Kàdátìpa 2

Sèsíì tɔntɔndipá yeèkaà pa tɔɔ̀pa Sèdìsàdɛ́m̀ mɛhɛká

¹ Kà beeká píì-kànàhì é ka̰há, ká n tón Sèdìsàdɛ́m̀ yɔtí è nɔɔ̀-nà Bànàbásì. N de tṵ́mà tódà-á-ma Títì kà tí nɔdá. ² Weèdi-dà de hḭ́n ń tṵ́má tón ye yɔtì mɛhɛká. Ti de pa̰à̰ tíkáma-dà ti cɔ̰́ɔ̰̀di pesá nà weèdɔɔ̀pa yìkàǹyìkàpa pà kɛ̀hi-pá mámáḿ, ká n pà wekàna Weèdi wɛnaamá n cakú-ma mɛ̀m̀pà pú yòǹ-pa Sùwífùpa, è yá̰á̰ n pú kpɛ̀i tɔmú n pa̰à̰-pu nà n káà kó pa̰á̰-pu é sèǹ. ³ Àmá, bá Títì mɛ̀ǹǹ de n péé-nà-ko è yòǹ Kɛ̀dɛ́kìpa bookú, òcɔ̰́ǹ de p'óò pa̰à̰-nà nɔɔ̀ti è yɔ̀ ó ca̰ntá, ⁴ nà pàcɔ̰́pà baà de sɔ̀di é kɔkadà-sa-ní ti cɔhɔ̀ka. Pà de pú yòǹ ti weèdɔɔ̀tɔ̀pa mɔ́mpá. Pà de kpɛ̀i ó ca̰ntá-ma. Pà de dúú-ní ti cɔhɔ̀ka è kpɛ̀i é cɔ́dí foóma ti káá-ma-dà Sèsí-Kídísì mɛhɛká, ye wɔ̀ni é pɛha pà kó hḭmpú é ti tɛ̰́ná kpɛ̰́ńtìnùka núǹti mɛhɛká. ⁵ Ti de yeéè-é-ma pépédí ti kó pà pa̰a̰-má foóma, è kpɛ̀i Weèdi wɛnaamá wɛbeèdi é n'kaá nɛ cɔhɔ̀ka.

⁶ Mɛ̀m̀pà de yòǹ-pa weèdɔɔ̀pa yìkàǹyìkàpa mɛ̀ɛ té de yè péé-ma. Pà de pú hḭ́n ń tɔhɛ̀na yècɛ̰́ɛ̰̀ n cakú-sa hḭ́ǹka. Pà de yòm̀pu pú n dìi, è yá̰á̰ Weèdi pú cɔ́dì nìpa yòm̀pu. ⁷ Àmá pà múńtà de dɛ́hà-á-ma é n'hɔ̰́tà Weèdi-dà n kɔ̰́ɔ̰̀ ni wɛnaamá è yɔ̀ ń mà caka mɛ̀m̀pà pú yòǹ-pa Sùwífùpa é n'yònà nì mà kɔ̰́káàma Píyɛ́ɛ̀ è yɔ̀ ó mà caka Sùwífùpa. ⁸ Weèdi mɛ̀nì kɔ̰́ɔ̰̀-di Píyɛ́ɛ̀ nɔɔ̀ti k'ó hḭn-nà Sèsíì tɔntɔndikó Sùwífùpa kpɛ́mú, mɛní-dà mɛ̀ɛ té tì nà n kɔ̰́ɔ̰̀ kà n yòǹ-nà o tɔntɔndikó mɛ̀m̀pà pú yòǹ-pa Sùwífùpa kpɛ́mú. ⁹ Pà de tóńkú-pa è yɔ̀ pà yòǹ Weèdɔɔ̀-nàmɔ̀ni dapèpucí, Sàákì, nà Píyɛ́ɛ̀ nà Ìsá̰à̰, pà bantà-ma pa̰á̰suumá Weèdi de n pa̰à̰-ma kà n púsí-nà ye tɔmù, kà pá ti sákapa nɔ̀hi mmí nà Bànàbásì, mìì bɛkú-sa è yɔ̀ tɔmú mùcɔ̰́-dà ti pa̰kú-ma. Ti de pɛ́ɛ̀ nùdi è yɔ̀ tḭ́ńti yònà é taá mɛ̀m̀pà pú yòǹ-pa Sùwífùpa bɛ́ka-dà, kà mɛmpa é taá Sùwífùpa bɛ́ka. ¹⁰ Pà de ti cɔɔ̀haà è yɔ̀ tí deǹta pa weèdɔɔ̀-nàmɔ̀ni pɛ́hí kpɛ́mú-dà sá̰à̰di. N mɛ̀ɛ de yè pa̰à̰-á̰-ma nà n yàma wɛǹni.

