Kàdátìpa 6

Nɛ́ n'tempú-nà nɛ tɔɔ̀pa

¹ N kúcàpa nà n potɔ̰ɔ̰̀pa-nà, nɛ́na Weèdi Sèdi túdí-pa, kà nɛ dɛ́hà nìdo k'ò pa̰kú sḭ̀ḭ̀ma, kà n'ɔ́ɔ̀ tɛ̰́ná-ní cɔɔ̀suukú hḭ́ǹka nà yaǹyɔ̀kàǹku. Nɛ há̰ n'yá̰á̰ nɛ cɔ̰́ɔ̰̀di kpɛ́mú ye wɔ̀ni, kà n'ɔɔ̀cɔ̰́ǹ mɛ̀ɛ té dá dúú bɛḿma mɛhɛká. ² Nɛ́ n'tempú-nà nɛ tɔɔ̀pa nɛ fḭ́ncí mɛhɛká, mií-dà kó bɛka è yɔ̀ nɛ tṵ̀n Kídísì kpɛ̰́ńtìnùka. ³ Kà nìi tóńkú o cɔ̰́ɔ̰̀di niìsào è há̰ pú yòǹ yècḭ́ḭ̀, ò báńtí o cɔ̰́ɔ̰̀di-dà. ⁴ Bá mɛ̀ǹǹ dɛ̀ɛ̀-ko é cɔ́dí o pa̰á̰ma, é dɛ́há kà m'ɔ̀ɔ̀ kɔ̰́nì yaǹnaakú. K'ò dɛ́hà yècḭ́ḭ̀ k'yòò kɔ̰́nì yaǹnaakú, kà kú n'yòǹ o cɔ̰́ɔ̰̀di kpɛ́kú, yè dá n'yònà ò behú-ma o cɔ̰́ɔ̰̀di nà tɔɔ̀pa. ⁵ Bá mɛ̀ǹǹ dɛ̀ɛ̀-ko pa̰kú-sa kó wáńtá dɔdi o yudí hḭ́ǹka-dà.

⁶ Pà biɔhànì-ko Weèdi wɛmá, yònà é totá-nà-á-ma mɛ̀ǹǹ ò biɔhànì-ko ò káá-sa wɛǹni.

⁷ Nɛ dá m'báńtí nɛ cɔ̰́ɔ̰̀di. Pà pú dɛhikú Weèdi. Nìi bɔɔ́-sa mií-dà ò kó kɔ̰ṵ-má. ⁸ Kà mɛ̀ǹǹ pa̰kú-ko o wɔ̰̀ǹku kpɛ̀i-sá, yè k'óò kònà sèm̀ma mɛhɛká-dà. K'ò mɛ̀ɛ pa̰kú Weèdi Sèdi kpɛ̀i-sá, ò kó wáńtá dɛ́tá fòùmu mɛ̀mù bá yɔ̀ɔ-pú-dà. ⁹ Ti dá wédá nà ti kó m'pa̰kú-ma suumá. Kà ti wɔ̰̀ǹti pú yá̰á̰káà mii kú hḭ́ǹka, wɔ̀ni kó wáńtá tɛ̀i kà tí dɛ́tá-ma ye cɔ́ǹti. ¹⁰ Wɔ̀ni ti kó dɛ́tá-di wɛǹni, ti té m'pa̰kú suumá nìpa wɛǹni kpɛ́mú, ti weèdɔɔ̀tɔ̀pa kú dàkà.

Tencí dèǹdèǹci nà cɔɔ̀ma

¹¹ N mɔ́-mɔ́nń-dà tà nɛ wa̰à̰hu sá̰mà nà n nɔ̀ku, cɔ́ɔ́-nà ta wà̰a̰cí cɛ̰́hímú sá̰ma. ¹² Mɛ̀m̀pà nɛ yɛ̰ṵ̀-pa è yɔ̀ nɛ ca̰ntá, pà kpɛ̀i nìpa sɛdàma-dà. Pà bɔ̀hɔ̀ta-sá cɔ̰́ɔ̰̀di-dà héé, pá yentá fá̰kápàma mɛ̀mà kó tɛ̀ni-má-ní kà pà cakú Kídísì kpíidɔkú wɛmá. ¹³ Ye nìpà mɛ̀m̀pà ca̰mù-pà pa cɔ̰́ɔ̰́dì-ní, pà pú tṵ̀n kpɛ̰́ńdìnùka hḭ́mpú. Pà yòm̀pu-dà, àá kpɛ̀i nɛ́ n'ca̰mù, k'yé teha kà pá n'wá̰kànì nà miya̰ nɛ hḭ́ǹka. ¹⁴ Mmí há̰kà, n kpɛ̀i wá̰káná nà Teó Sèsí-Kídísì kpíidɔkú cɔ̰́ɔ̰̀di-dà. Nà mɛnku kú nɔɔ̀ti, fòùku pa̰á̰kpákpààma kpíi-dà n pesá, é n'yònà n mɔ́nń kpíi-má ma pesá. ¹⁵ Mɛmá-dà tee, a ca̰ntà yoo a pú ca̰ntà, miya̰ pú héé yudí. Mìì héé-sa yudí-dà héé, Weèdi áa peǹta k'á hḭn niìpàǹn. ¹⁶ Mɛ̀m̀pà tṵ̀n-pá biɔhànamà mɛmà hḭ́mpú, Weèdi wɛ̀ɛ̀di nà ni pa̰á̰suumá é pà m'péé-nà, é pɛ́ɛ́-nà ni nìku wɛǹni.

¹⁷ Òcɔ̰́ǹ koò dá n wékàna sá̰mà-ní, mìì tee-sá fɛ́ùti n toó-ti n wɔ̰̀ǹku hḭ́ǹka-dà bɛkú è yɔ̀ n dii náńkú Kídísì kpɛ́mú.

¹⁸ N kúcàpa nà n potɔ̰ɔ̰̀pa-nà, ti Teó Sèsí-Kídísì é nɛ kóná nɛ wɛǹni. K'yé mà n'yòǹ.