Orooche ro manche gha bhuhöru
22
Akamara marayika uyo akanyëërëki orooche ro manche gha bhuhöru,
ndoore rorabhari kinya ekiröri na ndorweriire irungu re ghetumbe ghe ghitëmi ke Ryobha no Omoona o Ngʼöndu.
2 Orooche ruyo ndoore roraghëri ghateghate e nchëra ankoro e moghya uyo.
꞉Haare no omote uno okobhaha abhaato obhuhöru uno urandiri chambaara choose che rooche.
Omote uyo noghusönga amakorobhese mara ikomi na kabhere kwo mooka,
kurëngʼaana ne emyëri.
Amato ghaache n‑omote o kuhöri amatöngö.
3 Omoghya uyo tookubha ne egheghiro ghyokyose kino kiihiimuru ne Eryobha.
Eghetumbe kiire ghe ghitëmi ke Ryobha no Omoona o Ngʼöndu ngeekubha‑mu.
Abhatamishi bha Ryobha mbakorisëngëra.
4 Mbakorighi obhosho bhooche,
no omooto woose nakwandëku eriina re Ryobha mo‑bhosho bhooche.
5 Mo‑moghya uyo,
hataakubha no obhotiko wiiki.
Abhaato bhataakubha bharëënda obhwero bho romore hamu bho mu,
gho kubha Omutëmi Waryobha naakubha obhwero bhoobho.
Nabho abhaato bhayo mbaghukangata emiishe ne emiishe.
Amangʼana gha kumareereri
6 Akamara marayika uyo akamboorera akabhugha,
“Amangʼana ghano n‑gha mahëënë na gha bhuhëënë.
Omutëmi Waryobha uno akobhaha abharööti Akörö yaache,
iwe ꞉naatomiri marayika waache kwërëki abhatamishi bhaache amangʼana ghano ghakwëndëru gharwere ghano matiko.”
7 Yesu nakobhugha,
“Tëghëërëra!
ˆNekaacha bhwango.
Ngʼoni bhano bhaghosooka na ghoghatambana amangʼana gha bhurööti bho ghitabhu kino.”
8 Eni Yohana ꞉neerooche na kooghu amangʼana ghayo eni mwene.
Hano negharooche na ghoghooghu,
neghagho kebhuuma ambërë e marayika uno anyëërëkiri amangʼana ghayo,
kubha nemusëngërë.
9 Amare akamboorera akabhugha,
“Tigha!
Eni woose n‑omutamishi mughëndi waacho neenyi.
Nturëngʼiine na abhahiiri bhaacho abharööti,
na abhande bhoose bhano bhaghutambana amangʼana gha ghitabhu kino.
Mbe,
orisëngërë Eryobha eryene chiri!”
10 Akamara marayika uyo akamboorera akabhugha,
“Otaghabhisa amangʼana ghano gha bhurööti bho ghitabhu kino,
gho kubha ghoose ghano ghaghamburu muyo ngaghuköru ghano matiko.
11 Mbe,
omooto uno aghuköra amabhe,
ëndërërë ghuköra amabhe,
na uno aghuköra amangʼana gha chaasoni,
ëndërërë ghuköra amangʼana gha chaasoni.
Omooto uno aghuköra obhuhëënë,
iwe ëndërërë ghuköra obhuhëënë,
no omutööbhiyu,
ëndërërë kubha obhutööbhiyu.”
12 Yesu nakobhugha,
“Mööhi!
Nekuucha bhwango.
Nekuucha nemorehe omooto woose kurëngʼaana na amaköri ghaache.
13 Eni neeni Simoka na Antenero,
a eni neeni uno niisëëmiri amangʼana ghoose na ghoghamareereri.”
14 Ngʼoni abhaato bhano bhakohura chandachana cheebho,
b kubha bhiisherereru ghusöha omoghya uyo omuhë kohetera ekehita keeche na kurë amakorobhese gha mote o kobhaha abhaato obhuhöru.
15 Amare abhaturutumbi bhoose,
na abhataari,
na abhiiti,
na bhano bhaghusëngëra emisambu na abhande bhoose bhano bhasiighiri ghosiikëra obhuröngö,
mbaakubha anche e moghya uyo kinya chaseese.
16 “Eni Yesu,
n‑o riitina re mutëmi Tawuti no orwibhoro rooche,
wiiki nekurëngaari kinya anchöta e tabhoori.
Eni neeni netomiri marayika waane ache abhabhoorere inyu abhaghëndi bhaane amangʼana ghano,
gho ghiri e makanisa.”
17 Akörö e Ryobha no omokwiru mbakomobherekera Omutëmi bharabhugha,
“Nuuche!”
Na abhaato bhoose bhano bhakooghu amangʼana ghayo bhabhughe,
“Nuuche!”
Wowoose uno anyi na anyööta,
uno akwënda amanche,
ache anyo amanche gha bhuhöru bhoowa.
Atöngërö e kumareereri
18 Omooto woose uno akooghu amangʼana ghano gha bhurööti ghano ghaanyi mo‑ghitabhu kino,
nekamoshaangʼi kubha,
arëëngëra amangʼana,
Eryobha ryose ndekomwëngëra chanaabhi chino chitaruru mo‑ghitabhu kino.
19 Wiiki omooto wowoose arayeruusi angʼana yoyoose koru mo‑mangʼana gha bhurööti bho ghitabhu kino,
Eryobha ryose ndekobhoruusi obhuhëënë bhooche bho ghwikara mo‑moghya omutööbhiyu,
no obhuhëënë bhooche bho kurë amakorobhese gha mote o kobhaha abhaato obhuhöru.
Amangʼana gha moghya uyo no omote uyo mbyandëkuru mo‑ghitabhu kino.
20 Iwe uno akoruusi obhwibhateri bhooche ighoro e mangʼana ghano nakobhugha,
“Hëënë,
ˆnekaacha bhwango.”
Hawubhaabha.
Nuuche Omutëmi Yesu!
21 Nëköbhëëndëra aghareeya e Mutëmi Yesu,
ibhe haghirohamu na niinyu bhoose.
Hawubhaabha.