Tɔná 20

Pɔ́dì taá Màsèdɔ́nì tempáàku nà Kɛ̀dɛ́sì kpɛ́kú

¹ Ye hoodí nɛɛ̀hi tḭ́ń wɔ̀ni, kà Pɔ́dì é tíká weèdɔɔ̀pa, é yahikàna pa wɔ̰̀ǹti. Ye kú dàhàka, k'ó pà cɔwa, é ka̰há Màsèdɔ́nì tempáàku. ² K'ó tɛ̀i é cèn ye tempáàku mɛhɛká, é caka wɔ̰ǹyahití wɛmá dɔ́ɔ́di weèdɔɔ̀pa. Ye kú dàhàka, k'ó sɔ̰kadá Kɛ̀dɛ́sì tempáàku. ³ K'ó tɛ̀i ye pesá, é pa̰á̰ cḭ̀ma màta̰a̰. K'ó n'dɔɔ̀hu sɔ̀do è kó dìsi nɛ́ɛmá dawɛ́ɛ̀ku é taá Sìdíì tempáàku, é yekà è yɔ̀ Sùwífùpa kɔ̰ɔ̰̀daà è yɔ̀ pà k'óò pa̰á̰ kpákpààma. Mɛmá-dà, k'ó fitá é tón Màsèdɔ́nì tempáàku. ⁴ Ǹtɛ mɛ̀m̀pà d'oò bɛ́hìnà-pa yèka: Sòpàtɛ́ɛ̀, k'ò yòǹ Pìdúsì bíitá, k'òo yɔtí héé Bèdéè, nà Àdìsìtáákì nà Sèkɔ̰̀ǹdúsì, kà mɛmpa yòǹ Tɛ̀sàdòníkì yɔtí kpɛ́ɛpá, nà Kàyúsì Dɛ̀ɛ́bù yɔtí kóoó, nà Tìmɔ̀téè, é yídá nà Tìsíkì, nà Tòdòfím̀, kà pà yɛ̀ni nà Àsíì tempáàku. ⁵ Mɛmpa de nihí-ma, é tɛ̀i è ti ceí Tòdòásì yɔtí. ⁶ Tíńti mɛ̀ɛkà, pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá kúúdi kú dàhàka-dà, ti dìsi-má nɛ́ɛmá dawɛ́ɛ̀ku Fìdípù yɔtí, é n'káá daàka kànùm̀ é nɛɛ́ pà hɔ̰́tá-ho Tòdòásì yɔtí. Ye pesá, kà tí pa̰á̰ daàka kàyehì.

Pɔ́dì fòkànà dapàǹn òcɔ̰́ǹ Tòdòásì yɔtí

⁷ Kàyeèho dacecedí, kà tí tíká è kó dii Weèdi dipú, kà Pɔ́dì cakú nìpa Weèdi wɛmá háá kà yèǹka é yɔ̀ɔ totá. Ò de sɔ̰kadà é yóka ma kú bookú, mìì tee-sá yè de kó wentá k'ó ka̰há-ma. ⁸ Nàmɔ̀ni ti de péé-di kú mɛhɛká de péé hɔ̰́dìdìkàta hḭ́ǹka-dà, kà ha̰wèhi dɔ́ɔ́di tìi. ⁹ Kà dapàǹn òcɔ̰́ǹ, kà p'òò yún Ètìkúsì kàdi fùnɛ́tì bɛ́ɛ́kú. Kà Pɔ́dì é n'cakú Weèdi wɛmá é yóka sàma, kà nuǹdɔkpemú é cɛ̰dí ye dapàǹn. O nuǹdɔmú mɛhɛká, k'ó dɔɔ-ní teǹka n'ɛ̀ɛ hɔ̰́dìdìkàta nàmɔ̀ta̰á̰di hḭ́ǹka, kà pá taá ò yíkàna-ní o kpíìdi. ¹⁰ Àmá kà Pɔ́dì é cútá-ní é tɛ̀ni yḭná o hḭ́ǹka, óò hɛ̀ɛ-ní o nɔ̀hi mɛhɛká è yɔ̀: Nɛ bɔ̀ti dá m'pudì, ò káà fòù-ú-ma.

¹¹ K'ó tón é dìsi ye hɔ̰́dìdìkàta hḭ́ǹka, é tɛ̀i é wɛ́ha pɛ̰́ɛ̰̀ é cécí. Ye kú dàhàka, k'ó tṵ́má sɔ̰kadá Weèdi wɛmá cakàpu háá k'yé yɔ̀ɔ weka, k'ò há̰ nɛɛ́ é ka̰há. ¹² Kà pá kpɛ̰ná ye dapàǹn o fòùo, pa wɛǹni k'yè pà naa dɛ́dɛ́í.

