Ase ahë
21
Hano ghayo ghahetiri,
nekarighi eriirighi erende.
Nekarighi erishaaro eriihë na ase ahë,
gho kubha erishaaro e rimbërë na ase a yimbërë mbimariri koheta,
na anyancha teere‑ho wiiki.
2 Nekamara nekarighi omoghya omutööbhiyu,
niwe Yerusareemu ahë,
oriika koru Mwishaaro kwo Waryobha.
Omoghya uyo noore uchöchuru kinya bhuure omokwiru ahaachöchu kwo mosubhe waache.
3 Nekooghu eriiraka ikoro koru mo‑ghetumbe ghe ghitëmi,
rerabhugha,
“Mutëghëërëra!
Obhwikari bho Ryobha n‑haghirohamu na abhaato.
Ndeghuköra obhwikari bhooche haghirohamu na abhaato,
nabho mbaakubha abhaato bhaache,
naryo ndeekubha Eryobha reebho.
4 Ndeghutareki changishori cheebho choose.
Eriibhagha riyo,
abhaato bhataaghoku koru kwihiinyërëra.
Hataakubha ne eriirera koru kubhabhara,
gho kubha amangʼana gha kare ngaakubha ghahetiri.”
5 Akamara wuure are ikeere mo‑ghetumbe ghe ghitëmi akamboorera akabhugha,
“Ibheere egheghiro kyose ˆneghaghiköra kibhe kihë!”
Wiiki akamboorera akabhugha,
“Andëka ghayo,
gho kubha amangʼana ghayo n‑gha bhuhëënë na gha mahëënë.”
6 Akamboorera wiiki akabhugha,
“ˆGhakahikeerana!
Eni neeni Simoka na Antenero,
a eni neeni uno niisëëmiri amangʼana ghoose na ghoghamareereri.
Omooto woose uno anyi na anyööta,
nekomuha bhoowa amanche koru mo‑bherika bhe manche gha bhuhöru,
anyo.
7 Wowoose uno aghokinda amasaki,
nekomuha ghayo ghoose.
Eni neekubha Eryobha reeche,
iwe niwe akubha omoona waane.
8 Amare abhatiini,
na bhano bhataakorekumi Eryobha,
na bhano bhakorikarari Eryobha,
na abhiiti,
na abhataari,
na abhaturutumbi,
na abhasëngëri bha misambu,
na abharöngö,
bhayo bhoose ahaghiro haabho n‑anyancha e mororo muhaari chwee.
Na ruyo niro oroko ro kabhere.”
Yerusareemu ahë
9 Akamara marayika umu o bhaare mohungate bhano ꞉bhaare ne ebhetibha mohungate bhe chanaabhi mohungate che kumareereri akaacha akamboorera akabhugha,
“Nuuche hano,
nekwërëki omokwiru,
uno akubha omukari o Omoona o Ngʼöndu.”
10 Niho,
Akörö Ahörëëru ekanyiikera,
marayika uyo akaahira mbagha ighoro e gheghoro ghekoro,
kire.
Akanyëërëki omoghya omutööbhiyu o Yerusareemu oriika koru ighoro Mwishaaro kwo Waryobha.
11 Omoghya uyo noore onyi no obhokumi obhokoro bho Ryobha,
gho kubha noore orarëngaari kinya eriibhohe re riighori re yasibhi no orabhari kinya ekiröri.
12 Noore ne eribhendo irë ighare,
reenyi ne ebhehita ikomi na bhibhere.
Kira kehita nkeere kerachongu na marayika,
wiiki kira kehita nkeere kyandëkuru eriina re ritöngö rimu re matöngö ghaare ikomi na abhere gha Isiraeri.
13 Kira ribhaara ndeere ne ebhehita bhitato,
roghoro,
na masaabha,
na bhachuuta,
na anyancha.
14 Eribhendo riyo re moghya ndeere ryabhëkuru ighoro e mabhohe ikomi na abhere gha bhoroso.
Na kira riibhohe ndeere ryandëkuru eriina re umu ghate e bhatomu bhaare ikomi na bhabhere bha Moona o Ngʼöndu.
15 Mbe,
marayika uno are arasiikëra na neeni naare na ahimbo e sahaabhu e kurëngëra.
Naare nayo kubha arëngërë omoghya uyo,
ebhehita bheeche ne eribhendo reeche.
16 Mbe,
akarënga moghya uyo,
obhurambe no obhughare no obhurë mboore bhurëngʼiine.
Akabhöna kubha n‑chakiromeeta ebheku bhibhere na amaghana ane (2,400).b
17 Akarënga obhughare bho ribhendo riyo,
akabhöna kinya chamiita miröngö esaasabhe.
Naare ararëngëra ekirëngërë kino kinaruru na abhaato.
18 Eribhendo riyo ndeere ryabhëkuru kwo mabhohe gha riighori gha yasibhi.
Omoghya nawe noore wabhëkuru gho sahaabhu ino yeghuru,
ino ere erabharibhari ghe ekiröri.
19 Obhoroso bho ribhendo riyo re moghya ndeere richöchuru na amabhohe gha riighori gha manga haghare haghare.
Eriibhohe e rimbërë ndeere yasibhi,
na re kabhere ndeere yakuti samawati,
na re ghatato ndeere kariketoni.
Eriibhohe re kane ndeere sumariti,
20 na re ghataano ndeere saritooniki,
na re ghasaasabhe ndeere akiki.
Eriibhohe re mohungate ndeere kirisobhuraso,
na re kanaane ndeere Sabharachaati.
Eriibhohe re kende ndeere yakuti e manchana,
na ri ikomi n‑kirisobhiraso,
na ri ikomi na rimu ndeere hiyakinito na ri ikomi na kabhere ndeere ametisito.
21 Ebhehita bhiyo ikomi na bhibhere bhyose mbeere bhiköruru kwo ruuru.
Kira kehita nkeere ghiköruru kwo ruuru imu hangʼu!
Anchëra ankoro e moghya uyo neere iköruru gho sahaabhu ino yeghuru,
ino ere erabharibhari ghe kiröri.
22 Nterooche Erisëngërö re Ryobha mo‑moghya uyo,
gho kubha Omutëmi Waryobha o Bhotoro Bhoose,
haghirohamu no Omoona o Ngʼöndu niryo Erisëngërö reeche.
Gho ghayo,
hataanyi na amënda ha haghiro ha ghusëngëra.
23 Omoghya uyo toonyi na amënda gha bhwero bho ryobha hamu omwëri,
gho kubha obhokumi obhokoro bho Waryobha mbokowurëngareri,
no Omoona o Ngʼöndu niwe oromore rooche.
24 Abhaato bha matöngö ghoose mbakumanya mo‑bhwero bho moghya uyo,
na abhatëmi bha se mbaghusöha‑mu kohira ebheghiro bheebho bhe riighori.
25 Ebhehita bhyose bhe moghya bhetaaghwigharu eriibhagha ryose,
gho kubha obhotiko bhotaakubha‑ho.
26 Abhaato bha matöngö ghoose mo‑se mbakurëëta obhwame bhoobho ne ebheghiro bheebho bhe riighori mo‑moghya uyo.
27 Amare ghetaanyi‑ho ghyokyose kino keenyi gheghonchu kino gheghusöha mo‑moghya uyo,
koru omooto wowoose uno aghuköra amangʼana gha chaasoni hamu ghosiikëra obhuröngö.
Amare,
abhaato bhano bhaghusöha mo‑moghya uyo m‑bhaare amariina ghaabho ghaandëkuru mo‑Ghitabhu ke Bhuhöru ke Omoona o Ngʼöndu.