Tɔná 21

Pɔ́dì taá Sèdìsàdɛ́m̀ yɔtí.

¹ Ti cɔwáà-ma nà mɛmpá, kà tí dìsi nɛ́ɛmá dawɛ́ɛ̀ku, é ka̰há cɔ́cɔ́ Kɔ́sì teǹka nɛ́ɛmá de yéńtà-ka. K'yé wentá kà tí ta̰ntá Òdòdɛ́sì kpɛ́ɛká. N'ɛ̀ɛ pesá, kà tí taá Pàtàdáà yɔtí. ² Kà tí tɛ̀i ye pesá, é dɛ́há nɛ́ɛmá dawɛ́ɛ̀ku kà kù kɔ́dí Fènìsíì bɛ́ka, kà tí kù dìsi é ka̰há. ³ Kà tí tɛ̀i é n'wáń Sípúdì teǹka, é kà hédá ti cà̰ǹkamá, é ka̰há Sìdíì tempáàku bɛ́ka. Kà tí tɛ̀i é cútá Tíì yɔtí, ye pesá-dà ye nɛ́ɛmá dawɛ́ɛ̀ku de kó cúhìna-má nɛǹti. ⁴ Kà tí dɛ́há ye pesá weèdɔɔ̀pa, é pà pa̰á̰-nà daàka kàyehì. Kà Weèdi Sèdi é pà caka è yɔ̀ pá caka Pɔ́dì ò dá taá Sèdìsàdɛ́m̀. ⁵ Nà mɛma, k'yèe daàka kàyehì é ka̰há, kà tí yídá è kó sɔ̰kadá ti cà̰ǹku. Kà pá ti bɛhìna pa wɛǹni, nà pa poòpa nà pa bííhí háá ye yɔtí yɛ̀ɛ̀ma. Ye pesá, dàmɛ́dì nùdi, kà tí hìu é pa̰á̰ weèdɔɔ̀pu. ⁶ Ye kú dàhàka, kà tí cɔwa ti tɔɔ̀pa, kà tí dìsi nɛ́ɛmá dawɛ́ɛ̀ku, kà mɛmpa é fitá é tón é kòǹ pa hɔ̰́ɔ̰́hí.

⁷ Kà tí dehà ti cà̰ǹku nà nɛ́ɛmá dawɛ́ɛ̀ku, é yídá Tíì yɔtí é ta̰ntá Tòdèmàyísì kpɛ́ɛtí, é tɛ̀i é cútá. Ye pesá, kà tí dɛ́há ti weèdɔɔ̀tɔ̀pa, é pà dɔwa, é pà pa̰á̰-nà daadí nìcɔ̰́. ⁸ K'yé weka, kà tí cɛ̰ɛ̰́ cɔ̀ku, é ta̰ntá Sèsàdéè yɔtí, é tɛ̀i bátá Weèdi wɛcako pà toò-ko Fìdípù hɔ̰́ɔ̰̀ta. Ye Fìdípù de yòǹ nìi pàyehì, Sèdìsàdɛ́m̀ weèdɔɔ̀pa de batà-pa è yɔ̀ pá n'tookú dimá, p'oòcɔ̰́-dà. ⁹ Ò de káá sepàm̀ma pànàhì-dà, kà pà mun pú yá̰á̰ dɔù, kà pà yòǹ Weèdi wɛtɛ̰́nápa. ¹⁰ Ti de péé-sa-dà, é yɔ̀ɔ daàka dɔ́ɔ́di, kà Weèdi wɛtɛ̰́náko òcɔ̰́ǹ é tɛ̀ni nà Sùdéè tempáàku, kà p'òò toò Àkàbúsì. ¹¹ K'ó tɛ̀ni ti pesá, é tódá Pɔ́dì nawɔ̰̀ǹcɛ̰́ɔ̰́fa é bowá o nɔ̀hi n'ɔ̀ɔ tàka è yɔ̀: Ǹtɛ Weèdi Sèdi hḭ́mpú: Nìi mɛ̀ǹǹ tee-kó nawɔ̰̀ǹfà mɛnfà, Sùwífùpa k'óò bowá ma kú bookú-dà Sèdìsàdɛ́m̀ mɛhɛká, óò tàa mɛ̀m̀pà pú yòǹ-pa Sùwífùpa nɔ̀hi mɛhɛká.

