Kàdátìpa 3

Dandaní-dà kɔ̰́nì fḭ́hìnamá nkɛ́ɛ̀ kpɛ̰́ńtìnùka?

¹ Kàdátìpà nɛ́na, nɛ dóńtà yam̀màhàdi-dà dɛ́dɛ́í! Wodà nɛ nɔdáà ma kú bookù kà nɛ́ fédí, nɛ́na pà wekàna-pa sukú Sèsí-Kídísì pà kpɛ̰́ḭ́-ko kpíidɔkú hḭ́ǹka wɛmá? ² N kpɛ̀i nɛ́ n tɛ̰́ná békàma màcɔ̰́-dà: Weèdi nɛ kɔ̰́ɔ̰̀ ni Sèdi è yɔ̀pu kpɛ́mú nɛ tṵ̀n ni kpɛ̰́ńtìnùka-dà, nkɛ́ɛ̀ɛ nɛ ta̰ntàpu kpɛ́mú Weèdi wɛnaamá nɛ yeèkaà-ma é taàa nɛ dandaní ma hḭ́ǹka? ³ Ntɛ́ nɛ kó hḭmà é yíńtá ma kú bookú? Nɛ cetà nà Weèdi Sèdi nɔɔ̀ti-dà, nɛ kpɛ̀i é dehà sá̰mà nà nɛ cɔ̰́ɔ̰̀di kpɛ́ɛtí-dà? ⁴ Nɛ dii náńkú dɛ́dɛ́í kpeèsa-da-à? Kpeèsa dɔ. ⁵ Weèdi nɛ kɔ̰́nì ni Sèdi, è pa̰kú-nà pɔ́ńtápa̰á̰ma nɛ cɔhàka è yɔ̀pu kpɛ́mú nɛ tṵ̀n ni kpɛ̰́ńtìnùka-dà, nkɛ́ɛ̀ɛ nɛ ta̰ntàpu kpɛ́mú Weèdi wɛnaamá nɛ yeèkaà-ma é taàa nɛ dandaní ma hḭ́ǹka?

⁶ Pà wà̰tà Weèdi pɔ̀kàta mɛhɛká è yɔ̀ Àbààhám̀ de taà o dandaní Weèdi hḭ́ǹka-dà, kà n'ɔ́ɔ̀ dìda niìcoóko. ⁷ Ye kú kpɛ́mú, nɛ́ n'yá̰á̰ è yɔ̀ mɛ̀m̀pà káá-pa dandaní-dà yòǹ Àbààhám̀ yaàbíiká mɔ́nká. ⁸ Pà múńtà wà̰tà Weèdi pɔ̀kàta mɛhɛká è yɔ̀ Weèdi kó wáńtá cokàna-á-ma mɛ̀m̀pà pú yòǹ-pa Sùwífùpa nà pa dandaní kpɛ́mú. Mií-ì tee tà de dɛnà é caka-má Àbààhám̀ ye kú wɛnaamà mɛmà-ní è yɔ̀: Weèdi kó wáńtá é yɛ̀ɛ̀-nà fɔ̰́ń kú pesá-dà é kóná teǹka boocí wɛǹni. ⁹ Àbààhám̀ de dań Weèdi-dà, kà n'ɔ́ɔ̀ kóná. Mɛ̀m̀pà kú wɛnnì dań-pa Weèdi, nì kó pà kóná-ma é n'yònà n'ɔ̀ɔ̀ kónà-ma.

