Kàdátìpa 5

Nɛ koò dá teha é tón é hḭn núm̀ma

¹ Kídísì ti fḭ́hìnà, è kpɛ̀i tí n'tee ti cɔ̰́ɔ̰̀di-dà dɛ́dɛ́í. Ye kú kpɛ́mú, yee-nà nɛ cɔ̰́ɔ̰̀di. Nɛ koò dá teha é dúú núǹti mɛhɛká.

² Mmí Pɔ́dì, n nɛ cakú-ma è yɔ̀: Kà nɛ héè kà pà nɛ ca̰ntà, Kídísì pa̰à̰-sa nɛ kpɛ́mú koò pú yòǹ yècḭ́ḭ̀ mɛma nɛ pesá. ³ N mɛ̀ɛ cakú-ma sukú mɛ̀ǹǹ kú wɛnnì kó héé-ko kà p'óò ca̰ntá è yɔ̀ ò yònà é tṵṵ̀na-á-ma dɛ́dɛ́í kpɛ̰́ńtìnùka hḭ́mpú wɛǹni. ⁴ Nɛ́na mɛ̀m̀pà kpɛ̀i-pá é n'coó Weèdi yìhìka nà kpɛ̰́ńtìnùka tṵṵ̀namá kpɛ́mú, nɛ totà-á-ma nà Kídísì. Nɛ mɛ̀ɛ mɔ́ńkáà-á-ma Weèdi pa̰á̰suumá. ⁵ Tíńti mɛ̀ɛkà, ti daḿma-dà héé Weèdi wáńtá n'yɔ̀ ti coó-ma ni yìhìka nà ti dandaní kpɛ́mú. Mií-dà ti ceí-ma dɛ́dɛ́í nà Weèdi Sèdi kú nɔɔ̀ti. ⁶ Kà nìi múń nà Sèsí-Kídísì, ò ca̰ntà yoo ò pú ca̰ntà mii pú héé yudí. Mìì héé-sa yudí, ó n'káá dandaní-dà kà nì bɛ́kú dɔ́kàma tɔɔ̀pa hḭ́ǹka.

⁷ Nɛ de cetà-á-dà k'yè suu dɛ́dɛ́í. Woò mɔ́ńn-dà nɛ yehènà é nɛ kpaná nɛ kó tṵṵ̀na-má wɛbeèdi? ⁸ Ye kú kpanámà pú péé-nà-ní Weèdi mɛ̀nì nɛ yún-dí pesá. ⁹ Ye kú kpɛ́mú-dà tee kà pà yɔ̀: Yòmu yíkànasá cɛ̰́masí-dà hɔ̰́ n'tee kà yòmu wɛǹni é nɔdí. ¹⁰ Mmí há̰kà, Teó héè-é-ma kà n dań nɛ hḭ́ǹka. N yá̰á̰-ma è yɔ̀ nɛ pú kó mahà tɔɔ̀ma màcɔ̰́mà k'yè pú yòǹ mmí nɛ cakáà-ma. Àmá mɛ̀ǹǹ nɛ kɔkapú-ko, bá k'ò dɔ́sí kó n'héé-ko, Weèdi kó yɔ̰́ń-ma o toòka.

¹¹ Mmí mɛ̀ɛkà n kúcàpa nà n potɔ̰ɔ̰̀pa-nà, kà n de káà sɔ̰ncí è cakú nìpa-dà è yɔ̀ pá n'ca̰mù, baà tee kà pà n fá̰kápú? Kà n de cakú mií-dà, òcɔ̰́ǹ de koò pú kó n'yɔ̰́sí Kídísì kpíidɔkú wɛmá. ¹² Mɛ̀m̀pà nɛ kɔkapú-pa nà ca̰ntáma wɛmá, kà pà kpɛ̀i kà pá múńtá fɔ̰̀mù-nà pa cɔ̰́ɔ̰̀di.