Pɔ́dì yídà Tòdòásì yɔtí é taá Mìdéè kpɛ́ɛtí.

¹³ Kà tí nihí é dìsi nɛ́ɛmá dawɛ́ɛ̀ku, é ka̰há Àsósì yɔtí è kó tɛ̀i é tódá Pɔ́dì ye pesá, mìì tee-sá o mɔ́nń-dà de ta̰kadà è yɔ̀ ò k'éè tadí n'ɔ̀ɔ tàka. ¹⁴ Ò ti hɔ̰́tà-ma-ní Àsósì yɔtí, kà t'óò tódá ye nɛ́ɛmá dawɛ́ɛ̀ku mɛhɛká, kà tí ka̰há Mìtìdɛ́nì yɔtí. ¹⁵ Ye pesá, kà tí sɔ̰kadá nà nɛ́ɛmá dawɛ́ɛ̀ku, k'yé wentá kà tí ta̰ntá Kìyóò. K'yé tṵ́má wentá, kà tí ta̰ntá Sàmɔ́sì. Data̰á̰di, kà tí dúú Mìdéè. ¹⁶ Pɔ́dì de pú kpɛ̀i é nɛɛ̀hi Èfɛ́sì yɔtí. Ò de pú kpɛ̀i é tódá wɔ̀ni Àsíì tempáàku mɛhɛká. Ò de pa̰kú fem̀ma, è kpɛ̀i k'yè teháà, k'ó ta̰ntá Sèdìsàdɛ́m̀ yɔtí-dà Pà̰ǹtèkótì daadí.

Pɔ́dì cɔń Èfɛ́sì weèdɔɔ̀-nàmɔ̀ni kpɛ̰́m̀ma

¹⁷ Nà Mìdéè yɔtí, kà Pɔ́dì é tɔn nìdo Èfɛ́sì yɔtí, kà p'óò yíí-ní ti weèdɔɔ̀-nàmɔ̀ni kpɛ̰́m̀ma. ¹⁸ Pà ta̰ntà-ní tíń wɔ̀ni o pesá, k'ó pà caka è yɔ̀: Nɛ yá̰á̰-ma n de fòùma kú bookú nɛ cɔhàka, é tódá dacecedí n tàdi nàa-dí-ní Àsíì tempáàku mɛhɛká. ¹⁹ N de kpáhìnà n cɔ̰́ɔ̰̀di-dà cɛ̰́ma, è púsí-nà Teó tɔmú. N mɛ̀ɛ de mù púsí nà nuǹnɛ́ɛmá-dà, nà náńkú Sùwífùpa de múnà nùdi è n diinì-ku. ²⁰ Mìì de kó nɛɛ́ nɛ tempanà-sa wɛǹni, n yè nɛ cakáà-á-ma. Nìku wɛǹni yìhìka, nà nɛ hɔ̰́ɔ̰́hí mɛhɛká, n nɛ cakáà-á-ma Weèdi wɛmá é tṵ́má mà nɛ biɔhàna. ²¹ N cakáà-á-ma Sùwífùpa nà mɛ̀m̀pà pú yòǹ-pa Sùwífùpa è yɔ̀ pá kɔ̰́ɔ̰́ pa cɔ̰́ɔ̰̀di Weèdi, é taàa pa dandaní ti Teó Sèsíì hḭ́ǹka. ²² Ǹtɛ sá̰mà kà n kɔ́dí Sèdìsàdɛ́m̀. Weèdi Sèdi-dà n yɛ̰̀ṵ̀ nà nɔɔ̀ti è yɔ̀ ń kà tadí, n mɛ̀ɛ pú yá̰á̰ mìì n ceí-sa ka bɛ́ka. ²³ N yá̰á̰-sa sá̰à̰di-dà héé, yɔtí wɛǹni mɛhɛká, Weèdi Sèdi de hɔ̰́ n caka è yɔ̀ kódeedí nà náńkú-dà n ceí. ²⁴ Mmí há̰kà, n mɔ́nń kú fòùmu pú n yòǹ yècḭ́ḭ̀. N bɔhɔ̀ta-sá-dà héé, n pa̰á̰ tɔmú Teó Sèsíì n kɔ̰́ɔ̰̀-pu, háá mù yɔ̀ɔ. Ye tɔmú-dà héé n caka Weèdi pa̰á̰suumá wɛnaamá.