¹⁰ Há̰kà, mɛ̀m̀pà tṵ̀n-pá kpɛ̰́ńtìnùka hḭ́mpú, è kàǹ miya̰, pà péé nɔdàma mɛhɛká-dà, è yá̰á̰ pà wà̰tà Weèdi pɔ̀kàta mɛhɛká è yɔ̀: Nɔdàma é m'péé-nà mɛ̀ǹǹ pú tṵ̀n-kó wɔ̀ni bá mɛ̀nì dɛ̀ɛ̀-di, mìì wà̰tà-sa wɛǹni kpɛ̰́ńtìnùka pɔ̀kàta mɛhɛká. ¹¹ Yè múńtà weni-dà dɛ́dɛ́í è yɔ̀ òcɔ̰́ǹ pú kó nɛɛ́ hḭn niìcoóko Weèdi yìhìka n'ɔ̀ɔ kpɛ̰́ńtìnùka tṵṵ̀namá kpɛ́mú, mìì tee-sá pà wà̰tà Weèdi pɔ̀kàta mɛhɛká è yɔ̀: Niìcoóko kó n'fòù n'ɔ̀ɔ dandaní kpɛ́mú-dà. ¹² Há̰kà, kpɛ̰́ńtìnùka nà dandaní pú pɛ́ɛ́. Múńdìkaà pà wà̰tà Weèdi pɔ̀kàta mɛhɛká è yɔ̀: Mɛ̀ǹǹ tṵ̀n-kó kpɛ̰́ńtìnùka è pa̰kú kà hḭ́mpú, ye yaǹn kó n'fòù nà ka kú nɔɔ̀ti-dà.

¹³ Kídísì-dà há̰ ti fḭ́hìnà kpɛ̰́ńtìnùka nɔdàma mɛhɛká, é mà tà̰ǹta ti fìɔ̀di, è yá̰á̰ pà wà̰tà Weèdi pɔ̀kàta mɛhɛká è yɔ̀: Nɔdàma é m'péé-nà pà dúnà-ko wɛǹni dɔkú hḭ́ǹka. ¹⁴ Sèsí-Kídísì mà hḭn, è kpɛ̀i Weèdi mɛ̀ɛ té pa̰a̰ n'ɔ̀ɔ kpɛ́mú mɛ̀m̀pà pú yòǹ-pà-dà Sùwífùpa, kónáma nì de kɔ̰́ɔ̰̀-ma Àbààhám̀. Nà dandaní ti káá-di kpɛ́mú-dà tee kà ti mɛ̀ɛ dɛ́hù Weèdi Sèdi nì de hḭ́n nì kó ti kɔ̰́ɔ̰́-di.

Kpɛ̰́ńtìnùka nà nùdi Weèdi de hḭ́nà-di

¹⁵ N kúcàpa nà n potɔ̰ɔ̰̀pa-nà, n kó tódá yohìnamá-dà ti pemá mɛhɛká. Kà nìi hḭ́nà nùdi kà nìi wɛǹni nì yá̰á̰, òcɔ̰́ǹ koò pú kó nɛɛ́ nì yeda yoo é tɔhìna yècɛ̰́ɛ̰̀ ni hḭ́ǹka o kṵ́mú dàhàka. ¹⁶ Yè yòǹ mɛmá kú bookú-dà Weèdi de hḭ́nà-di nùdi Àbààhám̀ n'ɔ̀ɔ yaàbíidí. Pà pú wa̰tà Weèdi pɔ̀kàta mɛhɛká è yɔ̀ n'ɔ̀ɔ yaàbíiká, k'yé n'yònà kà sṵ́n-má. Pà de wa̰tà è yɔ̀ o yaàbíidí-dà, mɛní-dà mɛ̀ɛ dɛɛ̀ Kídísì. ¹⁷ Ǹtɛ n kpɛ̀i é n'yɔ̀pu: Weèdi-dà de hḭ́nà nùdi kà nìi wɛǹni nì yá̰á̰. Beeká kɔ̀ɔnà nàhì nà púta̰a̰ dàhàka, kà Mɔ̀yísì kpɛ̰́ńtìnùka é tɛ̀ni. Kà pú kó tɛ̀ni ye kú wɔ̀nì é nɛɛ́ é yeda nùdi Weèdi hḭ́nà-di, é dáná nì hḭ́n nì kó pa̰á̰-sa. ¹⁸ K'yè yònà kpɛ̰́ńtìnùka tṵṵ̀namá-dà tee kà Weèdi ti pɔ̰n kpààti, yè koò pú kó n'yòǹ nùdi nì hḭ́nà-di kpɛ́mú-dà tee kà ti tì dɛ́ɛ́kú. Há̰kà, nùdi nì de hḭ́nà-di kpɛ́mú-dà tee nì bɛkáà-ma ni pa̰á̰suumá Àbààhám̀.

