Tɔná 22

¹ N kúcàpa nà n báàpa-nà, nɛ́ besí wɔ̀ǹ mɛnì n káá-ma è kó nɛ caka é pṵ́tá-nà n cɔ̰́ɔ̰̀di.

² Pà yèkaà-ma k'ó pà wɛɛ́-nà pa bookú wɛmá, kà pá dɔ̀hà è yɔ̀ kúdúḿ. Kà Pɔ́dì é sɔ̰kadá è yɔ̀: ³ Mmí, n yòǹ Sùwífù-dà kà pà n pɛdà Táásì yɔtí, Sìdìsíì tempáàku mɛhɛká. Àmá, n bíúháà miì-dà Sèdìsàdɛ́m̀ yɔtí mɛhɛká, kà Kàmàdìyɛ́dì yòǹ n mɛ́tídì. Mɛnń-dà n biɔhànà sukú mɔ́nkú ti yààpa kpɛ̰́ńtìnùka. N wɔ̰̀ǹti mɛ̀ɛ té de yahi-í-ma dɛ́dɛ́í, Weèdi tɔná hḭ́ǹka é n'yònà nɛ yòm̀pù nɛ wɛnnì yenì. ⁴ N de fá̰kápáà-á-ma mɛ̀m̀pà tṵ̀n-pá Teó cɔ̀ku, háá é kɔ̀ù pàcɔ̰́. N héè-é-ma kà pá cɛ̰ha daapá nà poòpa é pà yɛ̰̀ḭ kódeedí. ⁵ Dɔ̀hàka yam̀ma kpɛ̰́ǹn nà Sùwífùpa kpɛ̰́m̀ma hòǹhòni wɛǹni kó nɛɛ́-ma é wɛdá è yɔ̀ n wɛì-sà yòǹ bemú-dà. Pà múńtà de n kɔ̰́ɔ̰̀ pɔ̀kàhi-dà mɛ̀ǹhì n pɔ̰n-hí nùdi, è yɔ̀ kà n taá è dɛ́hà weèdɔɔ̀pa mɛ̀m̀pà péé-pa Dàmásì yɔtí, ká n pà cɛ̰ha-ní é pà tɛɛ̀ní Sèdìsàdɛ́m̀, é yɔ̰́ń pa toòka. N de yònà é taá é kɔ̰́ɔ̰́ ye pɔ̀kàhi, ti kúcàpa Sùwífùpa-dà mɛ̀m̀pà péé-pa ti mɛhɛká.

Pɔ́dì cakú yè hḭmpú k'ó hḭn-nà weèdɔɔ̀o

⁶ Kà n ní n'sá̰á̰ cɔ̀ku, è pàtì Dàmásì yɔtí, kà wèǹku patì yuùka, ye pesá n'ɛ̀ɛ pesá kà wensàku é cútá-ní nà hḭ́ǹka, é n tiìda é n yéńtá-ho. ⁷ Ká n dɔdi teǹka, n you kà boòku kùcɔ̰́kù n wɛì-nà è toò: Sɔ́dì, Sɔ́dì, baà tee k'à n fá̰kápú? ⁸ Ká n tɛ̰́ná è yɔ̀: Fɔ̰́ń wodà, Teù?

K'yèe boòku é n tɛ̰́ná è yɔ̀: Mmí-dà Sèsíì Nàsàdɛ́tì kóoó a fá̰kápú-ko. ⁹ Mɛ̀m̀pà de n nɔɔ̀-nà-pa de dɛ́hà-á-ma ye wenkú, àmá pà pú yeèkaà mɛ̀ǹǹ de n wɛì-nà-ko boòku. ¹⁰ Ká n béka è yɔ̀: N yònà é pa̰á̰ badà n Teù?

K'ó n tɛ̰́ná è yɔ̀: Yídá é taá Dàmásì yɔtí. Ye pesá-dà pà k'áa caka-má a yònà é pa̰á̰-sa wɛǹni. ¹¹ Ye wenkú há̰ de paìdi-í-ma sàma, ye kú kpɛ́mú kà kú n yɔɔ̀na. Kà n nɔɔ́tɔɔ̀pa é n dɛɛ̀di é n tanà Dàmásì yɔtí.

¹² Y'àá de hɔ̰́tà dɔɔ̀o òcɔ̰́ǹ-dà péé ye pesá, kà p'òò yún Ànàníyásì, k'ò káá Weèdi wantafɔ̰̀di, è tṵ̀n kpɛ̰́ńtìnùka hḭ́mpú dɛ́dɛ́í. Sùwífùpa mɛ̀m̀pà kú wɛnnì de péé-pa Dàmásì yɔtí mɛhɛká de wɛì o suumá-dà. ¹³ K'ó tɛ̀ni n pesá é n caka è yɔ̀: N kúcà Sɔ́dì, diìda! Ye pesá n'ɛ̀ɛ pesá, kà n nɔ̀ǹci é diìda, ká n ò dɛ́há pópóí. ¹⁴ K'ó tuɛ̀ha è yɔ̀: Ti yààpa Weèdi-d'àà ta̰kadà k'yè dɛu, è yɔ̀ á yá̰dá nì kpɛ̀i-sá, é dɛ́há Niìcoóko, é yekà o boòku. ¹⁵ A yònà é hḭn o pṵ́táko-dà, é caka nìpa wɛǹni a dɛ́hà-sa n'àa yeèkaà-sa. ¹⁶ A tṵ́mà yókú ba sá̰mà-ní?. Yídá kà p'áa cóńtá, yíí o yèdi k'ó a deèda a sḭ̀ḭ̀ma.