¹² Ti yeèkaà-ma mɛma, tḭ́ńti nà Sèsàdéè weèdɔɔ̀pa, kà tí sɛ́úka Pɔ́dì è yɔ̀ ò dá taá Sèdìsàdɛ́m̀. ¹³ Àmá k'ó ti tɛ̰́ná è yɔ̀: Baà tee kà nɛ hódì è kó yá̰kàna n wɔ̰̀ǹti? Mmí, n sɔ̀do bii-í-ma, kà pà kpɛ̀i kà pá n dákáná, bá é n kɔ̀ù Sèdìsàdɛ́m̀ mɛhɛká nà Teó Sèsíì yèdi. ¹⁴ Ti hɛ̰káà-ma ti k'óò hɛ́í-ma wɛmá, kà tí kɔ̀ù ti kpɛ́ɛmá è yɔ̀: Teó kpɛ̀i-sá é pa̰ná!

¹⁵ Kà daàka kàcɔ̰́kà é ka̰há, kà tí pa̰á̰ sɔ̀do è kó póńtá Sèdìsàdɛ́m̀. ¹⁶ Kà Sèsàdéè weèdɔɔ̀pa pàcɔ̰́ é ti bɛ́hìna, é tɛ̀i é ti tanà dɔɔ̀o òcɔ̰́ǹ kú hɔ̰́ɔ̰̀ta, kà p'òò toò Nàsónì, k'ò yòǹ Sípúdì kóoó, è de yòǹ weèdɔɔ̀o k'yè dɛu. O hɔ̰́ɔ̰̀ta-dà ti de kó bátá-ma.

Pɔ́dì pètà-nà Sèdìsàdɛ́m̀ weèdɔɔ̀-kpɛ̰́m̀ma

¹⁷ Ti ta̰ntà-ma Sèdìsàdɛ́m̀, kà ti weèdɔɔ̀tɔ̀pa é ti codá nà yaǹnaakú. ¹⁸ K'yé weka, nà Pɔ́dì kà tí taá Sàákì hɔ̰́ɔ̰̀ta, é tɛ̀i è hɔ̰́tà weèdɔɔ̀-kpɛ̰́m̀ma wɛǹni tíkà ta mɛhɛká. ¹⁹ K'ó pà dɔwa é yɔ̀ɔ é pà caka pópóí, Weèdi pa̰à̰-sa o dehèmu mɛhɛká mɛ̀m̀pà pú yòǹ-pa Sùwífùpa cɔhɔ̀ka. ²⁰ Pà yèkaà-ma mɛma, é fa̰nta Weèdi é caka Pɔ́dì è yɔ̀: A dɛ́hà nkɛ́ɛ̀ ti kúcàà, Sùwífùpa tòhìka tòhìka dɔ́ɔ́di taà-ma dandaní Teó hḭ́ǹke-è! Pa wɛǹni mɛ̀ɛ tṵ̀n-dà dɛ́dɛ́í kpɛ̰́ńtìnùka hḭ́mpú. ²¹ P'àá pà cakáà è yɔ̀ a biɔhànì Sùwífùpa mɛ̀m̀pà péé-pa wɛǹni tɔ-boocí cɔhàka, è yɔ̀ pá hédá Mɔ̀yísì kpɛ̰́ńtìnùka, pà koò dá n'tṵ̀n pa bokupa̰á̰ma, pà mɛ̀ɛ koò dá n'ca̰mù pa bíidahí. ²² Ntɛ́ ti kó hḭmù-dà? Pà kó yekà-ma è yɔ̀ a tɛ̀ni, nìpa dɔ́ɔ́di kó tíká-dà-ní. ²³ Ye kú kpɛ́mú á pa̰á̰ ti k'áa caka-sá. Nìpa pànàhì-dà péé ti cɔhàkà, è hḭ́nà nùdi è yɔ̀ pà kó deha Weèdi kpɛ́mú. ²⁴ Pà tódá kà nɛ́ taá pa̰á̰ wekànamá kákámú, k'á bodá pa koóma dífa. Ye wɔ̀ni, nìpa wɛǹni kó bantá-ma è yɔ̀ pà yèkaà-sa a hḭ́ǹka pú yòǹ bemú, àmá a mɔ́nń tṵ̀n-ń-ma kpɛ̰́ńtìnùka hḭ́mpú. ²⁵ Mɛ̀m̀pà pú yòǹ-pa Sùwífùpa è há̰ hḭn weèdɔɔ̀pa, ti pà wà̰haà mɛmpa pɔ̀kàta-dà, é pà caka ti hḭ́nà-ma. Ti yɔ̀ pà té dá cécí màǹci pà kɔ̀ù-ci wàci fɔ̰̀ka, pà dá dii hḭ̀ma, pà dá dii nɔtá pà kɔ̀ù-ta è pú tà hɛ̰dà, pà mɛ̀ɛ pú yònà é m'pa̰kú yáyámú.