¹⁹ Weèdi kɔ̰́ɔ̰̀-ní kpɛ̰́ńtìnùka kà ka tɔmú héé ba? Weèdi-dà de kà tɔ̀hìnà-ní è yɔ̀ ká m'bɛkú nìpa pa foùkpákpààmu Weèdi yìhìka, háá é n'ceí-nà Àbààhám̀ yaàbíidí kó tɛ̀ni-má-ní. Mɛní kú kpɛ́mú-dà Weèdi de hḭ́nà-ma ni nùdi. Weèdi tɔntɔndipá de yɛɛ̀-nà Mɔ̀yísì-dà é kɔ̰́ɔ̰́ ye kpɛ̰́ńtìnùka. ²⁰ Pà hɔ̰́ yɛ̀ɛ̀-nà nìdo é dɔ̀hà wɛmá, kà nìi pàdɛ́ɛ́-dà káá wɛkú pa cɔhɔ̀ka. Miì há̰kà, Weèdi cɔ̰́ɔ̰̀di-dà yè dìi-má.

²¹ Kpɛ̰́ńtìnùka kó nɛɛ́ é yee-é-dà nùka Weèdi hḭ́nà-ka? Fɔ́ú! Kà Weèdi de kɔ̰́ɔ̰̀ kpɛ̰́ńtìnùdi nìcɔ̰́nì kà nì kó nɛɛ́ é kɔ̰́ɔ̰́ nìpa fòùmu, è yenì pà de kó nɛɛ́ é n'coó-ma Weèdi yìhìka nà kpɛ̰́ńtìnùka kpɛ́mú. ²² Àmá, pà wà̰tà Weèdi pɔ̀kàta mɛhɛká è yɔ̀, nìpa wɛǹni péé sḭ̀ḭ̀ma nɔɔ̀ti mɛhɛká-dà. Ye yòǹ mɛma, è kpɛ̀i Weèdi de hḭ́nà-di nùdi-dà é pa̰ná mɛ̀m̀pà kó taàa-pá pa dandaní Sèsí-Kídísì hḭ́ǹka kpɛ́mú.

²³ Kà Kídísì é nɛɛ́ tɛ̀ni kà tí taàa ti dandaní o hḭ́ǹka, ti de yòǹ kpɛ̰́ńtìnùka kpenáti-dà, háá daadí Weèdi ti fohìnà-di dandaní cɔ̀ku. ²⁴ Ma kú bookú-dà kpɛ̰́ńtìnùka de ti túdí-ma, háá kà Kídísì é yó tɛ̀ni é pa̰á̰ kà tí coá Weèdi yìhìka, nà dandaní ti káá-di o hḭ́ǹka kpɛ́mú. ²⁵ Kídísì tɛ̀ni-mà-ní sá̰mà kà tí taàa ti dandaní o hḭ́ǹka, kpɛ̰́ńtìnùka koò pú ti túdí.

²⁶ Nɛ wɛnnì, nɛ yòǹ Weèdi bííhí-dà nà dandaní nɛ káá-di Sèsí-Kídísì hḭ́ǹka. ²⁷ Nɛ́na pà cóńtà-pa wɛǹni nɛ́ɛmá mɛhɛká nà Kídísì yèdi, nɛ fòùmu pàmu ní n'yònà o kpɛ́mú. ²⁸ Òcɔ̰́ǹ koò pú ceń n'ɔ̀ɔ tɔù. A yòǹ Sùwífù bookú yoo a pú yòǹ, a yòǹ núǹn yoo a pú yòǹ, a yòǹ poòo yoo dɔɔ̀o. Miya̰ koò pú héé, è yá̰á̰ nɛ wɛǹni hḭn nìi òcɔ̰́-dà Sèsí-Kídísì mɛhɛká. ²⁹ Kà nɛ yòǹ Kídísì kpɛ́ɛpá, nɛ yòǹ Àbààhám̀ yaàbíiká-dà mɛma, nɛ mɛ̀ɛ kó kpàa-á-ma Weèdi de ò hḭ́nà nùdi è yɔ̀ nì k'óò kɔ̰́ɔ̰́-sa.