Tɛ̀sàdòníkìpa Pɔkàcecetá 5

Òcɔ̰́ǹ pú yá̰á̰ daadí nà wɔ̀ni Teó tóńti-dí-ní

¹ Ti kúcàpa nà ti potɔ̰ɔ̰̀pa-nà, mìì héé-sa daadí nà wɔ̀ni ti Teó tóńti-dí-ní, yè koò pú békú tí nɛ wa̰hà pɔ̀kàta é nɛ caka yècḭ́ḭ̀ ye hḭ́ǹka. ² Nɛ mɔ́mpá nɛ yá̰á̰-ma sukú è yɔ̀, daadí Teó kó tóní-di-ní, kó cuùta-á-ma-ní é n'yònà túùdo hɔ̰́ cuùta-ma-ní kú bookú yèǹka. ³ Nìpa kó n'toò tíń daadí: Wɛ̀ɛ̀di-dà teǹka hḭ́ǹka sá̰mà! Ti bɔ̀ti koò pú pudì n'ɛ̀ɛ̀cɛ̰́ɛ̰̀! Ye kú daadí-dà há̰ dɛɛ̀ fíɔ́ma kó pà kúkádá-ma é dɔdi pa hḭ́ǹka, é n'yònà pɛdáma dɔnkú hɔ̰́ kúkádá-ma kú bookú poòo mɛ̀ǹǹ póń-ko, bá p'oòcɔ̰́ǹ pú kó foi. ⁴ Nɛ́na há̰kà, n kúcàpa nà n potɔ̰ɔ̰̀pa-nà, ye daadì pú kó nɛɛ́ nɛ cuùta-ní é n'yònà túùdo hɔ̰́ cuùta-má kú bookú nìpa, mìì tee-sá nɛ pú péé yḭ́ḭ̀pu mɛhɛká. ⁵ Nɛ wɛnnì, nɛ yòǹ wenkú bííhí-dà è cèǹtì wèǹku. Ti pú yòǹ yḭ́ḭ̀pu kpɛ́ɛpá è cèǹtì yèǹka.

⁶ Yè yòǹ-mà mɛma, nɛ dá teha kà tí n'dɔɔ́ é n'yònà tɔɔ̀pa. Àmá, nɛ́ héé kà tí n'you, é n'nɔn è cɛ̰hú ti cɔ̰́ɔ̰̀di. ⁷ Mɛ̀m̀pà naanà-pa nuǹdɔmú dɔɔ̀ yèǹka-dà, nayà̰pa mɛ̀ɛ hɔ̰́ nìì naàma yèǹka-dà é bɔń. ⁸ Tḭ́ńti há̰kà, ti yòǹ wenkú kpɛ́ɛpá-dà, héé-nà kà tí n'nɔn è cɛ̰́hú ti cɔ̰́ɔ̰̀di. Tí n'káá dandaní nà dɔ́kàma, mií-dà yòǹ *ta̰báatí ti kó báá-ti kà tí ti pikàna. Tí n'káá daḿma é n'yá̰á̰ è yɔ̀ Sèsíì kó ti dontá-ma, mií-dà yòǹ ti ta̰à̰pu wáḿpɔ̰̀ni. ⁹ Weèdi baà pú hḭ́nà è yɔ̀ ni fɔ̰́di é dɔdi ti hḭ́ǹka, àmá nì hḭ́nà è yɔ̀ tí dɛ́tá fḭ́táma-dà nà ti Teó Sèsí-Kídísì kpɛ́mú. ¹⁰ Kídísì kpíi ti kpɛ́mú è kpɛ̀i o tóní daadí, ti fòù yoo ti kpíi yoo, tí pɛ́ɛ́ óò m'péé-nà-á-ma. ¹¹ Yè yòǹ-mà mɛma, nɛ́ n'yahikànì nɛ tɔɔ̀pa wɔ̰̀ǹti, é n'tempú-nà nɛ tɔɔ̀pa nɛ dandaní hḭ́ǹka kà ní n'kpɛ̰́ǹ, é n'yònà nɛ mà yɔ̀ɔ hɔ̰mpú.