Nɛ́ n'fòù Weèdi Sèdi hḭ́mpú é héé wɔ̰̀ǹku pa̰á̰ma

¹³ Nɛ́na mɛ̀ɛkà n kúcàpa nà n potɔ̰ɔ̰̀pa, Weèdi nɛ yíí ni pesá è yɔ̀ nɛ́ n'tee nɛ cɔ̰́ɔ̰̀di-dà. Àmá, nɛ há̰ dá hédá kà nɛ cɔ̰́ɔ̰̀di teemá é n'tee kà nɛ pa̰kú nɛ yàma kpɛ̀i-sá. Múnàkaà, nɛ́ n'tempú-nà nɛ tɔɔ̀pa nà dɔ́kàma. ¹⁴ Weèdi kpɛ̰́ńtìnùka wɛǹni cakú-sa tí-tíkà nìcɔ̰́ kú mɛhɛká-dà è yɔ̀: Á n'dɔ́sí a tɔɔ̀o é n'yònà a mɔ́nń. ¹⁵ N há̰ cɔ́ɔ́ é n'hɔ̰́tà nɛ yḭḭ̀ta nɛ tɔɔ̀pa-dà, è dɔm̀ta nɛ tɔɔ̀pa è yònà mɔhí. Pa̰á̰-nà yɔkàma, nɛ́ kó yɔ̀ɔ nɛ tɔɔ̀pa-dà.

¹⁶ Ǹtɛ n káá-ma è kó nɛ caka: Nɛ́ héé kà Weèdi Sèdi é nɛ n'túdí, mɛma nɛ koò pú kó m'pa̰kú nɛ wɔ̰̀ǹku kpɛ̀i-sá. ¹⁷ Wɔ̰̀ǹku kpɛ̀i-sá pú pɛ́ɛ́ nà Weèdi Sèdi kpɛ̀i-sá, Weèdi Sèdi kpɛ̀i-sá mɛ̀ɛ té pú pɛ́ɛ́-nà wɔ̰̀ǹkú kpɛ̀i-sá. Mà hɔ̰́ m'mɔ̀ù-nà ma tɔɔ̀ma-dà, ye kú kpɛ́mú-dà tee nɛ koò pú hɔ̰́ nɛɛ́-ma é m'pa̰kú nɛ yàma kpɛ̀i-sá. ¹⁸ Kà Weèdi Sèdi nɛ túdí, nɛ koò pú hɔ̰́ n'fòù nà kpɛ̰́ńtìnùka kú nɔɔ̀ti.

¹⁹ Ti yá̰á̰-dà wɔ̰̀ǹku pa̰á̰ma tɛɛ̀hu-nà-sa-ní. Mií-dà héé: Dɔ́ɔ́ma, nà yɔ́humú pa̰á̰ma, nà é n'dáhàta nɛ tɔɔ̀pa è yònà mɔhí, ²⁰ nà wàci dɔ̀hàma, nà dópòdópò pa̰á̰ma, nà sɛ̰sɛ̰kú, nà kɔ̰ɔ̰̀ka, nà yantimú, nà fɔ̰́ɔ̰hḭḭ̀takú, nà é n'nɔhù-nà nɛ tɔɔ̀pa, nà niìtotáfa cɛ̰ncí dɔ́ɔ́di kà cì pú n'you-nà ci tɔcí, ²¹ nà bìnɔ, nà nayà̰pu, nà dikàdisàku, nà tɔɔ̀sa tɔɔ̀sa dɔ́ɔ́di k'yèè yònà. N nɛ cakú-ma, é n'yònà n cetá nɛ n'hḭ́mpú-ní, mɛ̀m̀pà pa̰kú-pa ye kú niì wɛnnì pú dúti Weèdi wóòti mɛhɛká.

²² Há̰kà, Weèdi Sèdi mɛni tɛɛ̀hu-nà-ní: Dɔ́kàma-dà, nà yaǹnaakú, nà wɛ̀ɛ̀di, nà mùyɔ̰, nà nììma, nà pa̰á̰suumá, nà cɔ́cɔ́ma, ²³ nà yaǹyɔ̀kàǹku, nà é n'nɔn è cɛ̰hú a cɔ̰́ɔ̰̀di. Weèdi kpɛ̰́ńtìnùdi nìcɔ̰́nì pú yení ye kú niyà̰. ²⁴ Mɛ̀m̀pà yòǹ-pa Sèsí-Kídísì kpɛ́ɛpá yɔ̀ɔ-nà-á-ma kpíidɔkú hḭ́ǹka pa wɔ̰̀ǹku kpɛ̀i-sá nà kù naanà-sa k'yé ha̰tá-ho. ²⁵ Weèdi Sèdi-dà ti pɛ̰ḭ fòùmu. Ye kú kpɛ́mú, tí héé kà ní ti n'túdí. ²⁶ Ti dá n'wɛkànì ti cɔ̰́ɔ̰̀di. Ti dá n'kɔ̰m̀ta nà ti tɔɔ̀pa, ti mɛ̀ɛ dá n'káá bìnɔ ti tɔɔ̀pa kpɛ́ɛsá hḭ́ǹka.