Kɔ̀dɛ́ńtìpa Pɔkàcecetá 1

Pɔ̀kàta Pɔ́dì wà̰haà-ta Kɔ̀dɛ́ńtìpa

Dɔɔ̀mu

¹ Mmí Pɔ́dì, Weèdi yíí-ko ni dɔ́kàma mɛhɛká è yɔ̀ n hḭn Sèsí-Kídísì tɔntɔndikó, mmí-dà wà̰hu ye pɔ̀kàtà mɛntà-ní. Nà Sòsìtɛ́nì ti kúcàa, ² ti dɔń Weèdɔɔ̀-hòǹhòni mɛ̀nì péé-di Kɔ̀dɛ́ńtì yɔtí, nà mɛ̀m̀pà kú wɛnnì yòǹ-pa Weèdi kpɛ́ɛpá nà Sèsí-Kídísì kpɛ́mú. Weèdi pà yíí è yɔ̀ pá n'fòù ni kpɛ́mú-dà, é pɛ́ɛ́-nà mɛ̀m̀pà kú wɛnnì péé-pa páàti wɛǹni è yún ti Teó Sèsí-Kídísì yèdi. Ò yòǹ ti Teó-dà è mɛ̀ɛ té yòǹ pa kóoó. ³ Ti Báàa Weèdi nà ti Teó Sèsí-Kídísì é nɛ pa̰a̰ pa̰á̰suumá nà wɛ̀ɛ̀di!

Pa̰á̰suumá Weèdi pa̰à̰-ma Kɔ̀dɛ́ńtìpa nà Sèsí-Kídísì kpɛ́mú

⁴ N sɛɛ́ Weèdi wɔ̀ka wɛǹni nà nɛ kpɛ́mú, nà pa̰á̰suumá nì nɛ pa̰à̰-ma nà Sèsí-Kídísì yudí. ⁵ N'ɔ̀ɔ kú kpɛ́mú, Weèdi nɛ pɛ̰ḭ-ḭ́-ma niìi wɛǹni, wɛmá nɛdáma pa̰dí nà yá̰á̰ma kú kpɛ́ɛdí. ⁶ Ti yeèkaà-sa nà ti dɛ́hà-sa nà ti nɔ̀ǹfa Kídísì hḭ́ǹka, ti nɛ cakáà-sa-dà, kà n'ɛ́ɛ̀ tà̰ǹta tenten nɛ yàma mɛhɛká. ⁷ Ye kú kpɛ́mú-dà tee Weèdi pa̰dí nìcɔ̰́nì pú nɛ dóńtà-ma, nɛ́na mɛ̀m̀pà ceí-pa wɔ̀ni ti Teó Sèsí-Kídísì kó fodá-di-ní. ⁸ O mɔ́-mɔ́nń-dà kó hédá kà nɛ́ n'kpenì o cɔ̀ku mɛhɛká háá dadèǹdèni, k'yé teha k'òcɔ̰́ǹ dá dɛ́tá nɛ yetádi nìcɔ̰́nì ti Teó Sèsí-Kídísì kó tɛ̀ni tḭ́ń daadí. ⁹ Weèdi mɛ̀nì nɛ yíí-di è yɔ̀ nɛ́ n'fòù è múń-nà ni Bíitá Sèsí-Kídísì ti Teó, nì cɔ́dí-ma.

