Hèbùdéèpa 1

Pɔ̀kàta pà wà̰haà-ta Hèbùdéèpa

Weèdi wɛɛ̀-nà ni bíitá nùdi.

¹ Dekáà wɔ̀ni, Weèdi de yɛɛ̀-nà ni wɛtɛ̰́nápa-dà é wɛɛ́-nà ti yààpa. Nì mɛɛ̀ de tṵnà cɔ̀ci ci bodú bodú-dà é pà wɛɛ́-nà cɛ̰má dɔ́ɔ́di. ² Àmá sá̰mà-ní, dadèǹdèkà mɛnkà kú mɛhɛkà, nì ti wɛɛ̀-nà ni bíitá-dà. Weèdi yɛɛ̀ nà mɛntá-dà é pa̰á̰ fòùku, mɛntá-dà mɛ̀ɛ dɛɛ̀ nì bàtà-ma è yɔ̀ tá kpàdi niìi wɛǹni. ³ Ta hḭ́ǹka-dà ti yá̰dà-ma ta Báàa wɛhimú sá̰á̰pu. T'òò yònà-á-ma dɛ́dɛ́í. Nà ta wɛmá kpeèti-dà tà púsí-ma fòùku niìi wɛǹni. Mɛntá-dà pɔ̀kàdà nìpa sḭ̀ḭ̀ma, ye kú dàhàka, kà tá dìsi hḭ́ǹka é taá kaàdi ta Báàa mɛ̀ǹǹ káá-ko nɔɔ̀ti wɛǹni nɔ̀kàǹheùma.

Weèdi bíitá wɛhinà-á-ma ni tɔntɔndipá wɛǹni.

⁴ Weèdi pɛ̰ḭ-dí yèdi ni Bíitá, nì wɛhi-í-ma è kɔ́ɔ́ tɔɔ̀di ni tɔntɔndipá kpɛ́ɛká mɛhɛká. Ye kú kpɛ́mú-dà tee tà mɛ̀ɛ té pà wɛhinà-ma. ⁵ Weèdi pú cakáà daadí yènì ni tɔntɔndikó òcɔ̰́ǹ è yɔ̀:

A yòǹ n bíitá-dà,

é tódá yenì, mmí-dà a pɛdà.

Nì tṵ́mà pú cakáà daadí yènì ni tɔntɔndikó è yɔ̀:

N kó n'yòǹ a Báàa-dà,

kà fɔ̰́ń ní n'yòǹ n bíitá.

⁶ Àmá, Weèdi de kó tɔn-má-ní ni Pɔ̀ɔ fòùku mɛhɛká, é wɛdá-ma è yɔ̀:

Tɔntɔndipá wɛǹni yònà

é hìu-ú-ma o yìhìka óò dùǹtà.

⁷ Ni tɔntɔndipá mɛmpa kú hḭ́ǹka, nì de wɛdà è yɔ̀:

N pà dehú-nà, é n'yònà

n dehú-nà-ma kú bookú-dà yakú.

Pà yòǹ n dehàpa, è yònà ha̰dencí kpɛ́ɛ́mà-dà.

⁸ Àmá ni bíitá mɛnta kú hḭ́ǹka, nì de yɔ̀:

Fɔ̰́ń-dà yòǹ Weèdi,

è kó n'wódí k'yé n'kɔ́ɔ́ yɔ̀ɔmá.

A kó n'nihí-ma a nìku nà coóma.

⁹ A naanà mìì coó-sa-dà,

è sɛ̰ɛ̰́ kpákpààma.

Ye kú kpɛ́mú-dà tee,

fɔ̰́ń mɛ̀ǹǹ yòǹ-ko Weèdi,

a Weèdi a ta̰kadà-ma ni kpɛ́mú,

é hútá a yudí hḭ́ǹka yaǹnaakú kɔ̀ma^a.

Fɔ̰́ń-dà ni yàma dɔdi-má,

kà n'áa baàta é hédá a nɔɔ́tɔɔ̀pa.

¹⁰ Nì de tṵ́mà yɔ̀:

Fɔ̰́ń Teù, nà cetáma-ní,

fɔ̰́ń-dà pa̰à̰ teǹka.

N'àa nɔ̀hi, k'á pa̰á̰ hḭ́ǹka.

¹¹ Mii kú wɛnnì kó ka̰há-ma,

àmá fɔ̰́ń baà kó m'péé-ma.

Teǹka nà hḭ́ǹka kó cɛ̰tá cɛ̰tá-ma

é n'yònà báakpɛ̰́ǹti.

¹² A k'éè kɔ́wá-ma é n'yònà

pà hɔ̰́ kɔ́kamá kú bookú tókédi,

éè cèhèna pà cèhènì-ma kú bookú báatí.

Àmá fɔ̰́ń, a baà yòǹ a yòm̀pu-dà,

a pú kó peǹta,

a fòùmu mɛ̀ɛ kɔ́ɔ́ yɔ̀ɔmá.

¹³ Weèdi tɔntɔndikó wodà Weèdi mun cakáà-ma daadí yènì è yɔ̀:

Ya̰ní é kaàdi n nɔ̀kàǹheùma,

háá é n'sànà n kó héé-ma

k'á nɔùnà a kà̰à̰tɔɔ̀pa?

¹⁴ Weèdi tɔntɔndipá há̰ pú yòǹ sèka mɛ̀ǹkà pa̰kú-ka Weèdi tɔná dɔ́ɔ́di dò? Weèdi tɔǹ-ka-dà kà kà tempú-nà mɛ̀m̀pà kó wáńtá kpàa-pá fḭ́hìnamá.