Pɔ́dì cakáà Píyɛ́ɛ̀ o yetádi À̰ǹtìyɔ́sì yɔtí mɛhɛká

¹¹ Píyɛ́ɛ̀ de tɛ̀ni-má-ní À̰ǹtìyɔ́sì yɔti mɛhɛká, nìku wɛǹni yìhìka-dà n de ò kɛ̰̀ḭ-nà-ma, mìì tee-sá ò de yetà-á-ma. ¹² Ǹtɛ ò de pa̰à̰-sa: Ò de pɛ́ɛ̀ è yon-nà-á-ma mɛ̀m̀pà kɔ̰́ɔ̰̀-pa pa cɔ̰́ɔ̰̀di Kídísì è pú yòǹ Sùwífùpa. Kà Sàákì há̰ tɔn-ní nìpa, kà pá tɛ̀ni k'ó kpaàta o cɔ̰́ɔ̰̀di, é yeda ò kó tṵ́má pɛ́ɛ́ pà dii-nà-ma, mìì tee-sá ye nìpa de yòǹ Sùwífùpa-dà mɛ̀m̀pà yení-pa ca̰ntáma kpɛ́mú, k'ò pà wani. ¹³ Kà weèdɔɔ̀pa tɔɔ̀pa, mɛ̀m̀pà mɛ̀ɛ té de yòǹ-pa Sùwífùpa é tṵṵ̀na Píyɛ́ɛ̀ hḭmpú, háá kà Bànàbásì mɔ́nń mɛ̀ɛ té dɔdi pa yetádi mɛhɛká. ¹⁴ N hɔ̰́tà-ma pà pa̰kú-sa pú coó, yè pú bòn-nà Kídísì wɛnaamá wɛbeèdi hḭ́mpú, ká n caka Píyɛ́ɛ̀ nìpa wɛǹni yìhìka è yɔ̀: Fɔ̰́ń Sùwífù, a de fòù-ú-ma miì è yònà mɛ̀m̀pà pú yòǹ-pa Sùwífùpa, a de pú fòù Sùwífùpa kpɛ̰́ńtìnùka hḭ́mpú. Badà há̰ tee sá̰mà, k'à kpɛ̀i é pa̰á̰-nà nɔɔ̀ti mɛ̀m̀pà pú yòǹ-pa Sùwífùpa, è yɔ̀ pá n'fòù Sùwífùpa fòùkaàma?

Sùwífùpa nà mɛ̀m̀pà pú yòǹ-pa Sùwífùpa kó fḭ́tá nà pa dandaní kpɛ́mú-dà

¹⁵ Tḭ́ńti, ti yòǹ Sùwífùpa-dà nà ti pɛdáma-ní, ti pú yònà boocí tɔcí mɛ̀ǹcì pú tṵ̀n-cí Mɔ̀yísì kpɛ̰́ńtìnùka. ¹⁶ Nà mɛma, ti yá̰á̰-ma è yɔ̀ Weèdi pú kó wáńtá diìda nìdo è yɔ̀ ò coó, mìì tee-sá ò tṵ̀nà-ma kpɛ́mú-dà Mɔ̀yísì kpɛ̰́ńtìnùka hḭ́mpú, àmá nì kó wáńtá óò dìda niìcoóko, nà dandaní ò tàà-di kpɛ́mú-dà Sèsí-Kídísì hḭ́ǹka. Mií-ì tee tḭ́ńti mɛ̀ɛtékà, kà tí kɔ̰́ɔ̰́ ti cɔ̰́ɔ̰̀di Sèsí-Kídísì, è kpɛ̀i kà Weèdi é ti diìda niìcoópa nà ti dandaní kpɛ́mú, k'yè pú n'yòǹ ti tṵnà-ma kpɛ́mú-dà kpɛ̰́ńtìnùka hḭ́mpú. Weèdi pú kó diìda òcɔ̰́ǹ daadí yènì niìcoóko è yɔ̀pu kpɛ́mú ò tṵ̀nà kpɛ̰́ńtìnùka hḭ́mpú. ¹⁷ Tḭ́ńti, ti pɛnti Weèdi é ti diìda niìcoópa-dà nà Kídísì kpɛ́mú. Kà p'àá dɛ́hà è hɔ̰́tà ti mɛ̀ɛ té yòǹ niìsḭ̀m̀ma-dà é n'yònà mɛ̀m̀pà pú yá̰á̰-pa Weèdi, mii kpɛ̀i é caka è yɔ̀ Kídísì tɔǹ sḭ̀ḭ̀ma kpɛ́mú-dà? Fɔ́ú! ¹⁸ Kà n há̰ tṵ́mà tṵ̀nà kpɛ̰́ńtìnùka n wɛ́i-ká-ní, yè sá̰kà n kɔ̰́nì n cɔ̰́ɔ̰̀di-dà yetádi. ¹⁹ Mìì héé-sa kpɛ̰́ńtìnùka, n yònà kpíìo-dà ka yìhìka, kà koò kɔ́ɔ́ nɔɔ̀ti n hḭ́ǹka, k'yé teha kà n ní n'fòù nà Weèdi kpɛ́mú. Pà pɛ́ɛ̀ é n kpɛ̰́ḭ́-nà-á-ma Kídísì kpíidɔkú hḭ́ǹka. ²⁰ N fòù-mà, mmí koò pú fòù, àmá Kídísì-dà fòù n mɛhɛká. Fòùmù n fòù-pù wɔ̀nì mɛnì, n mù fòù è dań Weèdi bíitá mɛ̀ǹtà n dɔ́káà-ta-dà, é kɔ̰́ɔ̰́ ta fòùmu n kpɛ́mú. ²¹ N pú kó diìda hécí Weèdi pa̰á̰suumá, è yá̰á̰ kà kpɛ̰́ńtìnùka-dà hɔ̰́ hédá kà nìdo é hḭn niìcoóko Weèdi yìhìka, Kídísì kpíi hécí-dè mɛmɛ-ɛ̀!