Totáma Kɔ̀dɛ́ńtì weèdɔɔ̀pa cɔhɔ̀ka

¹⁰ N kúcàpa nà n potɔ̰ɔ̰̀pa-nà, n nɛ sɛ́úkú-ma nà ti Teó Sèsí-Kídísì yèdi: Ní n'you-nà nɛ tɔɔ̀pa tonàpu. Nɛ dá teha kà totáma é m'péé nɛ cɔhɔ̀ka. Nɛ́ m'múń nùdi dɛ́dɛ́í, é n'yòǹ yàma màcɔ̰́, yam̀màhàdi nìcɔ̰́. ¹¹ N wɛì mɛma n kúcàpa nà n potɔ̰ɔ̰̀pa-nà, mìì tee-sá Kòdòwéè hɔ̰́ɔ̰́tà-kpɛ́ɛpá-dà tɛ̀ni é n caka è yɔ̀ kɔ̰ɔ̰̀ka-dà péé nɛ cɔhɔ̀ka. ¹² Ǹtɛ n kpɛ̀i é n'yɔ̀pu: Nɛ mɛhɛkà, òcɔ̰́ hɔ̰́ n'yɔ̀: Mmí yòǹ Pɔ́dì kóoó-dà. Kà tɔɔ̀o yɔ̀: Mmí yòǹ Àpòdósì kóoó-dà. Kà tɔɔ̀o yɔ̀: Mmí yòǹ Sèfásì kóoó-dà. É yídá kà tɔɔ̀o yɔ̀: Mmí yòǹ Kídísì kóoó-dà. ¹³ Nɛ tonà Kídísì totà-á-ma? Pɔ́dì-dà pà kpɛ̰́ḭ́-ma kpíidɔkú hḭ́ǹka nɛ kpɛ́mú? Nà mɛnń kú yèdi-dà pà nɛ cóńtà-ma nɛ́ɛmá mɛhɛká?

¹⁴ N sɛɛ́ Weèdi nà n pú cóńtà-ma n'ɔɔ̀cɔ̰́ǹ, k'yè pú yòǹ Kìdìpúsì nà Kàyúsì. ¹⁵ Ye kú kpɛ́mú, òcɔ̰́ǹ pú kó nɛɛ́ n'yɔ̀ pà nɛ cóńtà nà mmí kú yèdi-dà. ¹⁶ Ìyé! N tṵ́mà cóńtà-á-ma Sìtèfànásì hɔ̰́ɔ̰́tà kpɛ́ɛpá. Mɛmpa bààsí, n pú sɛɛ́ɛ̀ kà n tṵ́mà cóńtà tɔɔ̀o òcɔ̰́ǹ. ¹⁷ Kídísì pú n tɔn è yɔ̀ ń cóńtá nìpa. Àmá ò n tɔn è yɔ̀ ń caka Weèdi wɛnaamá-dà. N mɛ̀ɛ pú tɛ̀ni é nɛ bɛka wɛnɔmmá ma cakàma hḭ́ǹka, k'yé teha kà n dá deèda o kpíidɔkú kṵ́mú nɔɔ̀ti.

Kídísì-dà yòǹ Weèdi kpeèti nà Weèdi yaǹfòùma

¹⁸ É caka wɛmá mɛ̀mà wɛì-ma Kídísì kṵ́mú kpíidɔkú hḭ́ǹka, yè yòǹ fìhikú-dà mɛ̀m̀pà fénì-pa pa fòùmu pa kú yìhìka. Àmá tḭ́ńti mɛ̀m̀pà fḭ́tà-pa kú pesá mà yòǹ Weèdi kpeèti-dà. ¹⁹ É n'yònà pà wà̰tà-ma Weèdi pɔ̀kàta mɛhɛká è yɔ̀:

N kó fíɔ́wá-ma yaǹfòùpa yaǹfòùma,

é fíɔ́wá yuwɔ́ɔmá yam̀ma yá̰á̰ma.

²⁰ Ye wɔ̀ni, yaǹfòùma yaǹn kó tṵ́má nɛɛ́ n'yɔ̀ ba? Kpɛ̰́ńtìnùka biɔhànakó nà fòùkù mɛnkù nɔ̀nɔ̀hìsàci yaǹn, pà tṵ́mà kó nɛɛ́ é n'yɔ̀ ba? Weèdi bɛkáà ye pesà è yɔ̀ nìpa yaǹfòùma yòǹ fìhikú-dà.

