Erishambu ˆrekabhöhu emeeka egheku kimu
20
Nekamara,
nekarighi marayika ariika koru Mwishaaro.
Nawe mo‑kubhökö kooche naare no orohunguro ro mwirooma re mashambua no omunyörörö mokoro.
2 Aghaghughööta oghuchöka ghuure,
oghuchöka ghuure gho kare ghuno ghokobherekeru Ibhiriisib hamu Erishambu,
aghaghubhöha no omunyörörö kwo riibhagha re meeka egheku kimu,
3 ghokarëkëru mwirooma re mashambu.
Aghiighara orwighe,
aghatoora omohuuri o nyaghame kubha ghotabhöna omweya wiiki o kobhangʼiina abhaato bha matöngö.
Hano eriibhagha re kibhöhö reghosira,
ngokwëndëru ghotighooroku kwo riibhagha ighuhe.
4 Niho nekarighi ebhetumbe bhe ghitëmi bhikariiru na bhano ꞉bhaare bhahaabhuru obhotoro bho ghotena ekiina.
Bhayo,
n‑chaakörö chiire che bhaato bhano ꞉bhaanunguru emitu gho koruusi obhwibhateri ighoro e Yesu na kuraghani amangʼana e Ryobha.
Bhatasëngiire oghotyenyi ghuure koru asanaamu yaache.
Bhatiisheriiri ghotooreru ekingʼöchö ghe ghotyenyi ghuyo mo‑masho ghaabho koru mo‑mabhökö ghaabho.
Abhaato bhano ꞉bhaaryokiri,
bhaghakangata haghirohamu na Kirisito emeeka egheku kimu.
5 Abhaku abhande bhataakoryoka mbagha emeeka egheku kimu ghehikeerane.
6 Kuno niko koryoka kwo bhaku o kumbërë.
Ngʼoni bhano bhakoryokibhu hayo,
ibho mbiitabhiiru chwee na m‑bhatööbhiyu.
Oroko ro kabhere rotaakubha na changuru ighoro yaabho.
Ibho mbaakubha abhachaama bha Ryobha na Kirisito,
na mbaghukangata nawe eriibhagha riyo re meeka egheku kimu.
Erishambu ˆreghasireekereru
7 Hano emeeka egheku kimu gheghosira,
Erishambu ndeghotighooroku koru mo‑kibhöhö keeche.
8 Mbe,
hano reghotighooroku,
ndekuucha rengʼiine amatöngö gha chambaara choose che se,
nigho Ghoghu na Maghoghu.
Erishambu ndekobhakoma bhakörë eriihë,
nabho mbaakubha erikinda ikoro kinya omwishekeenya o mo‑nyancha.
9 Nabho mbaghughënda ahaghiro hoose ha se na kowinaareri omoghya uno Eryobha rewosiighiri.
Abhaato abhatööbhiyu mbahiikara mo‑moghya uyo.
Amare eriibhagha bhaghuköra hangʼu,
omororo noghwika koru Mwishaaro na kobhasireekereri.
10 Mbe,
Erishambu,
rino rebhangʼiiniri,
ndekurëkëru mo‑nyancha e mororo muhaari chwee.
Hayo niho ahaghiro hano bharëkiire oghotyenyi ghuure no omurööti wuure o bhuröngö.
Ibho mbakunyaakibhu iyo obhotiko no omwishe,
emiishe ne emiishe.
Abhaku ˆbhaghateneru ekiina
11 Nekamara,
nekarighi Eryobha riikeere mo‑ghetumbe kyero eghekoro ghe ghitëmi.
Erishaaro na ase bhekangʼösa ambërë yaache na bhetaaroochiibhu wiiki.
12 Nekarighi abhaku bhoose,
bhano bhaanyi ne emyeya na bhano bhataanyi ne emyeya bhiimeeriire ambërë e eghetumbe kiire ghe ghitëmi.
Niho ebhitabhu bhino bhyandëkuru amaköri gha bhaato bhoose bhekahunyuru.
Wiiki eghitabhu ekende ghekahunyuru,
kiyo n‑Eghitabhu ke Bhuhöru keere.
Abhaku bhayo ꞉mbaateniiru ekiina kurëngʼaana na amaköri ghaabho ghano ꞉ghaandëkuru mo‑ghitabhu muyo.
13 Anyancha ekaruusi abhaku bhano ꞉bhaare‑mu.
Oroko na nyaari bhyose bhekaruusi abhaku bhano ꞉bhaare‑mu.
Omooto woose aghateneru ekiina kurëngʼaana na amaköri ghaache.
14 Hano ghayo ghasiriri,
oroko na nyaari bhekarëkëru mo‑nyancha e mororo.
Anyancha iyo e mororo niyo oroko ro kabhere.
15 No omooto wowoose uno eriina reeche retaandëkuru mo‑Ghitabhu ke Bhuhöru,
woose narëkiiru mo‑nyancha e mororo.