Pɔ́dì cakú Teó ò tɔnkáàma mɛ̀m̀pà pú yòǹ-pa Sùwífùpa bɛ́ka

¹⁷ Ye kú dàhàka, ká n tóní Sèdìsàdɛ́m̀. Daadí yènì, kà n ní m'pa̰kú weèdɔɔ̀pu Weèdi hɔ̰́ɔ̰̀ta mɛhɛká, k'yé n hḭn-nà dɔhɔ̀ti. ¹⁸ Ká n dɛ́há Teó k'ó n caka è yɔ̀: Yɛ̀dì fem̀ma Sèdìsàdɛ́m̀ yɔtí, è yá̰á̰ ti yam̀ma pú kó teha a kó caka-sá n hḭ́ǹka. ¹⁹ Ká n tɛ̰́ná è yɔ̀: N Teù, pa mɔ́mpá yá̰á̰-ma è yɔ̀ n de centì Sùwífùpa Weèdi wɛmá biɔhà-nàmɔ̀ka mɛhɛká, è cɛ̰hú mɛ̀m̀pà dań-pa a hḭ́ǹka, é pà yɛ̰̀ṵ̀ kóodeèka mɛhɛká, è héù kà pà pà podì. ²⁰ Pà de kɔ̀ù-ku Ètíyɛ́nì a pṵ́táko, kà n mɔ́nń péé-ma ye pesá, è ceí pa báatí, é sɛda pa pa̰á̰ma. ²¹ Ye wɔ̀ni kà Teó é n caka è yɔ̀: Tɔɔ̀ta, m'a tɔnti dɛùma-dà, mɛ̀m̀pà pú yòǹ-pa Sùwífùpa bɛ́ka.

Pɔ́dì wɛdà è yɔ̀ ò yòǹ Hɔ̀dɔ́m̀ kóoó-dà

²² Nìpa de besí-ma Pɔ́dì háá wɔ̀ni ò hḭ́n-dí, Teó ò tɔn mɛ̀m̀pà pú yòǹ-pa Sùwífùpa bɛ́ka-dà. Ye wɔ̀ni, pa wɛǹni kà pá dedí kpeéma è yɔ̀: Nìì mɛnǹ pú sànà é n'fòù, ò kɔ̀ù-nà! ²³ Kà pá dɔ̀hà é kpákada dɛ́dɛ́í, è báákú pa báatí è tì pùhìnì hḭ́ǹka, è kpihú tá̰pùdùm. ²⁴ Kà Hɔ̀dɔ́m̀ sósìpa kɔ̰̀màǹdáǹn é kɔ̰́ɔ̰́ nùdi è yɔ̀ pá dúùwa Pɔ́dì sósìpa hɔ̰́ɔ̰̀ta mɛhɛká, óò poó dáàfa k'yé teha k'ó yá̰dá mìì tee-sá kà nìkù kpákádí mɛma kú bookú o hḭ́ǹka. ²⁵ Kà p'óò m'boonì è k'óò poó dáàfa, k'ó béka sósìpa kɔ̀ta kpɛ̰́ǹn mɛ̀ǹǹ de péé-ko ye pesá è yɔ̀: Pà nɛ pɛ̰ḭ-ḭ́-dà nùdi, è yɔ̀ nɛ podí Hɔ̀dɔ́m̀ kóoó dáàfa bá è p'óò síi-nà? ²⁶ Ye sósìpa kɔ̀ta kpɛ̰́ǹn yeèkaà-ma mɛma, é cocí é taá caka kɔ̰̀màǹdáǹn è yɔ̀: A cetà kó pa̰á̰ badà ye pesà-ní? Ye nìdò yòǹ Hɔ̀dɔ́m̀ kóoó-dà. ²⁷ K'yèe kɔ̰̀màǹdáǹn é tɛ̀ni Pɔ́dì pesá, óò béka è yɔ̀: N caka-ní. A yòǹ Hɔ̀dɔ́m̀ kóoó-dà nà mɔ́masí?

Kà Pɔ́dì óò tɛ̰́ná è yɔ̀: À̰à̰. ²⁸ K'yèe kɔ̰̀màǹdáǹn óò caka è yɔ̀: Mmí bodà dící sàma mɔ́ma-dà, é nɛɛ́ hḭn-nà Hɔ̀dɔ́m̀ kóoó.

Kà Pɔ́dì yɔ̀: Mmí, n yòǹ Hɔ̀dɔ́m̀ kóoó nà n pɛdáma-dà-ní. ²⁹ Ye wɔ̀ni, mɛ̀m̀pà de kpɛ̀i-pá óò podí k'ó wɛɛ́ bemú, kà pá ceḿ wiìda óò hédá. Kà wantafɔ̰̀di é cɛ̰ɛ̰́ ye kɔ̰̀màǹdáǹn, ò yèkaà-ma kà Pɔ́dì yɔ̀ ò yòǹ Hɔ̀dɔ́m̀ kóoó-dà, k'ò há̰ hédá kà p'óò dáká.

Pɔ́dì sídàsàpu yìhìka

³⁰ Ye kɔ̰̀màǹdáǹn de kpɛ̀i é yá̰dá-ma dɛ́dɛ́í, Sùwífùpa pṵ́ṵ́nì-sa kú hḭ́ǹka Pɔ́dì. Ye kú kpɛ́mú, k'yé weka, k'ó yíí dɔ̀hàka yam̀ma kpɛ̰́m̀ma, nà sídàsàpu yam̀ma wɛǹni è yɔ̀ pá tíká. K'ó héé kà p'óò pḭntá ye dákáti, k'óò tɛɛ̀-ní óò nɛ̀hìna pa yìhìka.