Tencí dèǹdèǹci nà dɔɔ̀mu

¹² Ti kúcàpa nà ti potɔ̰ɔ̰̀pa-nà, ti nɛ cɔɔ̀hu è yɔ̀ nɛ́ n'wani mɛ̀m̀pà púsí-pa Weèdi tɔmú nɛ cɔhɔ̀ka. Teó-dà héè kà pà yòǹ nɛ kpɛ̰́m̀ma, è nɛ teǹ. ¹³ Nɛ́ pà n'cùùnì sukú, é pà n'dɔ́sí sàma nà Weèdi tɔmú pà pa̰kú-pu kpɛ́mú. Nɛ dá n'kɔ̰ǹti nà nɛ tɔɔ̀pa.

¹⁴ Ti kúcàpa nà ti potɔ̰ɔ̰̀pa-nà, ti tṵ́mà nɛ cɔɔ̀hu, è yɔ̀ nɛ́ teń dóúcí mɛ̀ǹcì péé-ci nɛ cɔhɔ̀ka è yɔ̀ cí tɔn. Yahikàna-nà mɛ̀m̀pà kú wɔ̰̀ǹti tohikáà-pa, é n'tempú-nà séńtɔ̀ma. Nɛ́ m'pa̰kú mùyɔ̰ nà nìi wɛǹni. ¹⁵ Nɛ́ pa̰á̰ yɔkàma, kà n'ɔɔ̀cɔ̰́ǹ dá yetá bodá o tɔɔ̀o sḭ̀ḭ̀ma òò pa̰à̰-ma. Àmá, nɛ́ m'pɛnti wɔ̀ka wɛǹni, nɛ kó hḭmá é m'pa̰kú suumá nɛ tɔɔ̀pa, nà nìpa wɛǹni. ¹⁶ Nɛ́ m'péé yaǹnaakú mɛhɛká wɔ̀ka wɛǹni. ¹⁷ Nɛ́ n'dɔń Weèdi bá wɔ̀ni. ¹⁸ Nɛ́ n'sɛɛ́ Weèdi bá k'yè yòm̀pu. Weèdi kpɛ̀i nɛ́ m'pa̰kú-sa-dà nɛ pemá mɛhɛká, nɛ́na mɛ̀m̀pà yòǹ-pa Sèsí-Kídísì kpɛ́ɛpá.

¹⁹ Nɛ dá n'kpanì Seèwendí kó deha-má nɛ fòùmu mɛhɛká. ²⁰ Nɛ dá n'yení wɛmá Weèdi kɔ̰́nì-ma ni wɛtɛ̰́nápa. ²¹ Nɛ té mà wíha sukú ma wɛǹni, é taàa ma mɛ̀mà suu-má nɛ yàma mɛhɛká. ²² Nɛ́ yentá mìì kú wɛnnì yòǹ-sa sḭ̀ḭ̀ma.

²³ Weèdi mɛ̀nì kɔ̰́nì-di wɛ̀ɛ̀di, ni mɔ́nní é nɛ wekàna pópóí. Ní púsí dɛ́dɛ́í bá nɛ mɛ̀ǹǹ dɛ̀ɛ̀-ko o sèdi, n'ɔ̀ɔ sèkèǹteó n'ɔ̀ɔ wɔ̰̀ǹti, k'yé teha ti Teó Sèsí-Kídísì kó tóní tíń daadí, kà nɛ́ n'kɔ́ɔ́ yetáma màcɔ̰́mà o yìhìka. ²⁴ Weèdi mɛ̀nì nɛ yíí-di è yɔ̀ nɛ́ nì tṵ̀na cɔ́dí-ma, mɛní-dà mɛ̀ɛ k'éè pa̰ná.

²⁵ Ti kúcàpa nà ti potɔ̰ɔ̰̀pa-nà, nɛ mɛ̀ɛ té n'dɔń Weèdi ti kpɛ́mú. ²⁶ Nɛ́ dɔa sukú nɛ weèdɔɔ̀-tɔɔ̀pa wɛǹni. ²⁷ N nɛ sɛ́úkú-ma nà Teó yèdi, è yɔ̀ nɛ́ kaàn ye pɔ̀kàtà weèdɔɔ̀pa wɛǹni yìhìka. ²⁸ Ti Teó Sèsí-Kídísì pa̰á̰suumá é nɛ m'péé-nà!