Tɛ̀sàdòníkìpa Pɔkàcecetá 1

Pɔ̀kàta Pɔ́dì wà̰haà-ta Tɛ̀sàdòníkìpa

Dɔɔ̀mu

¹ Mmí Pɔ́dì, nà Sìdásì nà Tìmɔ̀téè, tḭ́ńti-dà wà̰hu ye pɔ̀kàtà-ní è nɛ dɔń nɛ́na Tɛ̀sàdòníkì weèdɔɔ̀pa. Nɛ yòǹ Báàa Weèdi nà Teó Sèsí-Kídísì kpɛ́ɛpá-dà. Weèdi é nɛ pa̰a̰ ni pa̰á̰suumá nà ni wɛ̀ɛ̀di.

Tɛ̀sàdòníkì weèdɔɔ̀pa fòùmu nà pa dandaní sá̰pu

² Ti sɛdí Weèdi wɔ̀ka wɛǹni nà nɛ wɛǹni kpɛ́mú. Ti Weèdɔɔ̀pu mɛhɛká, ti hɔ̰́ deǹta-á-ma nɛ kpɛ́mú. ³ Ti cɔhàma wɛǹni mɛhɛká, ti hɔ̰́ deǹta-á-ma nɛ dandaní Kídísì hḭ́ǹka pa̰kú-na dehèna, nà nɛ dɔ́kàma o hḭ́ǹka héè kà nɛ wékànì-ma kú bookú nɛ cɔ̰́ɔ̰̀di, nà dańkpeèma nɛ káá-ma ti teó Sèsí-Kídísì tóḿma hḭ́ǹka. ⁴ Ti kúcàpa nà ti potɔ̰ɔ̰̀pa-nà, ti yá̰á̰-ma è yɔ̀ Weèdi nɛ dɔ́sí, é nɛ ta̰kadá kà nɛ yòǹ ni kpɛ́ɛpá. ⁵ Ye kú kpɛ́mú-dà tee, Weèdi wɛnaamá ti de nɛ cakáà-ma ti de pú mà nɛ cakáà nà ti nùka sá̰à̰di, àmá ti de mà nɛ cakáà nà Seèwendí kpeèti-dà, kà nì ti tempú-nà. Ti mɛ̀ɛ de yá̰á̰-dà è yɔ̀ ti cakú-sa yòǹ bemú. Nɛ yá̰á̰-dà ti de fòù-ma kú bookú nɛ cɔhɔ̀ka è bɔ̀hɔ̀ta nɛ suumá. ⁶ Nɛ mɛ̀ɛ tṵ̀n ti nɔ̀ka-dà nà ti Teó kpɛ́ɛká, è yá̰á̰ nánsàku mɛhɛká-dà nɛ ta̰ntà-ma Weèdi wɛmá nà yaǹnaakú Weèdi Sèdi kɔ̰́nì-ku. ⁷ Ye kú hḭ́ǹka, nɛ hḭn nìpa mɛ̀m̀pà kú fòùmu bɛkú-pu-dà Màsèdɔ́nì tempáàku weèdɔɔ̀pa tɔɔ̀pa nà Àkàyíì kpɛ́kú kpɛ́ɛpá pà yònà é n'fòùkaàma. ⁸ Yè pú yòǹ Weèdi wɛmá cɔ̰́ɔ̰̀di-dà cetà nɛ pesá, é pidá Màsèdɔ́nì tempáàku mɛhɛká, háá nà Àkàyíì kpɛ́kú, àmá páàti wɛǹni, nìpa mɛ̀ɛ té yeèkaà-á-ma nɛ dandaní wɛmá Weèdi hḭ́ǹka k'yè koò pú békú tí mà caka òcɔ̰́ǹ. ⁹ Nìpa wɛǹni wɛì-í-ma ti de tɛ̀i-ho nɛ pesá kà nɛ́ ti cokamá, nà nɛ de wɛ́káàma wàci é fidí Weèdi bɛ́ka è kó púsí ni tɔmú, mɛní mɛ̀nì fòù-di è yòǹ Weèdi mɔ́nní. ¹⁰ Nɛ wɛ́i wàci, é fidí ni bɛ́ka è ceí ni bíitá tóḿma-dà-ní nà hḭ́ǹka. Ye bíitá-dà Sèsíì, nì yá̰hìnà-ko kpíípa mɛhɛká. Mɛnń-dà ti fḭ́hìnà Weèdi sídàma mɛ̀mà pení-ma-ní mɛhɛká.