbemú-dà. Nì de bɛkáà-nà-sa-dà héé, pɔ́ńtáyḭḭ́pa nà pɔ́ńtápa̰á̰ma, é yídá nà kpeèti pa̰á̰ma tɔɔ̀ma dɔ́ɔ́di nì de pa̰kú-ma. Nì de bɛkáà-nà-sa tɔɔ̀sa-dà héé ni Sèdi pa̰ká nì de pà todi-ká nì kpɛ̀kaàma.

Sèsíì-dà ti bɛkáà fḭ́hìnamá cɔ̀ku.

⁵ Weèdi pú kɔ̰́ɔ̰̀ è yɔ̀ fòùkù pàǹkù ti wɛì-kù kú wɛmà, ni tɔntɔdipá-dà kó n'wódí ku hḭ́ǹka. ⁶ Múńdìkaà, pà wà̰tà Weèdi pɔ̀kàta tàcɔ̰́ kú mɛhɛká è yɔ̀:

Nìi yòǹ ba,

k'à pú dɔɔ̀ o kpɛ́mú?

Niìfòùo yòǹ ba,

k'à k'óò n'wisí?

⁷ A ò yàkàdà

k'ò pú sá̰à̰nà a tɔntɔndipá,

wɔ̀ni cɛ̰́masí mɛhɛká-dà.

A ò kɔ̰́ɔ̰̀ wɛhimú-dà,

nà yṵkànamá,

⁸ é taàa niìi wɛǹni o nɔ̀hi mɛhɛká

k'ò wódí ye hḭ́ǹka.

Kà pà hḭ́n Weèdi taà niìi wɛǹni nìi nɔ̀hi mɛhɛká k'ò wódí ye hḭ́ǹka, yè kpɛ̀i é caka è yɔ̀, yècḭ́ḭ̀-dà kɔ́ɔ́ ò pú káá-sa kú hḭ́ǹka nɔɔ̀ti. Nà mɛma há̰kà, ti mun pú dìi yenì kpɛ́ɛ́dì-ní, nìi wódí-sa ye wɛǹni hḭ́ǹka. ⁹ Àmá, ǹtɛ ti dɛ́hà-sa: Weèdi de yakadà Sèsíì bɛ̀m̀bɛ̀ni cɛ̰́masí mɛhɛká-dà k'òo wɛhimú pú n'tɛ̀i ni tɔntɔndipá kpɛ́mú. Àmá sá̰mà-ní, Weèdi ò kɔ̰́ɔ̰̀ wɛhimú-dà nà yṵkànamá, n'ɔ̀ɔ̀ dii-má kpɛ́mú náńkú é kpíí. Weèdi pa̰á̰suumá kpɛ́mú-dà tee, ò kpíi-má nìpa wɛǹni kpɛ́mú.

¹⁰ Weèdi-dà pa̰à̰ niìi wɛǹni, ye wɛnnì mɛ̀ɛ péé ni kpɛ́mú-dà. Nì de kpɛ̀i ni bííhí dɔ́ɔ́di-dà é dúú ni wɛhimú mɛhɛká. Ye kú kpɛ́mú-dà tee, yè de békú-ma ní hédá kà Sèsíì é pa̰á̰ ò de yònà é pa̰á̰-sa wɛǹni dɛ́dɛ́í, é pà kpetá fḭ́hìnamá cɔ̀ku, nà náńkú ò de kó dii-kú kpɛ́mú. ¹¹ Sèsíì mɛ̀ǹǹ wekanì-ko nìpa pa sḭ̀ḭ̀ma mɛhɛká, mɛnń nà mɛmpá pà hḭn Báàa òcɔ̰́ kú bííhí-dà. Ye kú kpɛ́mú-dà tee yè de p'óò káá-nà-ma fɛ̀ci è yɔ̀ ó pà yíí o kúcàpa n'ɔ̀ɔ potɔ̰ɔ̰̀pa, ¹² ò cakú tḭ́ń wɔ̀ni Weèdi è yɔ̀:

N kó caka-á-ma

n kúcàpa nà n potɔ̰ɔ̰̀pa

fɔ̰́ń héé-ko.

N k'áa fa̰nta-á-ma a nìku cɔhɔ̀ka.

¹³ K'ò de tṵ́má wɛdá è yɔ̀:

Mmí, n kó n'dań

Weèdi cɔ̰́ɔ̰̀di hḭ́ǹka-dà.

K'ó yíí é tɔhìna è yɔ̀:

Ǹtɛ mmí nà bííhí

Weèdi n pɛ̰ḭ-hí.

¹⁴ Bííhí ò wɛì-hi miì, hì yòǹ niìfòùpa-dà è káá wɔ̰̀ǹku nà hḭ̀ma. Sèsíì mɛ̀ɛ té de kpáńtà niìfòùo é n'yònà pà yòm̀pu-dà, k'yé teha k'ó kpíí, é fíɔ́wá Wɛɛ̀kupá wódo kpeèti mɛ̀ǹǹ de púsí-ko kṵ́mú nɔɔ̀ti. ¹⁵ Ò kpíi, è kpɛ̀i fḭ́hìna mɛ̀m̀pà de káá-pa wɛǹni-dà kṵ́mú wantafɔ̰̀di, kà mù pà núńtí pa fòùmu wɛǹni mɛhɛká. ¹⁶ Mìì yòǹ-sa póí ye wɛmà mɛhɛkà-ní, ò pú tɛ̀ni è kó tempanà Weèdi tɔntɔndipá, àmá ò tɛ̀ni è kó tempa-nà Àbààhám̀ yaàbíiká-dà. ¹⁷ Ǹtɛ mìì de tee-sá k'yè békú ó n'yònà o kúcàpa n'ɔ̀ɔ potɔ̰ɔ̰̀pa niìi wɛǹni hḭ́ǹka, k'yé teha k'ó hḭn dɔ̀hàka yam̀ma kpɛ̰́ǹn mɛ̀ǹǹ káá-ko nììma nà cɔ́cɔ́ma Weèdi tɔná mɛhɛká, k'yé teha k'ó deèda o nìku sḭ̀ḭ̀ma. ¹⁸ Ò kó nɛɛ́ tempanà-á-ma mɛ̀m̀pà péé-pa bɛḿma mɛhɛká, mìì tee-sá o mɔ́nń dii-í-ma náńkú, kà p'óò bɛń.