²¹ Mà yòǹ mɛma mìì tee-sá, nìpa nà pa yaǹfòùma pà káá-ma wɛǹni, pà pú nɛɛ̀ é bantá Weèdi nì pà bɛkáà tḭ́ń wɔ̀ni ni yaǹfòùma. Ye kú kpɛ́mú-dà tee, Weèdi ta̰kadà-ma è fḭ́hìnì mɛ̀m̀pà dań-pa wɛmá ti cakú-ma. Mà sém̀ yòǹ fìhikú kpɛ́ɛmá tɔɔ̀pa pesá. ²² Sùwífùpa békú pɔ́ńtáyḭḭ́pa-dà è kó nɛɛ́ taàa dandaní, kà Kɛ̀dɛ́kìpa mɛmpa pɛnti yá̰á̰ma. ²³ Àmá, tḭ́ńti cakú Kídísì pà kpɛ̰́ḭ́-ko kpíidɔkú hḭ́ǹka kú wɛmá-dà. Mà yòǹ wɛmá mɛ̀mà fénì-ma-dà nìpa Sùwífùpa pesá, è yòǹ fikàwɛmá mɛ̀m̀pà pú yòǹ-pa Sùwífùpa pesá. ²⁴ Àmá mɛ̀m̀pà yòǹ-pa Weèdi kpɛ́ɛpá, Sùwífùpa yoo pà pú yòǹ Sùwífùpa, mɛmpa yá̰á̰-ma è yɔ̀ Kídísì-dà yòǹ Weèdi kpeèti nà ni yaǹfòùma. ²⁵ Mií-ì tee kà Weèdi fìhikú káá yaǹfòùma é ha̰tá-nà nìpa kpɛ́ɛmá, kà ni sɔ̰̀ǹtìdi kpenì-nà nìpa kpeèti.

²⁶ N kúcàpa nà n potɔ̰ɔ̰̀pa-nà, cɔ́ɔ́-nà Weèdi nɛ yíí-ma kú bookú kà nɛ yòǹ-nà ni kpɛ́ɛpá. Nìpa pesá, nɛ mɛ̀m̀pà káá-pa yaǹfòùma pú wɛhi nɛ mɛhɛkà. Nɛ mɛ̀m̀pà mɛ̀ɛ yòǹ-pa kpeépa, nà pà kɛ̀hi-pá pú wɛhi. ²⁷ Múńdìkaà, Weèdi ta̰kadà pemà mɛmà kú mɛhɛká nìpa dìi-sá-dà è yɔ̀ fìhikú kpɛ́ɛsá, é diá fɛ̀ci yaǹfòùma yam̀ma. Ò ta̰kadà pemá mɛhɛká, mìì sɔ̰̀ǹ-sa-dà é diá fɛ̀ci kpeépa. ²⁸ Weèdi ta̰kadà pemá mɛhɛká nìpa pú kɛɛ̀hi-sá-dà, pà yɔ̰́sí-sa èè dìi hécí, é fíɔ́wá mɛmpa kɛɛ̀hi-sá. ²⁹ Mɛma, nìdo òcɔ̰́ǹ pú kó nɛɛ́ é fóń Weèdi yìhìka. ³⁰ Àmá, Weèdi-dà nɛ múnà-nà Sèsí-Kídísì é hédá k'ò yòǹ ti yaǹfòùma. Mɛnń-dà ti kpáhìnà niìcoópa Weèdi yìhìka, è tee kà ti yòǹ ni kpɛ́ɛpá. Mɛnń-dà mɛ̀ɛ ti dontà. ³¹ Yè yòǹ mɛmá-dà, é n'yònà pà wà̰tà-ma Weèdi pɔ̀kàhi mɛhɛká è yɔ̀: Kà nìi kpɛ̀i é fóń, k'ó fóń nà Bateó pa̰à̰-sa o kpɛ́mú.