²⁶ K'yé weka, kà Pɔ́dì é tódá ye nìpa pa nàhìka, kà pá cetá ye wekànamá kákámú pa̰á̰pu. Ye kú dàhàka, k'ó dúú Weèdi hɔ̰́ɔ̰̀ta mɛhɛká, é caka dɔ̀hɔ̀ka yam̀ma, ye wekànamá kákámú kó yɔ̀ɔ-dí daadí, kà bá pa mɛ̀ǹǹ dɛ̀ɛ̀-ko é toó-ní o dɔ̀hàdi nɔtá.

Pà cɛ̰ɛ̰́ Pɔ́dì Weèdi hɔ̰́ɔ̰̀ta mɛhɛká

²⁷ Ye kákámú daàka kàyehì kɔ́ɔ́-ma yɔ̀ɔpú, kà Sùwífùpa mɛ̀m̀pà péé-pa Àsíì tempáàku é dɛ́há Pɔ́dì Weèdi hɔ̰́ɔ̰̀ta mɛhɛká. Kà pá fucí nìku, kà p'óò cɛ̰dí, ²⁸ è kpákádí è toò: Pa̰á̰-nà, fààpá Ìsìdàyɛ́dìpa-nà! Ǹtɛ-nà ye dɔɔ̀o mɛ̀ǹǹ càu-kó páàti wɛǹni, è cakú kpàkpààma ti bookú hḭ́ǹka, nà ti kpɛ̰́ńtìnùka hḭ́ǹka, nà ye Weedì hɔ̰́ɔ̰́tà hḭ́ńkà. Ò mɛ̀ɛ mà cakú nìpa wɛǹni-dà. Ò múńtà dúwà mɛ̀m̀pà pú yòǹ-pa-dà Sùwífùpa ta mɛhɛká, é tà pa̰á̰ yɔ̰́káma. ²⁹ Pà de wɛì mɛma mìì tee-sá, pà de dɛ́hà Tòdòfím̀-dà, Èfɛ́sì yɔtí kóoó nà Pɔ́dì kà pà nɔɔ́ yɔtí mɛhɛká, kà pá mahà è yɔ̀ Pɔ́dì ò dúù-ú-ma Weèdi hɔ̰́ɔ̰̀ta mɛhɛká.

