Tɛ̀sàdòníkìpa Pɔkàcecetá 4

Fòùmu Weèdi kpɛ̀i nɛ́ n'fòù-mu ni cɔ̀ku mɛhɛká

¹ Mìì kaá-sa k'yè yònà n'ɛ́ɛ̀ n'yá̰á̰ n kúcàpa nà n potɔ̰ɔ̰̀pa-nà, ti de nɛ cakáà-á-dà nɛ yònà é n'fòù-ma kú bookú k'yé n'nadi Weèdi, nɛ mɛ̀ɛ yɔ̀ɔ fòùpu-dà ma kú tɔɔ̀ma. Ti há̰ dɔɔ̀haà nɛ cɔɔ̀hu-ú-ma nà ti Teó Sèsíì yèdi, è yɔ̀ nɛ́ dɔ̀hà é wɛ̰́dí ye fòùmù hḭ́ǹka k'yé ha̰tá mɛma. ² Nɛ yá̰á̰-dà Teó Sèsíì tencí ti nɛ kɔ̰́ɔ̰̀-ci. ³ Weèdi kpɛ̀i-sá-dà héé, nɛ́ n'weni ni yìhìka, nɛ dá n'fòù yáyámú mɛhɛká. ⁴ Bá mɛ̀ǹǹ dɛ̀ɛ̀-ko é tódá o poòo^a kà pá n'fòù fòùmu mɛ̀mù wem-pú k'yé n'nadi Weèdi. ⁵ Nɛ dá teha kà bìnɔ yam̀màhàsḭ̀ka é nɛ nɛdá é n'yònà kà hḭmá mɛ̀m̀pà pú yá̰á̰-pa Weèdi. ⁶ Òcɔ̰́ǹ dá teha é yetá-nà o kúcàa é dɔɔ́ n'ɔ̀ɔ poòo, yoo "é koòta o tàka óò hɛ́í teǹka", mìì tee-sá Teó kó wáńtá yɔ̰́ń-dà mɛ̀m̀pà pa̰kú-pa wɛǹni ye kú niì-ní pa toòka. T'eè nɛ yɔ̀ɔ cakàpu-dà, è mɛ̀ɛ tṵ́mà yè nɛ cakú. ⁷ Weèdi pú ti yíí è yɔ̀ tí n'fòù kpákpààma mɛhɛká, àmá nì ti yíí è yɔ̀ tí n'fòù kà ti fòùmu-dà é n'weni. ⁸ Ye kú kpɛ́mú-dà tee, mɛ̀ǹǹ kú wɛnnì kó yeda-kó ye wɛmà, ò pú yedáà nìi wɛmá, àmá ò yedáà Weèdi mɛ̀nì nɛ pɛ̰ḭ-dí-dà ni Seèwendí.

⁹ Tɔɔ̀sa mìì héé-sa nɛ tɔɔ̀pa dɔ́kàma nɛ́na weèdɔɔ̀pa, yè koò pú békú tí tṵ́má nɛ wa̰hà pɔ̀kàta é nɛ caka nɛ yònà é hḭmpú ye kú hḭ́ǹka. Weèdi mɔ́nní nɛ biɔhɔ̀nà-á-dà nɛ yònà é n'dɔ́sí-ma kú bookú nɛ tɔɔ̀pa. ¹⁰ Ye kú dɔ́kàma-dà nɛ múńtà bɛkú-ma Màsèdɔ́nì tempáàku weèdɔɔ̀pa wɛǹni. Ti há̰ nɛ cɔɔ̀hu è yɔ̀ nɛ́ dɔ̀hà é pà n'dɔ́sí k'yé ha̰tá mɛma. ¹¹ Nɛ́ m'pɛnti nɛ kó hḭmá é n'fòù wɛ̀ɛ̀di mɛhɛká, bá nɛ mɛ̀ǹǹ dɛ̀ɛ̀-ko k'ó n'wisí mìì ò dìi-sá. Nɛ́ n'diinì nɛ cɔ̰́ɔ̰̀di, nà nɛ mɔ́mpá kú nɔ̀hi tɔná. Mɛmá-dà ti de nɛ cakáà-ma. ¹² Kà nɛ púsí miya̰, nɛ pú kó n'fòù nà tɔɔ̀pa wìku, mɛ̀m̀pà mɛ̀ɛ pú yòǹ-pa weèdɔɔ̀pa kó nɛ n'wani-má.

Mɛ̀m̀pà kpíi-pá Weèdi cɔ̀ku mɛhɛká yá̰ńtáma wɛmá

¹³ Ti kúcàpa nà potɔ̰ɔ̰̀pa-nà, ti pú kpɛ̀i nɛ́ m'péé binìku mɛhɛká è pú n'yá̰á̰ mìì kó wáńtá tɛ̀ni-sá-ní mɛ̀m̀pà kɔ̰́ɔ̰̀-pa pa cɔ̰́ɔ̰̀di Kídísì è há̰ kpíi. Ti pú kpɛ̀i nɛ́ m'péé yaǹcɔ̰hàma mɛhɛká é n'yònà tɔɔ̀pa mɛ̀m̀pà kɔ́ɔ́-pa daḿma yècḭ́ḭ̀ kú hḭ́ǹka. ¹⁴ Ti dankáàma è yɔ̀ Sèsíì kpíi é yá̰ńtá, ma kú bookú-dà ti mɛ̀ɛ té dań-ma è yɔ̀ mɛ̀m̀pà yòǹ-pa Sèsíì kpɛ́ɛpá é kpíí, Weèdi kó wáńtá pà yá̰hìna-á-ma kà p'óò m'péé-nà.

¹⁵ Ǹtɛ wɛmá ti kpɛ̀i é nɛ caka-má kà Teó de mà wɛdà: Ò kó tóní tíń daadí, tḭ́ńti mɛ̀m̀pà kó n'kaá è fòù-pa, ti pú kó ha̰nci mɛ̀m̀pà kpíi-pá è yòǹ o kɛ́ɛpá. ¹⁶ Ye kú daadí, Weèdi kó kɔ̰́ɔ̰́ nùdi-dà, kà Weèdi tɔntɔndipá kpɛ̰́ǹn é wɛɛ́ kpeéma, kà Weèdi tṵ́ńtṵ́di é kɔń, ye wɔ̀ni kà Teó mɔ́n-mɔ́nń é cútá-ní nà hḭ́ǹka. Mɛ̀m̀pà kú wɛǹni de kɔ̰́ɔ̰̀-pa pa cɔ̰́ɔ̰̀di Kídísì é kpíí, kà pá cedí é yá̰ńtá. ¹⁷ É yídá, tḭ́ńti mɛ̀m̀pà kó n'kaá è fòù-pa, kà Weèdi pɛ́ɛ́ ti tódá nà mɛmpá wɔɔ̀ka mɛhɛká, kà tí taá é peèta-nà Teó hḭ́ǹka, ye wɔ̀ni kà tí pɛ́ɛ́ óò m'péé-nà k'yé n'kɔ́ɔ́ yɔ̀ɔmá. ¹⁸ Yè yòǹ-mà mɛma, nɛ ní n'yahikànì nɛ tɔɔ̀pa wɔ̰̀ǹti n'ɛ̀ɛ wɛmà.