²⁵ Sá̰mà-ní, nɛ́na n cèn-pá kú wɛǹni cɔhàka é caka Weèdi wóòti wɛmá, n yá̰á̰-ma è yɔ̀ nɛ koò pú kó n dɛ́há daadí yènì. ²⁶ Ye kú kpɛ́mú-dà tee n nɛ cakú-ma yenì kpɛ́dì pópóí è yɔ̀, kà n'ɔɔ̀cɔ̰́ǹ fédi n yetádi nìcɔ̰́nì kɔ́ɔ́ ye mɛhɛká, ²⁷ è yá̰á̰ n pú nɛ sɔnà yècḭ́ḭ̀. N nɛ cakáà-á-ma Weèdi de hḭ́nà è yɔ̀ nɛ́ yá̰dá-sa nà daadí yènì. ²⁸ Nɛ́ n'yá̰á̰ nɛ cɔ̰́ɔ̰̀di kpɛ́mú, nà weèdɔɔ̀pa hòǹhòka Weèdi Sèdi nɛ cɛ̰à̰-ka è yɔ̀ nɛ́ kà n'nihí é kà m'púsí sukú. Weèdi kà dontà nà ni bíitá hḭ̀ma-dà. ²⁹ N yá̰á̰-ma è yɔ̀ kà n ka̰hà, nìpa kó tɛ̀ni-ma-ní nɛ cɔhàkà, é n'yònà càkomɔɔ̀ka, é n'tohi dɛ́dɛ́í, é pa̰á̰ sḭ̀ḭ̀ma weèdɔɔ̀pa. ³⁰ Bá nɛ cɔhàkà, pàcɔ̰́ kó cetá-ma é n'cakú nuǹhetí, é yehèna weèdɔɔ̀pa kà pá pà tṵ̀na. ³¹ Nɛ n'you nɛ dá dɔɔ́! Nɛ́ deǹta è yɔ̀ n pa̰à̰ beeká kàta̰a̰-dà, è teǹ bá nɛ mɛ̀ǹǹ dɛ̀ɛ̀-ko wèǹku nà yèǹka, wɔ̀ni yènì nà nuǹnɛ́ɛmá.

³² Sá̰mà-ní, n nɛ tanì Weèdi nɔ̀hi, nà ni pa̰á̰suumá wɛmá mɛhɛká-dà. Mà káá-ma nɔɔ̀ti è kó nɛɛ́ tɔhɛ̀na kpeèti nɛ dandaká, é tṵ́má nɛ kɔ̰́ɔ̰́ kpààti Weèdi hḭ́ḭ́-ti mɛ̀m̀pà yòǹ-pa wɛǹni ni kpɛ́ɛpá kpɛ́mú. ³³ N pú dɔ́káà òcɔ̰́ǹ kú dící, yoo o wúdó, yoo o báatí. ³⁴ Nɛ mɔ́mpá yá̰á̰-ma è yɔ̀ nà n mɔ́nń kú nɔ̀hi-dà n deháà-ma, é púsí-nà n cɔ̰́ɔ̰̀di, nà n nɔɔ́tɔɔ̀pa. ³⁵ N nɛ bɛkáà-á-ma wɔ̀ka wɛǹni, nɛ yònà é m'púsí-ma kú bookú tɔmú, k'yé teha kà nɛ́ n'tempú-nà pɛ́íhí. Nɛ mɛ̀ɛ yònà é n'dèn-ń-ma Teó Sèsíì mɔ́nń de hḭ́mpú. Ò de yɔ̀: Mɛ̀ǹǹ pɔ̰n-kó kú yaǹnaakú hɔ̰́ n'ha̰tà-á-ma pà pɛ̰ḭ-kó kú kpɛ́kú.

³⁶ Pɔ́dì wɛɛ̀-ma mɛma é yɔ̀ɔ, é hìu dúùka, é pɛ́ɛ́ pà pa̰á̰-nà weèdɔɔ̀pu pa wɛǹni. ³⁷ Pa wɛǹni kà pá taá dawòka, óò bàsi-nà, óò cɔa. ³⁸ Pa yàma de cɔ̰háà-á-ma dɛ́dɛ́í, mìì tee-sá ò de pà cakáà è yɔ̀ pà koò pú k'óò dɛ́há daadí yènì. Kà p'óò bɛ́hìna háá nɛ́ɛmá dawɛ́ɛ̀ku pesá.