³⁰ Kà hoodí é tódá ye yɔtí wɛǹni mɛhɛká, kà nìpa é coci-ní nà páàti wɛǹni. Kà pá cɛ̰ɛ̰́ Pɔ́dì, óò yɔ̰́ɔ̰́pa, óò dèna Weèdi hɔ̰́ɔ̰̀ta mɛhɛká, é cemá kpená ta cɔ̀ka. ³¹ Kà pá n'kpɛ̀i óò kɔ̀ù, kà Hɔ̀dɔ́m̀ Sósìpa kpɛ̰́ǹn é yekà è yɔ̀ Sèdìsàdɛ́m̀ wɛǹni sa̰m̀pu-ú-ma. ³² Ye pesá n'ɛ̀ɛ pesá, k'ó tóó sósìpa nà pa dapàǹkpɛ̰́m̀ma kà pá ka̰há ka bɛ́ka. Pà dɛ́hà tḭ́ń wɔ̀ni ye kpɛ̰́ǹn nà sósìpa, kà pá hédá Pɔ́dì pootí. ³³ K'yèe sósìpa kpɛ̰́ǹn óò hɛ́tá-ho, é héé kà p'óò cɛ̰dí, k'ò yɔ̀ p'óò bowá nà dákáti tìdɛ́ɛ́. Ye kú dàhàka, k'ó béka mɛnn héé-ko, n'ɔ̀ɔ̀ pa̰à̰-sa. ³⁴ Àmá, ye niìdɔ́ɔ́di mɛhɛká, kà pàcɔ̰́ toó hoodí è toò mɛmà, kà tɔɔ̀pa toò tɔɔ̀ma. K'yèe sósìpa kpɛ̰́ǹn é n'hɔ̰́tà ò pú kó nɛɛ́ é yekà wɛbeèdi ye kú hoodì mɛhɛkà. K'ó kɔ̰́ɔ̰́ nùdi è yɔ̀ pá tanà Pɔ́dì sósìpa hɔ̰́ɔ̰̀ta. ³⁵ Pɔ́dì ta̰ntà tḭ́ń wɔ̀ni cɔ̰̀ǹcɔ̰̀ka pesá, k'yèe sósìpa óò hɛ̀da é toó, mìì tee-sá fɔ̰́di-dà de káá ye nìku dɛ́dɛ́í. ³⁶ Ye nìku dɔ́ɔ́di de tṵ̀n-ń-ma è kpákádí è toò: Ò kɔ̀ù-nà!

Pɔ́dì wɛì-nà Sèdìsàdɛ́m̀ nìku

³⁷ Pà kpɛ̀i tḭ́ń wɔ̀ni é dúùwa Pɔ́dì ye sósìpa hɔ̰́ɔ̰̀ta mɛhɛká, k'ó cɔhà ye sósìpa kpɛ̰́ǹn è yɔ̀: A kó nɛɛ́ n pa̰a̰ nùdi ká n wɛɛ́ màcɔ̰́mà? K'óò tɛ̰́ná è yɔ̀: A you Kɛ̀dɛ́kìdi? ³⁸ A pú yòǹ Èsípútì yaǹn mɛ̀ǹǹ fucí-ko nìpa daàkà mɛnkà kú mɛhɛkà, é tódá toyeèpa tòhìka kànàhì é ka̰há-nà càwenkú mɛhɛká nkɛ́ɛ̀? ³⁹ Kà Pɔ́dì óò tɛ̰́ná è yɔ̀: Ṵ́ṵ̀, n yòǹ Sùwífù-dà, è yɛ̀ni-nà-ní Táásì yɔtí, Sìdìsíì tempáàku mɛhɛká. N yɔtí yèdi yṵhù-ṵ́-ma. M'a sɛ́úkú-ma, héé ká n wɛɛ́-nà ye nìkù.

⁴⁰ K'yèe sósìpa kpɛ̰́ǹn é teha. Kà Pɔ́dì é nɛɛ̀hi ye cɔ̰̀ǹcɔ̰̀ka hḭ́ǹka, é yoòda o nɔ̀ku è kpɛ̀i ye nìku é hḭn wá̰m. Kà kù yɔ̀ kúdúḿ, kó pà wɛɛ́-nà Sùwífùpa bookú^a wɛmá è yɔ̀: