Kɔ̀dɛ́ńtìpa Pɔkàcecetá 2

Pɔ́dì cakáà Kídísì pà kpɛ̰́ḭ́-ko kú wɛmá-dà

¹ N kúcàpa nà n potɔ̰ɔ̰̀pa-nà, n de tɛ̀i-kú-ho nɛ hɔ̰́ɔ̰́hí é nɛ caka Weèdi wɛmá, n de pú mà nɛ cakáà kà mà dɔǹ yekàpu, n mɛ̀ɛ de pú mà nɛ cakáà nà wɛnɔntí. ² N de pú maàhaà è yɔ̀ n nɛ cakáà tɔɔ̀sa yècḭ́ḭ̀, k'yè pú yòǹ Sèsí-Kídísì pà kpɛ̰́ḭ́-ko kpíidɔkú hḭ́ǹka cɔ̰́ɔ̰̀di wɛmá. ³ Ye kú kpɛ́mú-dà tee n de nɛ péé-nà-ma è kɔ́ɔ́ kpeèti, è wani è tṵ́mà cèùdi. ⁴ N wɛmá n de nɛ cakú-ma, nà n biɔhànamá de pú pɛ́ɛ́-nà nìpa kpɛ́ɛmá. Mɛmpa hɔ̰́ poó bàbu-dà é bɛka pa yaǹfòùma sá̰á̰pu è kpɛ̀i kà nìpa teha. Àmá n kpɛ́ɛmá mɛma, Weèdi Sèdi kpeèti-dà de dehú ma mɛhɛká è kpɛ̀i kà nìpa mà teha. ⁵ Ye wɔ̀ni, nɛ dandaní pú kó n'tṵḿ nìpa yaǹfòùma hḭ́ǹka, àmá nì yònà é n'tṵḿ Weèdi kpeèti hḭ́ǹka-dà.

Weèdi yaǹfòùma

⁶ Ti há̰ cakú yaǹfòùma wɛmá-dà mɛ̀ɛtékà, weèdɔɔ̀pa mɛ̀m̀pà kú dandaní bii-pá Weèdi cɔ̀ku mɛhɛká. Ye yaǹfòùma há̰ pú yòǹ fòùkù mɛnkù kú kpɛ́ɛmá. Mà mɛ̀ɛ pú yòǹ fòùkù mɛnkù kú kpeépa kpɛ́ɛmá. Mɛmpa, Weèdi kó wáńtá pà fíɔ́wá-ma. ⁷ Ti cakú Weèdi yaǹfòùma-dà mɛ̀mà de sɔ̀ɔ-má háá nà sá̰mà, kà nìpa pú mà yá̰á̰. Weèdi há̰ de mà dɔ̀haà kà pà mun pú pa̰à̰ fòùku, è kpɛ̀i kà tí dúú ni wɛhimú mɛhɛká-dà. ⁸ Fòùkù mɛnkù kú kpeépa, p'oòcɔ̰́ǹ pú yá̰dà ye kú yaǹfòùmà. Kà pà de mà yá̰dà, è yenì pà pú kpɛ̰́ḭ́ kpíidɔkú hḭ́ǹka Teó, wɛhimú yaǹn. ⁹ É n'yònà pà wà̰tà-ma Weèdi pɔ̀kàhi mɛhɛká, è yɔ̀:

Nìi nɔ̀ǹfa pú dɛ́hà-sa,

o toodí pú yeèkaà-sa,

o yàma pú maàhaà-sa,

mií-dà nì dɔ̀haà è hḭ́ḭ́-ma

mɛ̀m̀pà nì dɔ́sí-pa kpɛ́mú.

¹⁰ Tḭ́ńti-dà há̰ dɛɛ̀ Weèdi yè bɛkáà-ma nà ni Sèdi kú nɔɔ̀ti. Weèdi Sèdi-dà hɔ̰́ nɛɛ́ é fekapa niìi wɛǹni, bá yam̀màhàka mɛ̀ǹkà cṵmpu-ká è sɔ̀di Weèdi yàma mɛhɛká. ¹¹ Tḭ́ńti nìpa, ti woò mɔ́ńn-dà yá̰á̰ o tɔɔ̀o maàhu-sá o yàma mɛhɛká? Òcɔ̰́ǹ kɔ́ɔ́ k'yè pú yòǹ ye yaǹn mɔ́nń. Ma cɔ̰́ɔ̰̀di-dà nà Weèdi. Òcɔ̰́ǹ pú yá̰á̰ Weèdi yam̀màhàka k'yè pú yòǹ ni Sèdi cɔ̰́ɔ̰̀di. ¹² Tḭ́ńti há̰kà, yè pú yòǹ fòùkù mɛnkù kú Sèdi-dà Weèdi ti pɛ̰ḭ-má. Àmá nì ti pɛ̰ḭ Sèdi mɛ̀nì péé-nà-di-dà-ní ni pesá. Ye kú kpɛ́mú, ti yònà é bantá-ma niìya̰ Weèdi ti pɛ̰ḭ-sá ni pa̰á̰suumá mɛhɛká. ¹³ Ti pú hɔ̰́ n'wɛì ye niìi nì ti pɛ̰ḭ-sá wɛmá nà wɛnɔ̀ka nìpa yaǹfòùma biɔhanì-ka, àmá ti hɔ̰́ n'wɛì ye wɛmá nà wɛnɔ̀ka Weèdi Sèdi ti biɔhanì-ka-dà. Mɛmá-dà ti hɔ̰́ wekàna-má nìpa Weèdi Sèdi péé-pa kú mɛhɛká mìì héé-sa Weèdi cɔ̀ku kpɛ́ɛsá. ¹⁴ Àmá nìdo n'ɔ̀ɔ yam̀màhàdi pú kó nɛɛ́ ta̰ǹta niìya̰ mìì péé-nà-sa-ní Weèdi Sèdi pesá, è yá̰á̰ o pesá, yè yòǹ fìhikú kpɛ́ɛsá-dà. Ò pú hɔ̰́ nɛɛ́ é bantá yè yòm̀pu, mìì tee-sá nà Weèdi Sèdi cɔ̰́ɔ̰̀di-dà nìi kó nɛɛ́ bantá-ma yè yòm̀pu. ¹⁵ Weèdi Sèdi péé-ko kú mɛhɛká kó nɛɛ́ bantá-ma niìi wɛǹni yòm̀pu. Àmá, òcɔ̰́ǹ pú kó dɛ́há yècḭ́ḭ̀ mɛnn kú fòùmu mɛhɛká é nɛɛ́ caka yè yòm̀pu. ¹⁶ É n'yònà pà wà̰tà-ma Weèdi pɔ̀kàhi mɛhɛká è yɔ̀:

Woò mɔ́ńn-dà yá̰á̰ Bateó yam̀màhàdi?

Wodà kó nɛɛ́ ò teń?

Tḭ́ńti há̰kà, ti káá Kídísì yam̀màhàdi-dà.